Maysa Kadi a “Water Dowser” ni Moises?

“NI Moises, a nangparuar ti danum babaen ti panangpang-orna ti maysa a bato iti sarukodna (Numeros 20:9-11), naawagan a ti immuna a dowser.” (The Encyclopedia Americana) Daytoy ti rumsua a kapanunotan no mapagsasaritaan ti tema a dowsing. Nabiit pay, ti magasin a National Wildlife silalawag nga inawaganna, a kasla ket tay pudno, ti sarukod ni Moises a “sarukod a pagpadles.” Ket patien ti dadduma a dowser nga agtaud ken Moises ti pannakabalinda.

Maisupadi ketdi, nupay kasta, ni Moises ti nangisurat ti bilin a maibusor iti panagpadles! (Deuteronomio 18:10) Ket ti datdatlag idiay Meriba naiduma unay manipud iti dowsing. Adu a dowser ti agpannuray iti sarukodda a mangsapul iti nailemmeng a danum; surotenda dayta, nga urayenda ti panaggaraw dayta. Ngem pulos a di sinurot ni Moises ti sarukodna nga urayenna nga aggaraw; kinapudnona, pulos a dina sinapul ti danum. Ni Jehova, ti Namarsua iti daga ken dagiti nailemmeng nga ub-ubbog ti danum, ti nangibaga ken Moises no sadino ken no kasano a magun-odan ti danum: “Sawenyo iti bato,” imbilin ti Dios, “nga itedna koma ti danumna.”—Numeros 20:8.

Kasta met, gagangay a dagiti dowser ibagada laeng kadagiti tao no sadino ti pagkalianda. Idi pinang-or ni Moises ti bato babaen iti sarukodna, pimsuak ti aglaplapusanan a danum—umdas a mangep-ep ti waw ti intero a nasion. Nakapungtot ti Dios ken Moises idi innalana ti dadduma a dayaw gapu itoy a datdatlag. Anian ngarud a dakdakes pay ti panangidayaw iti sarukodna—maysa nga awan ammona a kayo!