Manipud Managbasatayo

Edukasion iti Sekso Nakapagsuratak tapno sipapasnek nga agyaman kadakayo kadagiti artikulo maipapan iti “Edukasion iti Sekso—Asinot’ Rumbeng a Mangipaay?” (Pebrero 22, 1992) Dua ti annakko ket pulos a diak pay sinarita kadakuada daytoy a banag. Diak pulos inawat ti kasta nga edukasion, ket diak ammo ti ibagak kadakuada wenno kasano nga ibagak dayta. Ngem kalpasan a nabasak dagidiay nga artikulo, kinasaritak a sinaggaysa dagiti ubbing. Makaparagsak a kapadasan dayta, banag a di koma palpalabsen ti naganak.

M. A. P., España

Saan a makapakigtot daytoy nga artikulo ngem nalawag ken nailawlawag a buyogen ti panagraem no kasano a masursuruanmi dagiti annakmi. Agyamanak ti panangtulongyo kaniak a mangapresiar a naliwayak dayta. Inatorkon dagiti bambanag, pagyamanan itoy nagsayaatan nga artikulo.

V. B., Francia

Maysaak a 25 años a babai a nangapresiaren iti panangmatmat ti Biblia maipapan iti seksual a moralidad. Ti makuna a ragsak iti pannakiabig saan a maitutop iti di maliklikan a pannakariribuk ti panunot. Nupay saanakon a maysa nga ubing wenno tin-edyer, mariknak a kasla nakasursuroak kadagiti napapateg a leksion manipud kadagiti artikulo.

S. H., Estados Unidos

Diak pay nakabasbasa ti kas iti dayta iti intero a panagbiagko. Naisangsangayan ta insuroyo no kasano ti mangipaay iti edukasion iti sekso kadagiti ubbing ket, maigiddato iti dayta, tulongan ida a maddaan iti nangato a pagalagadan iti moral.

N. C., Italia

Maysaak nga ina iti dua a tin-edyer a babbai. Nakaragragsak ti pannakisaritak kadakuada maipapan iti amin a benneg iti sekso. Ngem maysaak met nga ina ti dua nga agtutubo a lallaki, agedad iti 11 ken 9. Nupay no naisalaysaykon ti sekso kadakuada iti pangkaaduan a pamay-an, diak naisalaysay dagiti panagbalbaliw ti bagi a mapadasandanto. Dimteng babaen iti koreo ti nagsayaatan a magasinyo itay laeng malem. Matulongannakto dayta a mangtaming nga agpadpada kadagiti annakko a lallaki.

P. W., Australia

Kas maysa nga agtutubo a babai, nagunggonaanak iti kasta unay iti panagbasbasa itoy a magasin. Di ammo dagiti dadakkelko no kasano nga ipaayandakami iti maitutop nga edukasion iti sekso. Babaen iti tulong ni Jehova, naliklikak ti simiasi iti moral a pagalagadan ti Dios. Kaskasdi, inanamaek a daytoy nga artikulo tulonganna dagiti nagannak a di pay nakisarita kadagiti annakda maipapan kadagiti seksual a bambanag.

A. M., Mexico

Ti singasingyo a maibilang a “palimed ti pamilia” ti edukasion iti sekso mabalin di igaggagara nga agbanag a pakarigatan iti dadduma a managbasayo. Dagiti social worker, mannursuro, nars, ken dagiti dadduma a propesional nasanaydan a mangsiput kadagiti pagilasinan iti panangabuso iti ubing. Ti sao a “palimed” no inusar ti maysa nga ubing ket maysa kadagita a pagilasinan, agsipud ta adu kadagiti manangabuso iti sekso ti mangibaga kadagiti ubbing nga ilimedda ti panangabuso.

E. R. N., Estados Unidos

Adun a managbasa ti nangipabigbig iti daytoy kadakami, ket dispensarendakami no nangpataudkami iti panagamak kadagiti managbasa a maseknan iti isyu a panangabuso iti ubing. Patienmi a dayta ket maysa a punto a nagsayaatan ti pannakatamingna. Tapno maliklikan ti mabalin a di pagkinnaawatan, mabalin a nagsayaatan no tukoyen dagiti nagannak dagiti seksual a bambanag a kas “pribado” imbes a “palimed.”—ED.