Agimtuod Dagiti Agtutubo . . .

Kasanot’ Panangtulong Dagiti Nakristianuan a Gimgimong Kaniak?

“Ti panagkunak dagiti simsimbaan didaka matulongan nga agprogreso iti naespirituan. Kayatko a sawen, agpannuray iti tao no kayatna ti agbalin a naespirituan wenno saan.”—19 años a ni Kevin.

NI Kevin ket umiso iti adu a pamay-an. Pudno nga ikeddeng ti tunggal tao “no kayatna ti agbalin a naespirituan wenno saan.” Ngem agsipud ta basbasaenyo daytoy nga artikulo, mabalin a kayatyo ti agbalin a naespirituan. Mabalin a diyo masigurado, nupay kasta, no ania ti naespirituan a tao wenno kasano ti panagbalin a maysa.

Iti simple a pagsasao, ti naespirituan a tao ket maysa nga agpaidalan iti pampanunot, opinion, ken tigtignayna iti panangiturong ti Kangatuan a Dios, ni Jehova. Iramramanna ti Namarsuana no mangar-aramid kadagiti inaldaw a pangngeddeng, panangipasdek kadagiti kalat, wenno panangiyurnos kadagiti ipangpangruna iti biag. Iti sabali a pannao, ti naespirituan a tao iturturong ti Dios.

Kas tin-edyer, masarakam a “ti pakadanagan daytoy a sistema dagiti bambanag” ti manglapped ti naespirituan nga irarang-ay. (Mateo 13:22) Iti pannakitimpuyog nga agmalmalem kadagiti kaeskuelaan a mabalin nga ‘agannayas a mangaramid iti dakes iti amin a tiempo’ mabalin met a makapaupay. (Genesis 6:5) Dadduma ti mabalin a “manglais pay ken agsao iti dakes,” a mamagbalin a narigat ti panangipamaysayo iti panunotyo iti naimbag. (Salmo 73:8) Ket no ti dadakkelyo wenno dadduma a miembro ti pamilia ket saanmo a kapammatian, mabalin a bassit laeng, no adda man, ti ipaayda a naespirituan a pammaregta. Ania ti maaramidam tapno malabanam dagitoy a negatibo nga impluensia ket rumang-ay iti naespirituan?

Maysa a banag a maaramidam isut’ itatabuno a regular kadagiti gimgimong idiay Kingdom Hall dagiti Saksi ni Jehova. Naiduma kadagiti serbisio ti simbaan, dagiti gimgimong sadiay agpadpada a paregtaendaka a mangaramid “a kalatmo ti nadiosan a debosion” ken tulongannaka a rumang-ay manipud espiritual a kinamaladaga nga agturong iti espiritual a kinamataengan.—1 Timoteo 4:7; Efeso 4:13, 14.

Gimgimong a Mangtulong Kenka a Makaadal

Iti nasurok a 63,000 a kongregasion iti intero a daga, dagiti Saksi ni Jehova surotenda ti balakad ti Biblia nga “ummongemto dagiti tattao, dagiti lallaki ken babbai ken dagiti ubbing . . . tapno mangngegda ken tapno makasursuroda.” (Deuteronomio 31:12) Isu a masarakam ti adu nga agtutubo a kas kenka iti gunglo dagiti Saksi.

Dagiti Saksi ni Jehova iti intero a lubong makiramanda iti isu met laeng nga edukasional a programa. Daytoy buklen ti lima a linawas a gimgimong, tunggal maysa agarup maysa nga oras ti kapautna. Dagitoy dagiti lima a gimgimong:

Palawag Publiko—maysa a diskurso iti Biblia a mangitamtampok iti maysa a tema ti Biblia.

Panagadal ti Pagwanawanan—maysa a naun-uneg a panagadal kadagiti sursuro ti Biblia a maus-usar ti magasin a Pagwanawanan, ti kangrunaan a publikasion dagiti Saksi ni Jehova.

Teokratiko nga Eskuelaan ti Panagministro—mangisuro iti nasigo a pannakisao iti Nakristianuan a ministerio.

Gimong ti Serbisio—naglaon kadagiti pagsasaritaan ken demostrasion iti epektibo a metodo ti panangisuro iti ministerio iti ruangan ken iti panangiyadal ti Biblia.

Panagadal ti Libro iti Kongregasion—maysa a saludsod ken sungbat a panagsasarita dagiti babassit a grupo a maus-usar ti maysa a libro a tulong iti panagadal iti Biblia—kadawyanna kadagiti pribado a pagtaengan, .

Ti edukasional a programa kadagitoy a gimong tulongannaka a mangammo “uray kadagiti nauuneg a bambanag ti Dios.” (1 Corinto 2:10; Proverbio 2:5) Nupay kasta, adda pay dadduma a maipaay ti itatabuno.

“Kas Landok Patademenna ti Landok”

“Naglaka ti agbalin a Kristiano iti nagbabaetan ti dadduma nga agserserbi met iti Dios,” kuna ti 15 años a ni Michelle. “Ngem no mapanka idiay eskuelaan, narigrigat gapu ta dagiti kaeskuelaam naiduma dagiti pagalagadan ken kalatda.” Maysa a gunggona iti itatabuno iti gimgimong, ngarud, isut’ gundaway a makitimpuyog kadagiti kapammatian.

Ti masirib nga Ari Salomon nasaona: “Kas landok patademenna ti padana a landok, kasta ti maysa a tao patademenna ti kinasaririt ti sabali.” (Proverbio 27:17, The New English Bible) No maminsan, ti espiritual a “kinasaririt,” nga isu, ti espiritual a pannakaammo ken pannakaawat, masapul a maasa. Ngem kas ti panangasa iti literal a kutsilio sapulenna ti laing ken ti umiso nga al-alikamen, kasta met kasapulam ti makitimpuyog kadagiti umiso a tattao, dagidiay addaan abilidad a “mangipaay iti sumagmamano nga espiritual a sagut kenka.”—Roma 1:11

Idiay Kingdom Hall, masarakam dagita a tattao, a nagduduma ti edad, rasa, ken nakaiyanakanda. Kaawatan, mabalin nga umasidegka kadagiti kapatadam. Mangipaayka iti naisangsangayan nga atension, nupay kasta, kadagidiay nangbusbos ti adun a tawen nga agserserbi a sisusungdo ken Jehova. (Levitico 19:32) Ti kapadasanda iti biag agraman ti nauneg a pannakaammo iti Biblia ti mabalin a dakkel ti maitulongna kenka. Kasano a maam-ammom dagita? Padasem a saludsodan ida, ‘Kasanoyo a nabirukan ti kinapudno?’ wenno, ‘Kasanot’ panangmatmatyo iti panagserbi iti tay-ak idi agtutubokayo pay laeng?’ Mabalin a mangipaayda kadagiti espiritual a sagsagut kenka!

Pudno, no asitgam dagiti dadduma iti uneg ti kongregasion, mabalin a mariknam iti damo kas ti rikna idi ti 12 años a ni Craig, a nagkuna: “Adda idi panagbutengko a makipatang kadagiti natataengan. Ipagarupko a no makaiyebkasak iti di umiso, mabagbagaanak.” Ammo itattan ni Craig a dagiti rikriknana ket di umiso. “Komportableak itattan a makipatpatang kadakuada,” inlawlawagna. Apay a dikay mangaramid iti umasping a panangikagumaan tapno makitimpuyog kadagiti nataengan iti naespirituan iti uneg ti kongregasion? Ti panangaramid ti kasta ti mangipaay kenka ti di magatadan a gundaway a mangpaliiw ken mangtulad kadagiti nataengan a Kristiano—2 Tesalonica 3:9.

Ti “Dila dagiti Nasursuruan”

Ti sabali a paset a pagrang-ayan ramanenna dagiti abilidadmo a mangisuro. Kas pangarigan, kabaelam aya ti mangisarita a silalawag kadagiti kinapudno ti Biblia? Kabaelam aya nga awisen ti atension dagiti managdengngegmo? Maiyebkasmo kadi ti umiso a kaipapanan iti basbasaem? Kinuna ni propeta Isaias: “Ti Soberano nga Apo Jehova intedna kaniak ti dila dagiti nasursuruan.” (Isaias 50:4) Ken babaen iti panagsanay, maaddaankanto met iti dila dagiti nasursuruan. Magunggonaanka itoy babaen iti naisangsangayan a gimong: Ti Teokratiko nga Eskuelaan ti Panagministro. Addakay kadin iti dayta nga eskuelaan?

Ti Teokratiko nga Eskuelaan ti Panagministro ket nadisenio a mangisuro kadagiti Kristiano a makipatang kadagiti sabsabali. Awan ti naikeddeng nga edad wenno kasapulan man ti bautismo. Masapul a makabasa ken makasuratka, nupay kasta, agbalin nga aktibo a makitimtimpuyog a kadua ti kongregasion, ken agbiag a maitunos kadagiti Nakristianuan a prinsipio. Kasano ti panagandar daytoy eskuelaan ti ministerio?

Kalpasan ti panagpailista, madutokanka a mangipaay iti ababa a palawag maipapan iti espisipiko a Nainkasuratan a tema. Ikagumaam nga isagana ti palawagmo. Kas pangarigan, ti kanayonan nga impormasion maipapan iti suheto ti temam ket kadawyan a makita babaen ti panangsukimat kadagiti publikasion ti Biblia babaen ti panangusar iti Watch Tower Publications Indexes ken babaen ti panangusig ti enciclopedia ti Biblia nga Insight on the Scriptures.a No kasapulam ti tulong iti daytoy a banag, pagsaludsodam dagiti nagannakmo wenno ti maysa nga addaan kapadasan a Kristiano a mangtulong kenka. Ti panagsukimatmo adut’ maitulongna iti palawagmo ken papartakenna pay ti espiritual nga irarang-aymo.—Proverbio 2:1-5.

No agpalawagka iti kongregasion, ti kualipikado a ministro a mangimatmaton ti eskuelaan umim-imdeng a siaannad. Kalpasan ti palawagmo, isut’ mangipaay iti maiyanatup a pammaregta ken balakad a naibatay iti impormasion a masarakan iti Ti Giya iti Teokratiko nga Eskuelaan iti Panagministro, maysa a publikasion a nadisenio a tumulong kadagiti pumapalawag iti publiko. Denggem a nalaing daytoy a balakad. Di nairanta daytoy a mangbabalaw wenno mangibabain kenka. Dagiti singasing a naipaay ket mangtulong kenka. No “itultuloymo nga ipaay ti bagim iti panagbasa iti publiko,” ti naespirituan a panagrang-aymo ket “maiparangarangto kadagiti isuamin.”—1 Timoteo 4:13-15.

‘Dayawem ni Jehova Babaen kadagiti Bibigmo’

Ti sabali pay a pamay-an tapno rumang-ay iti naespirituan kadagiti Nakristianuan a gimgimong isut’ panagboluntario a sumungbat ken agkomento no maawis ti pannakipaset dagiti agdengdengngeg. Ti nasapsapa a panagsagana ti tulbek.b Ngem mabalin a marigatanka nga agkomento uray pay no nagsaganaka iti gimong. No kasta, dumawat iti tulong ken Jehova. Nagkararag ni Ari David: “O Jehova, luktam koma dagiti bibigko, tapno ti ngiwatko met laeng iparangarangna ti pannakaidaydayawmo.”—Salmo 51:15.

Laglagipem: Ti sungbat ket saan unay nga atiddog wenno adut’ saklawenna tapno makaparegta. Kas kunaen ti 12 años a ni Rachel: “Imbes a mangipaay iti atiddog a komento, ti panagkomento saklawenna laeng ti maysa a sentensia. “Iti damo, ti panagiyebkas kadagiti gimong ket kasla narigat, ken mabalin nga agkiddawka iti tulong, ngem dumteng ti tiempo, mariknayonto ti kas rikna ni Rachel, a nangilawlawag: “No mangipaayka iti komento a bukbukodmo, talaga a nagtaud kenka, ket maragsakanka iti dayta.” Mainayon pay, rumang-ayka iti naespirituan kas bunga ti panangikagumaam.

Saan a nalaka ti agbalin a sipapanunot iti naespirituan iti tengnga ti naisentro iti bagi a kasasaad ti lubong itatta. Ngem no kankanayonka a tumabtabuno kadagiti gimong, agsagana a nalaing, makipaset, ken pagreggetam ti makitimpuyog kadagiti natataengan, dagiti Nakristianuan a gimong ti pudno a mangtulong kenka a rumang-ay iti naespirituan.

[Footnotes]

[Dagiti Ladawan iti panid 21]

Ti Teokratiko nga Eskuelaan ti Panagministro sinanaynan dagiti rinibribu nga agtutubo tapno agbalinda a nalaing a mannursuro iti Sao ti Dios