Pagrukodan ti Wayawaya
TI UNDP (United Nations Development Program) nangipablaak ti “Pagrukodan ti Natauan a Wayawaya” a mangipakpakita no kasano kaadu ti wayawaya a tinagiragsak dagiti umili ti 88 a nagduduma a pagilian. Sigun kadagiti 40 a kalintegan ken wayawaya a naibasar iti Sangalubongan a Deklarasion ti Wayawaya ti Tao, ti pagrukodan gunggonaanna ti pagilian ti maysa a punto iti kada wayawaya.
Sigun ti The Courier, ti magasin nga impablaak ti Komunidad ti Europa, dadduma kadagiti wayawaya a sinukat ti UNDP ket: ti kalintegan nga agtataripnong ken aglalangen a sitatalna; wayawaya manipud inkapilitan a relihion wenno sursuro iti eskuelaan; wayawaya manipud bukbukod a panagipablaak ti libro; wayawaya a manggun-od ti kabukbukodan a sanikua; ken ti kalintegan a mangalagad iti aniaman a relihion. Naipaay kadi dagiti pagilian dagitoy?
Nupay awan pagilian a nakaalat’ 40 a puntos, dandani naabot ti Sweden ken Denmark ti 38 a puntos, ket maikatlo ti Netherlands ta naabotna ti 37 a puntos. Dagiti pagilian a naudi iti listaan ket nakaalada laeng ti maysa wenno dua a puntos. Ti pagilian a naudi iti listaan ket awan a pulos ti nagun-odanna. Nupay kasta, kasapulan a maipakita, kunat’ report ti UNDP, a “ti Pagrukodan ket mainaig iti kasasaad idi 1985” a nanipud iti dayta ti lubong nagun-odna ti ad-adu pay a wayawaya.
Ti Internationale Samenwerking a magasin a Dutch insuratna a “dagiti napanglaw a pagilian kas ti Costa Rica (maika-18 ti lugarna), Papua New Guinea (maika-20), ken Venezuela (maika-22) nangatngato ti naalada iti daytoy a listaan ngem dagiti pagilian ti Europa nga Irlandia (maika-23) ken ti España (maika-24).”
Ingudo ti damag a, kas pangkaaduan a linteg, adda pagnaigan ti wayawaya ken ti kinarang-ay. Kaaduan kadagiti lugar nga ad-adu ti wayawayada tagtagiragsakenda ti narangrang-ay a kasasaad, idinto ta dagiti lugar a bassit ti wayawayada ket kanayon a mapadagsenanda gaput’ nakurang nga irarang-ay. Kunat’ damag ti UNDP: “Ti wayawaya mangipaay iti gundaway kadagiti tao a mangparang-ay ti kasasaadda ken ti komunidadda iti ekonomia.”
Siempre, ti 40 a wayawaya nga inlista ti UNDP kas matarigagayan a kalat iti kagimongan ti tao dina inraman ti wayawaya manipud iti epekto ti sakit, panaglakay, ken ipapatay. Ti laeng Pagarian ti Dios iti sidong ti Anakna, ni Jesu-Kristo, ti makaipaay kadagita a wayawaya. Ikari ti Biblia a “ti met laeng sangaparsuaan mawayawayaanto iti pannakaadipen ti panagrupsa ket maaddaanda iti nadayag a wayawaya dagiti annak ti Dios.”—Roma 8:21.
[Ladawan iti panid 31]
Ti panangrebba iti Pader ti Berlin ipamatmatna ti dakdakkel a wayawaya idiay Makindaya nga Europa