Maysa a Surat Kada Tatang ken Nanang
KASANO kapateg dagiti naimbag a nagannak? Ti sumaganad a surat manipud iti maysa a nataenganen a lalaki a naiturong iti ina ken amana ipakitana ti kinapategda:
“Patgek a Nanang ken Tatang:
“Nasurok a 16 a tawenen nanipud idi pimmanawak iti pagtaengan, gapuna kasla karkarna ti pannakaawatyo ita itoy a kita iti surat manipud kaniak. Ngem kalpasan ti adu a panangpampanunot mariknak a nasken nga isuratko daytoy. Adu a tawen ti napalabasen, idi pimmanawak iti balayyo, innalak ti adu a bambanag kadakayo a diak pulos impakpakada kadakayo. Mabalin a dikay pay nadnadlaw nga awandan. Kinapudnona, nakasiksikap ti panangalak kadakuada ta diak pay nabigbig nga addada kaniak agingga a napalabas ti sumagmamano a tawen. Imbinsabinsak ida kas iti sumaganad:
“Panagayat iti naimbag: Anian ti panangsalaknib daytoy kaniak!
“Panagayat kadagiti tao: Saan a napateg ti kadakkel, itsura, ken kolor. Ti napateg isu ti kinatao.
“Napudno: Ti kukuak talaga a kukuak, nalabit mabalinko nga iraman kadagiti dadduma. Ti kukua ti maysa kukuana laeng.
“Determinasion: Kadagiti narikut a tiempo, pinagballiginak daytoy.
“Kinaanus: Nakaas-asikayo ken naayat ken naanus kaniak. Dikay pulos simmuko a nangpatanor kaniak.
“Disiplina: Saankay met a nakagubgubsang wenno nakalullulok kaniak. Ngem diak ammo idi dayta. Pakawanendak met laeng kadi?
“Wayawaya: Wayawaya manipud iti rigat a nakapadakkelan dagiti adu a nga ubbing—ti pisikal, mental, ken emosional a rigat nga impaay dagiti manangabuso a nagannak. Dikay pulos pinampanunot ti aniaman no di ti kasayaatan nga agpaay kaniak, ket sinalaknibandak manipud iti pannakadangran. Diakto malipatan ti naaramidanyo.
“Panagayat kadagiti simple a bambanag: Dagiti bantay, karayan, asul a langit, pannagna, panagkampo. Pinagbalinyo a nakaragragsak ti biag. Awanen ti dua a nagannak a manglab-aw iti naaramidanyo. Ket kasla awan aniamanna dayta kadakayo.
“Panagannad: Dikay mamati a dagdagus iti mangngegyo. Ngem no mamatikayo, agtalinaedkay iti dayta, aniaman ti mapasamak.
“Ti Kinapudno Manipud Sao ti Dios: Ti kapapatgan kadagiti amin. Daytat’ tawidko. Awan ti kuarta, bilog, balbalay, wenno sanikua a maipadis iti dayta. Daytat’ mangipaay kaniak iti kapapatgan—biag nga agnanayon.
“Narigat nga ituding ti pateg dagiti naibagan nga immuna a bambanag. Nangina ti pateg dagitoy. Inusarko idan a naimbag. Kayatko nga itultuloy nga usaren ida no di kasapulan nga isublik ida. Inanamaek, no dikay ikedked, nga itultuloy nga ipaay ida kadagiti annakko a lallaki. Ammok a dagitoy gunggonaandanto dagiti annakko kas ti pananggunggonada kaniak. Ket kanayonto nga ipakaammok kadakuada no sadino ti nangalaak kadakuada—manipud ti Lola ken Loloda.
“Toy anakyo,’’
(Naikalikagum a di maibaga ti nagan.)