Nasarakanda Kadi ti Impierno?
NADLAWYO kadi a kasla mapukpukawen ti doktrina nga impierno nga apuy iti nabiit pay? Nalabit a dina malasatan daytoy panawen ti panagduadua a pagbibiagantayo. Wenno nalabit umad-adu a tao ti makabigbig a ti kapanunotan nga agnanayon a panangtutuok kadagiti tao iti apuy ket saan a maitunos iti nalinteg ken naayat a Dios a nailadawan iti Biblia. Aniaman ti gapu iti dida panamati, ipakpakita dagiti panguluen ti relihion ti pannakaupayda. Usigenyo ti maysa a pangarigan.
Idiay Estados Unidos, iti nabiit pay impadamag agpadpada ti maysa a sangapagilian nga istasion ti “Kristiano” a telebision ken maysa a pagiwarnak nga ebanghelikal a nasarakan dagiti sientista ti “impierno” bayat nga agsunsundada idiay Siberia! Naiduma ti pananggupgop ti magasin a Biblical Archaeology Review iti maysa kadagita a salaysay.
Maipagarup a maysa a grupo dagiti sientista a taga Finland ken Norway ti agsunsunda iti daga idiay Siberia kas eksperimento. Nasdaawda unay idi a, sumagmamano a milias iti babada, ti pagsunda nangrugi a nagtayyek iti law-ang! Ad-adda pay a nagsidaawda idi nasarakanda a ti temperatura iti baba ket nasurok a 1,100°C! Ngem kasta unay ti panagsiddaawda idi a nangipababada ti mikropono iti abut ket kalpasanna nakangngegda kadagiti rinibo—nalabit minilion—a timek dagiti tao, amin agik-ikkis nga agrigrigat! Napakigtotan dagiti sientista, kuna ti estoria, ta adut’ nangbaybay-a iti proyekto. Daddumat’ nagsapata a sililimed, ket dadduma ti nakumberte manipud ateismo a nagbalin a “Kristiano” gapu iti daytoy a pammaneknek iti impierno.
Awan duadua, dagidiay a nangiprinta ken nangulit itoy nga estoria kunaenda nga adut’ pammaneknek dayta. Ni Rich Buhler, mangimatmaton iti panagsasarita iti radio, nagsurat iti Christianity Today nga isu ken dagiti kameng ti pabuyana sipsiputanda dagita a report. Iti imbestigasion, napukaw ti maysa a gubuayan kadagiti estoria a naipablaaken a nagadawan kadagiti sursurat a nagadaw met kadagiti awan ti pammaneknekna nga artikulo.
Ti maysa pay a gubuayan ket surat manipud iti lalaki a taga Norway nga, idi napagsaludsodan, sipaprangka nga inaminna a peke ti suratna. Basta impatulodna laeng dayta agsipud ta pagaammona a mapapatinto ken maipablaakto dayta. Awan duadua a nabigbigna ti nakalkaldaang a kinapudno maipapan kadagiti nakaad-adu a relihiuso nga organisasion—patienda ti kayatda a patien.
Iti Hebreo a Kasuratan iti Biblia ti sao nga “impierno” ket naipatarus manipud iti sao a Hebreo a sheol. Daytat’ agparang iti 65 a daras ket iti Authorized King James a bersion ti Biblia naipatarus dayta iti 31 a daras nga “impierno,” 31 a daras a “tanem,” ken 3 a daras nga “abut.” Iti Griego a Kasuratan iti dayta a bersion ti Biblia ti sao nga “impierno” ket naipatarus manipud iti sao a Griego a Hades iti isuamin a sangapulo a panagparangna. Agpadpada ti sheol ken ti hades kaipapananda ti gagangay a tanem ti sangatauan, ket pulos a di mainaig iti rigat wenno pannakatutuok iti apuy wenno iti asinoman nga agnanaed iti sumagmamano a milias iti uneg ti daga idiay Siberia!
[Picture Credit Line iti panid 31]
Picture Book of Devils, Demons and Witchcraft/Ernst and Johanna Lehner/Dover