No Kasano a Sanguen Dagiti Doktor ti AIDS
TI PEGGAD a pannakaala iti AIDS babaen ti dara tinignayna ti dadduma a siruhano a mangadaptar iti awagan ti The New York Times a “baro a kabal iti panagopera para iti panawen ti AIDS.” Para iti siruhano ti kabal iramannat’ “butas a goma, nagayad a di serken ti danum nga apron, dua paris a guantes, di serken ti danum a manggas a pangsalaknib ken dagiti antiohos.” Ken nangnangruna kadagiti nadara a kaso, kuna ti Times, “maysa a helmet nga addaan maiyabbungot a salaknib ti rupa.”
Nakadidillaw, iti ngudo ti 1990, kunaen ti Federal Centers for Disease Control a kadagiti 153,000 a naireport a kaso ti AIDS, 637 dagiti doktor, 42 dagiti siruhano, 156 dagiti dentista ken hygienists, ken 1,199 dagiti nars.
Ti AIDS damo a nailasin idi 1981. Iti maysa a panawen nailasin dayta a nangnangruna kadagiti lallaki a homoseksual ken kadagiti adikto ti droga a naimpektaran kadagiti namulitan a dagum. Ngem napartak ti panagsaknapna kadagiti babbai. Ti World Health, ti magasin ti WHO (World Health Organization) inreportna iti Nobiembre-Disiembre a bilangna: “Ti bilang dagiti babbai [iti sangalubongan] a mainanama nga agsakitto iti AIDS bayat ti sumaruno a dua a tawen lab-awannanto ti nakadagupan ti amin a kaso ti AIDS nga inreport iti WHO bayat ti umuna a dekada ti epidemia.”
Idiay Estados Unidos, ti Federal Centers for Disease Control inreportna nga idi arinunos ti 1990, addan 15,696 a tattao a nasurok a 50-años a nakapatanor ti sintomas ti AIDS. Nangato a bilang dayta no idilig iti 2,686 laeng a kaso ti AIDS kadagiti ubbing a nababbaba ngem 13, maysa a grupo dagiti biktima ti AIDS nga immawat ti dakdakkel a pannakaipablaak.
Kasanot’ pannakaala dagiti natataenganen iti AIDS? Adut’ makaala iti dayta kas resulta ti homoseksual nga ar-aramid. Nupay kasta, sigun iti The New York Times, “agarup 17 porsiento kadagiti biktima nagun-odanda ti virus babaen ti namulitan a panangyalison iti dara.” Kaipapanan dayta a ti bilang dagiti kaso ti AIDS kadagiti natataengan gaput’ panangyalison ti dara ket agarup pumada iti nakadagupan dagiti kaso ti AIDS kadagiti ubbing a nababbaba ngem 13!