Ti Panangmatmat ti Biblia

Kondenaren Aya ti Dios ti Panangusar iti Alkohol?

‘DIKAY pakadanagan ti cocaine, heroin, LSD, ken marijuana—ti alkohol isu pay laeng ti kadadakkelan a di makaay-ayo a parikut a sarangten ti kagimongan. Uray no pagtitiponen ti epekto ti panangabuso kadagiti amin a dadduma pay a droga adayu nga ad-adu nga ipapatay ken pannakadadael ti kagimongan ti patauden ti alkohol.’ Dagitoy a rikrikna ti naiyebkas iti maika-31 a kumbension a maang-angay iti kada tallo a tawen ti World’s Woman’s Christian Temperance Union dua a tawen a napalabasen.

Maseknan dagiti timmabuno iti makaupay a pagbanagan ti dumakdakkel a panangusar iti alkohol iti natauan a salun-at ken biag iti sangalubongan, kasta met iti minilion a doliar a busbosen dagiti gobierno nasional iti tinawen tapno parmeken ti alkoholismo. Gapu ta kumbinsidoda a kondenaren ti Dios ti panangusar kadakuada, adu a natakneng a tattao ti umanamong iti pannakaiparit ti amin a makabartek nga inumen. Ngem suportaran kadi ti Bibia daytoy a panangmatmat?

Usar ti Arak idiay Biblia

Kadagiti un-unana nga aldaw inkari ti Dios kadagiti natulnog a tattaona: “Iti kasta dagiti sarusarmo mapnodanto a sipupusek; ket dagiti baldem agliplippiasdanto iti baro nga arak.” (Proverbio 3:10) Wen, isu Daydiay mangipapaay kadatayo iti nabunga a kaubasan, ken mangted pay iti bassit nga organismo iti bubod a nangbalkot iti ubas bayat nga umasideg iti panawen ti panangaramid iti arak.

Inlawlawag ti mammadto ti Dios a ni Isaias ti dadduma a paset ti panangaramid iti nasayaat nga arak. Iparparipiripna dagiti bendision ti umay a baro a lubong ti kinalinteg, insurat ni Isaias: “Ni Jehova dagiti buybuyot agaramidto kadagiti amin nga inilin-ili . . . iti maysa a rambak dagiti ar-arak iti rabaw dagiti aributed . . . dagiti arak a nadalusan a naimbag kadagiti aributed.” (Isaias 25:6) Ammo dagiti manangaramid iti arak nga aduan kapadasan a ti arak “iti rabaw dagiti aributed,” a di gargarawen iti napaut a tiempo bayat ti panagingelna, in-inut a madalusan, a pasayaatenna agpadpada ti sanger ken ramanna.

Pakaragsakan ken Benepisio iti Salun-at?

Imbalabala ti Dios agpadpada ti ragsak ken dagiti benepisio a magun-odan manipud iti arak. Saritaen ti mammadtona a ni Joatam ti maipapan iti “baro nga arak a liwliwa ti Dios ken dagiti tattao.” (Oc-ocom 9:13) Nagsurat ni Ari Salomon maipapan iti ‘panangparagsak ti arak iti lasagko.’ (Eclesiastes 2:3) Ket iti nalatak a salaysay maipapan iti boda idiay Cana, ni Jesus, iti kaunaan a milagrona, pinagbalinna ti danum “a kasayaatan nga arak,” a nakaay-ayuan dagiti sangaili.—Juan 2:6, 7, 10, The New English Bible.

Ti panangbigbig ni Jesus iti usar ti arak kas agas ket nalawag a maiparangarang iti pangngarigna maipapan iti naimbag a Samaritano. Idi nabedbedannan dagiti sugat ti maysa a nadangran a tao, sinapsapuan ti naimbag a Samaritano iti “lana ken arak” dagiti sugat. (Lucas 10:30-34) Ti singasing ni apostol Pablo iti agtutubo a ni Timoteo nga ‘aramaten ti bassit nga arak gapu iti rusokna ken dagiti masansan a saksakitna’ ket maitunos la unay iti pannakabigbig itatta iti pateg ti arak a kas taraon ken agas.—1 Timoteo 5:23.

Iti librona a Wine and Your Well-Being kinuna ni Dr. Salvatore P.  Lucia, sigud a propesor idiay University of California School of Medicine, a “ti arak ket saan laeng nga isu ti kadaanan a de alkohol a taraon no di ket isu ti kapapatgan nga agas a maar-aramaten iti intero nga historia ti tao.” Kinuna ti managsirarak a nutrisionista a ni Janet McDonald a ti kalalainganna a panaginum iti arak ket epektibo a mangpakalma, mangpaganas iti pannangan, ken tumulong a mangrunaw ken mangagsep kadagiti mineral iti taraon.

Masapul ti Kinatimbeng ken Panagteppel

Nupay kasta, iti baet dagita a panangtukoy iti arak agpadpada idiay Biblia ken iti nailubongan a medisina, nakaay-ayay ti nagbanagan ti panangabuso iti arak kadagiti adu iti sangatauan. Ti Dios kadi ti mapabasol kadagiti amin a didigra a nagbanagan ti panangabuso iti alkohol? Maisupadi iti dayta, iti Saona, ti Biblia, isut’ nangipaay iti nasaklaw a pagalagadan a mangiwanwan iti panangusar ken panangabuso iti arak.

Usigenyo, kas pangarigan, ti sumaganad a nainget a pakdaar maibusor iti panangabuso itoy a sagut: “Dika makitipon kadagiti mangnginum iti arak, kadagiti narawet nga agsida iti lasag.” Nalawag a di kaipapanan daytoy a dagiti laeng di umin-inum iti arak ti makaay-ayo iti Dios, ken di met kondenaren ti kasuratan dagidiay uminum iti bassit nga arak wenno dagiti natimbeng nga agsida iti lasag. Imbes ketdi, ti pakdaar ti Biblia ket maibusor iti nalabes a pannangan ken panaginum. Nabatad dayta kas kunaen ti maysa pay a proverbio: “Siasino ti addaan ay-ayen? Siasino ti addaan ladingit? Siasino ti addaan ringringgor? Siasino ti addaan asug? Siasino ti addaan sugat nga awan gapgapuna? Siasino ti addaan labbasit dagiti matana? Dagiti agtalinaed a napaut iti arak.”—Proverbio 23:20, 29, 30.

Imbalakad dagiti mannurat ti Biblia a da Pedro ken Pablo ti natimbeng a panaginum babaen ti pammagbagada kadagiti immuna a Kristiano a liklikanda ti “panaglablabes iti arak” ken “panagbartek iti arak.” Nasken nga ipangag a sipipinget daytoy a pammagbaga, kas imballaag ti apostol: ‘Dagiti managbarbartek saandanto a tawiden ti pagarian ti Dios.’ Iti sabali a pannao, dagiti naruamen a manangabuso kadagiti de alkohol nga inumen di ida anamongan ti Dios ken mapaayda a manggun-od iti biag nga agnanayon.—1 Pedro 4:3; Efeso 5:18; 1 Corinto 6:9, 10.

Gapuna, no awan panagteppel dagiti indibidual iti panangusar iti alkohol, nasken nga idianda a naan-anay dayta. (Idilig ti Mateo 5:29,  30.) Malaksid iti pannakadadael ti bagi, ti di mamedmedan a panagpannuray iti alkohol mangpataud iti grabe a naespirituan a pannakadangran. Gapuna, nainsiriban a pagannadennatayo ti Dios maibusor iti panaglablabes iti de alkohol nga inumen.

Maisupadi iti panangmatmat dagiti mangipagpagel, di ipaalagad ti Biblia, wenno ipasimudaagna man laeng, ti naan-anay a panangidian iti arak wenno de alkohol nga iinumen kadagiti amin a tao. (Deuteronomio 14:16) Kunaen ti salmista maipapan ken Jehova: “Patuboenna dagiti root a maipaay kadagiti bakbaka, ken ti mula nga agserbi iti tao, tapno isu maparnuayna ti taraonna iti daga, ken ti arak a mamaragsak iti puso ti tao.” Pudno unay, inkeddeng ti Dios ti arak maipaay iti naimbag ken nadayaw a panggep, no natimbeng ti panaginum.—Salmo 104:14, 15.

[Picture Credit Line iti panid 26]

L’ Absinthe ni Edgar Degas, 1877—E.R.L./Sipa Icono