Ti Panangpapatay idiay Kapeteria ti Luby

TI Mierkoles, Oktubre 16, 1991, nangrugi a kas iti dadduma nga aldaw para kaniak ken iti asawak, ni Paula. Ita, taliawenmi dayta a naiduma iti aniaman nga aldaw a napalabasmin.

Dayta a malem addakami idiay Luby’s Cafeteria idiay Killeen, Texas, idi maysa nga agmauyong a lalaki indungparna ti trakna iti sarming a tawa ket rinugiannan ti pimmaltog. Pinatayna ti 22 ken nasugatanna ti nasurok a 20 a sabsabali pay, kamaudiananna pinaltoganna ti bagina iti ulona. Daytat’ kaaduan ti natay a panangpaltog iti historia ti E.U.

Dakami ken ni Paula ket amin-tiempo a ministro dagiti Saksi ni Jehova, ket simmardengkami idiay Luby’s kalpasan ti ministerio iti agsapa. Nasaksakbay pay agarup 50 kadakami ti nagtitipon iti lugar a paggigimonganmi, ti Kingdom Hall, ket pinagsasaritaanmi ti aramidenmi iti agsapa sakbay ti panangrugimi. Sumagmamano ti nangisingasing nga agtitiponkami idiay Luby’s a mangaldaw, ngem ti amin, malaksid ni Maria, Paula, ken siak binaliwanda dagiti planoda.

Simmangpetkami idiay Luby’s iti alas 12:25 t.m. ket nakiliniakamin iti serving line. Yantangay nakabumbuntog ti linea, ni Maria, nga addaan ikondukta a panagadal ti Biblia iti ala una, inkeddengnan ti pumanaw. Napan idiay kasilias ni Paula. Naimbag laengen ta nagsubli a dagus—iti sumagmamano laeng a segundos kalpasanna, dinungparen ti trak ti tawa a linabsanna.

Ti uni ket kas dagiti tinonelada a pinggan a naitupak. Naipalladaw dagiti sarming, lamisaan, ken tugaw iti sadinoman. Kalpasanna addan kanalbuong. Impagarupko no agba-backfire ti trak. Patien ti dadduma a ti tsuperna nagparikut iti luganna ket napanda tinulongan. Ngem pinaltoganna ida. Adda nagriaw a buyogen ti panagduadua: “Palpaltoganna dagiti tao!” Pimmaltogen sakbay a dimsaag iti trak.

Kasla U ti itsura ti serving line. Ket addakami a mismo iti nagkurbaan ti U. Simmardeng ti trak iti mismo a pangrugian ti U a sadiay ti ayan ti lamisaan ti kahera. Ginuyod ni Paula ti imak a kunkunana: “Rummuarta ditoy.” Ngem ginuyodko nga agpakleb iti suelo. Ti lalaki a pumalpaltog umayen iti serving line, ket pumalpaltog bayat ti iyaadanina. Kabayatan dayta amin a tiempo, agririaw a kunkunana, “Maitutop kadi ti panangirurumen kaniak iti Bell County? Maitutop kadi ti panangirurumen ti Belton kaniak?” Daytoy ket nabalebal-etan iti panagsalawasaw.

Sumagmamano laengen a pie ti kaadayona kadakami, a kankanayon ti panagpaltogna bayat a magmagna. Dikam pulos nakita ti rupana, ngem nakaas-asideg ta mariknami ti panagpigerger ti suelo bayat ti panangtama ti bala. Agpadpadakami ken ni Paula nga agkarkararag a sipapasnek ken Jehova. Nakaiddakami a di agkutkuti; dagidiay agkuti mapaltoganda. Nakaiggemak iti pingil ti asawak, a diak ammo no isut’ nabiag pay wenno natayen.

Kalpasanna nagsanud, a pumalpaltog a kanayon. Immay iti bangir a sikigan ti U a serving line, ket nagsardeng iti asideg dagiti sakak. Pinaltoganna ti babai iti likudak. “Adtoy ti para kenka,” kinunana bayat ti panangpaltogna kenkuana. Sakbay a pimmaltog, kinuna ti babai: “Agturturongen kadatayo.” Mabalin nga intangadna ti ulona.

Nakapigpigsa ti kanalbuong ta pagarupko no natamaanak. Kalpasanna nangngegko ti lalaki a pimmaltog a napan iti kumidor, 15 wenno 20 metro ti kaadayona. Ammok nga iti dayta a lugar adda diding a nakalinged bassit kadakami iti panagkitana. Gapuna bimmangonak kamaudiananna tapno kitaen no nasayaat ti kasasaad ni Paula, ket kasta met ti inaramidna, a kunkunana, “Rummuartan!”

Nagdardaraskami a rimmuar iti makinsango a ruangan, ket agarup walo wenno sangapulo a sabsabali pay ti nangaramid met ti kasta. Maysa a babai a nabuntog a magna ti nagna iti sangomi. Pinilitmi ti nagan-anus nupay no madanagankami. Napankami iti maysa a bakante a lugar a kas iti kadakkel ti tay-ak ti football ket nagkamangkami iti maysa nga apartment iti asideg. Inawaganmi ti maysa a gayyem ket dinawatmi a sabtennakami iti kalsada.

Idi pumampanawkamin iti patakder, nakitami dagiti polis nga umad-adanin manipud iti sabali a direksion. Agsangsangpeten dagiti helicopter a mangilugan kadagiti nasugatan. Agnernerbioskami pay laeng, ta dikam ammo no sadino ti ayan ti lalaki a pumalpaltog. Idi simmangpet ti gayyemmi, nagsangsangit. Nangngegna ti damag iti radio.

Panangibtur kadagiti Epektona

Nagawidkamin, ket nagtultuloy nga immay dagiti gagayyem a nangkita kadakami. Anian a liwliwa ti kaaddada! Iti sumaganad nga agsapa, kas nakaugalianmin, nangrugikami iti ministeriomi iti publiko. Iti dalanmi, gimmatangkami ti diario, ket dagiti report ti nangipalagip kadakami a silalawag iti intero a pasamak. Nabigbigmi a dikam nakasagana a mangsango kadagiti tao iti komunidad, isu a nagawidkamin.

Adu a lawas kalpasanna, pagnerbiosennakami ti iseserrek kadagiti lugar publiko. Naminsan simrekkami iti restauran a paglakuan ti hamburger ket adda maysa a nangpabettak iti balloon. Pudno a pinagnerbiosnakami dayta! Kuna dagiti espesialista ti panagdandanag a ti kasayaatan nga agas dagidiay nakapadas iti napadasanmi a makapadanag a pasamak isut’ panangisaritami a naynay iti dayta. Anian ti panagyamanmi kadagiti isasarungkar dagiti gagayyem bayat dagiti simmaruno nga aldaw, isu a nangipaay kadakami iti gundaway a mangaramid iti daytoy!

Imbaga ti maysa a gayyem ken ni Paula: “Agasannaka ti ministerio.” Agpayso ti imbagana. Nupay nagkedked ni Paula a makikadua iti ministerio iti publiko iti dayta umuna a lawas, dagus nga intuloyna ti ministerio a panagbalaybalay ken nangikondukta kadagiti panagadal ti Biblia kalpasan dayta.

Sigurado nga umiso ti Biblia no kunaenna a ti suminsina addanto parikutna. (Proverbio 18:1) Naammuanmi a dadduma, agraman dagiti tao nga awan met idiay restauran iti dayta nga aldaw, insinada ti bagbagida. Kas banagna, adu a bulbulanen kalpasan ti adu a panangpapatay, mabutengda pay laeng a rummuar iti publiko.

Ti nangnangruna a nangtulong kadakami a nangibtur iti daytoy a kapadasan isu ti pannakaawat kadagiti padto ti Biblia. Naibilang dagiti aldawtayo sigun iti Sao ti Dios a kas “ti maudi nga al-aldaw a narigat a pakilangenan.” (2 Timoteo 3:1) Gapuna, makapaleddaang man a saritaen, dagita a didigra a kas ti adu a panangpapatay idiay Luby’s Cafeteria ket inanamaentayo a mapasamak. Kinapudnona, kinuna ti maysa a mabigbigbig nga eksperto, ni Dr. James A. Fox, a kadagiti sangapulo nga adu a panangpapatay iti historia ti America, walo ti napasamak nanipud 1980.

Kinuna ni Jack Levin, maysa a propesor iti sosiolohia ken kadua nga autor iti libro a Mass Murder, a dagitoy nga adu a panangpapatay iparangarangna ti pannakadadael ti kagimongan ken ti ekonomia. “Ad-adu pay a nataenganen a lallaki ti makarikna a nabaybay-an a di maikankano,” kinunana. “Napukawda ti trabahoda wenno naidiborsioda. Marmarbeken dagiti sistema a mangsupsuportar idi kadakuada, kas ti pamilia ken ti iglesia.” Nalawag a kasta ti kasasaad ti manangpapatay, ti 35-años a ni George J. Hennard, isu a nagtaud iti nasinasina a pamilia ken nabiit pay a napukawna dagiti papelesna a kasapulan tapno agbalin a seaman gapu iti suspetsa a panangabuso ti droga.

Wen, masapul dagiti tao ti naibatay-Biblia a namnama iti nalinteg a baro a lubong nga ikarkari ti Dios. (2 Pedro 3:13; Apocalipsis 21:3, 4) Ti panagtalektayo nga amin dagiti didigra itatta ket agbalinto laengen a nakudrep a lagip ti nangsalimetmet kaniak ken ni Paula agingga daytoy a nariribuk a tiempo. Pudno a liniwliwanakami ti Dios, kas ikari nga aramiden ti Saona. (2 Corinto 1:3, 4)—Kas insalaysay ni Sully Powers.

[Ladawan iti panid 23]

Sukimaten ti polis ti uneg ti Luby’s Cafeteria a sadiay indungpar ti lalaki a pimmaltog ti maysa a trak iti makinsango a tawa

[Credit Line]

Pammadayaw ti Killeen Daily Herald

[Ladawan iti panid 24]

Di nainaganan a babbai iti ruar ti restauran a sadiay ti nangpatayan ti lalaki a pimmaltog iti 23 a tattao agraman ti bagina

[Credit Line]

Pammadayaw ti Killeen Daily Herald

Kaduak ti asawak, ni Paula