Pilienyo ti Biag Dita a Baro a Lubong
NALAWAG, adda panggep ti Dios a nangparsua itoy bassit a makaay-ayo a planeta. Ket insaadna ti sangatauan a mangakem iti kangrunaan a paset iti dayta a panggep. (Isaias 45:18) Saan a maidayaw ti Dios iti dakes a nagbanagan ti dagatayo. Ngem mamatikayo kadi a palubosannanto nga agtultuloy daytoy a kasasaad? Talaga a saan!
Ti panagtarigagay ti tao iti maysa a baro a lubong iti kinapudnona ket sungbat iti panagtarigagay iti banag nga inikutan idin ti sangatauan. Daytat’ pudno, makita, naindagaan a paraiso. Naikabil iti kasta a pagtaengan ti umuna a pagassawaan, ken orihinal a panggep ti Namarsua ti panangtagiragsak ti sangatauan iti dayta a Paraiso ditoy daga iti agnanayon.—Genesis 1:28.
Ituktukonen ni Jehova a Dios ti gundaway kadakayo nga agbiag iti baro a lubongna, a sadiay bendisionannanto dagiti matalek a tattao kadagiti tarigagay ti puspusoda. (Salmo 10:17; 27:4) Pilienyonto kadi ti agbiag sadiay?
Agpilikayo
Dagiti Israelitas a nakangeg iti pammakada a palawag ni Moises adda met umasping a panagpilida. Masapul nga agpilida no ti turay ti Dios wenno ti turay dagiti nasion iti daydi a tiempo. Adtoy ti balakad ni Moises: “Inkabilko iti sangom ti biag ken ti patay . . . Piliem ti biag tapno agbiagka, sika ken ti putotmo, babaen iti panagayat ken Jehova a Diosmo, iti panagtungpal iti timekna, ken iti idedekket kenkuana.” (Deuteronomio 30:19, 20) Wen, ti panagpiliyo kaipapananna met ti biag ken ipapatay.
Daytoy ti makagapu no apay a naipablaak dagitoy nga artikulo maipapan iti baro a lubong ti Dios—tapno tignayenna ti pusoyo tapno pilienyo koma dayta imbes a manginanamakayo kadagiti ubbaw a kari dagiti tao a mangbuangay iti maysa a baro a lubong. Adda adu a nakaskasdaaw a bambanag a masapul a maammuanyo maipapan iti baro a lubong ti Dios.
Kas pangarigan, aniat’ adda a pammaneknek nga asidegen daytoy a baro a lubong? Kasano a sukatannanto dagiti amin a gobierno ditoy daga? Ania dagiti pasamak a mangiturong iti daytoy? Kasano a masiguradotayo a pumaysonto ti ikarkari ti Biblia?
Dagiti sungbat dagitoy a saludsod ken adu a dadduma pay ket mabalin a magun-odan. Maragsakanto dagiti Saksi ni Jehova a mangipakita kadakayo kadagiti bersikulo iti mismo a kopiayo ti Biblia a saan laeng a mangdeskribir kadagiti bendision iti baro a lubong ti Dios no di ket ipamatmatda met no kaano ken kasano a mangrugi ti panagturay ti gobierno ti Dios ken kamaudiananna isaknapnanto dayta a turay tapno iturayanna ti intero a daga.
Maparegtakayo nga agtignay a kas kadagiti taga Berea idi umuna a siglo a dimngeg ken apostol Pablo. Nangbusbosda iti tiempo nga “inaldaw a sinuksukimatda a siaannad dagiti Sursurat, no pudno dagitoy a banag.” (Aramid 17:11) Nainsiriban nga aramidenyo met koma ti kasta. Inanamaenyo a ti pannakisaritayo kadagiti Saksi ni Jehova mangyegto iti dakkel a naespirituan a pannakapnek bayat a maammuanyo ti maipapan ti nakaay-ayat a masanguanan nga ikarkari ti Dios kadatayo.
Masapul nga agpilikayo—no agserbikayo iti Dios ken ti pagimbagan ti gobierno ti Pagarianna wenno agtalekkayo ken manginanama iti panangikagumaan ti tao a mangituray iti bagina met laeng. Paregtaendakayo a mangammo iti inggat’ kabaelanyo kadagiti kari ti Dios tapno ti pangngeddengyo ket maibatayto iti pannakaammo. Ti pananggun-od ti pannakaammo iti Biblia saanna laeng a parayrayen ti inanamayo iti masanguanan no di ket tulongannakayto nga agtalinaed a sibibiag iti naespirituan a lumasat iti maudi nga al-aldaw iti turay ti tao.—2 Timoteo 1:13.
Ti adu a tawtawen a panagtarigagay ti tao iti maysa a baro a lubong ket dandani agpatinggan. Tarigagayan dagiti Saksi ni Jehova a maawatkayonto a sumrek iti dayta baro a lubong ken tagiragsaken ti biag iti agnanayon. Dayta met ti kayat ti Dios. Sipapasnek nga inamnamaenmi a pilienyonto ti baro a lubong ti Dios. No aramidenyo dayta, ngarud makitayonto a saan a pulos nga ubbaw ti panagtarigagay ti sangatauan iti maysa a baro a lubong.