Manipud Managbasatayo

Panagsugal Dagiti serieyo a “Panagsugal—Makagunggona Aya?” (Hunio 8, 1992) ket nagsayaat ti panangipakitana kadagiti epekto ti napeklan a panagsugal, ngem dayta saan a natimbeng. Tapno iyilustrar: Dakes ti panagbartek, ngem saan a dakes a mismo ti panaginum. Kasta met, ti panagsugal mabalin a nainkalintegan no daytat’ maaramid a natimbeng. Ti masansan nga agsugal ket saan a sadut wenno agtarigagay iti inaagum a gunggona.

J. R., Estados Unidos

Dikam umanamong a ti masansan a panagsugal mabalin a maipadis iti kalalainganna a panaginum. Ti naud-udi ket saan a kondenaren ti Biblia. Nupay kasta, nalawag ti panangkondenar ti Biblia agpadpada iti kinaagum ken aniaman a pangawis “ti dios iti Naimbag a Gasat.” (Isaias 65:11; 1 Corinto 6:9, 10) Ti maysa a tao nga agsugal uray iti sagpaminsan kaskasdi a mabalin a matignay pay laeng iti inaagum a tarigagay a manggun-od iti maysa a banag a pakalugian dagiti dadduma. Kinapudnona, ipakita ti kapadasan a ti napeklan a panagsugal masansan a mangrugi a gagangay laeng a panagay-ayam. Ngarud nainsiriban a liklikan dagiti Kristiano dagiti amin a kita ti panagsugal.—ED.

Dowsing Kayatko nga iyebkas ti panagyamanko iti nagsayaat nga artikulo a “Dowsing—Sientipiko wenno Okulto?” (Abril 22, 1992) Ni tatangko masansan a nagsalamangka a nangsapul iti danum. Tunggal panaggaraw ti sarukodna ipamatmatna ti maysa a kadapan a kauneg ti gubuayan ti danum. Idi addaak idiay Sud America, nakakitaak kadagita met laeng a dowsing. Nupay kasta, sadiay tunggal panaggaraw ti sarukod ipamatmatna ti maysa a metro. Apay nga adda panagbaliw iti metriko? Nalawag, ti nailemmeng a kinalaing ket nagtaud iti demonio.

W. B., Estados Unidos

Gangannaet Agyamankami kadagiti serie ti “Arayat!—Gangannaetkami.” (Mayo 8, 1992) Tallo a tawen ti napalabasen inkeddengko ti umakar idiay Japan ngem diak nabaelan nga inaramid ti kasta. Kankanayon a nariknak a nasaysayaat koma no immakarak. Nupay kasta, kalpasan a nabasak ti artikuloyo, nabigbigko a saanak a nakasagana, no maipapan iti panangammo iti pagsasao ken kultura.

D. G. A., Brazil

Pinalagipannak ti artikulo iti kapadasak a mismo. Nupay no maysaak a katutubo iti Estados Unidos, sumagmamano a tawen ti napalabasen immakarak iti maysa a lugar nga agkasapulan kadagiti managebanghelio iti dayta a daga. Napadasak ti dadduma kadagiti parikut a mapadpadasan dagiti gangannaet iti pannakibagay. Masapul a makiam-ammoak ket diak idildilig ti baro a pagtaengak iti dinakkelak. Nakaadalak pay iti biag dagiti lokal a mula ken animal. Dakkel a tulong kaniak ti artikulo, ket masiguradok nga adut’ tinignayna a sabsabali.

K. H., Estados Unidos

Di Manamati a Nagannak Pinaregtanak ti artikulo nga “Agimtuod dagiti Agtutubo . . . No Ngay Di Saranayen dagiti Dadakkelko ti Pammatik?” (Enero 8, 1992) Napeklan a managdayaw kadagiti inapo dagiti dadakkelko ket kayatda nga isardengko ti panagbalinko a maysa a Saksi ni Jehova. Masansan a naupayak, ngem idi nakitak dagiti panglukat a sasao ti artikulo, nabigbigko a saan la a sisiak ti adda iti kastoy a kasasaad.

Y. M., Japan

Katoliko dagiti dadakkelko ket didak palubosan a tumabuno kadagiti gimong dagiti Saksi ni Jehova. Namutbutengda pay a papanawendak iti balay. Ngarud naragsakanak idi a maysa a gayyem ti nangitugot iti artikulo idiay eskuelaan tapno basaek. Pinabilegnak nga agtultuloy, ket ita makapagtalekakon nga adda gunggona ti panangikagumaanko.

H. W., Estados Unidos

Dimteng ti artikulo iti maitutop a tiempo. Kas agsolsolo a Saksi ni Jehova iti pamiliak, napadasak dagiti adu a pakasuotan manipud kadagiti dadakkelko. Tinulongannak ti artikuloyo a mangapresiar ti panangsaranay dagiti Kristiano a kakabsat a lallaki ken babbai ket ita tultulongandak a mangsalimetmet iti espiritualidadko.

D. H., Estados Unidos