Tarigagay ni Joshua

IDI Marso 6, 1992, naammuan ti pamilia Wood a ti inaudida, ti pito-ti-tawenna a ni Joshua, addaan nakaro a leukemia, maysa a makapapatay a sakit. Ti manong ni Joshua, agtawen iti 16, ken manangna, agtawen iti 19, ket amin-tiempo a ministro (payunir) dagiti Saksi ni Jehova, a kas met iti amana. Sangapulo ti tawen ti sabali pay a kabsat ni Joshua.

Tapno maagasan ti sakit ni Joshua, narugian a dagus ti kasta unay a chemotherapy. Maysa a dakes nga epektona isut’ napukaw a ganasna a mangan, gapuna kankanayon ti panangpilit ken ni Joshua a mangan. Idi Hulio inkeddeng ti intero a pamilia ti tumabuno iti kumbension distrito dagiti Saksi ni Jehova idiay Lafayette, Louisiana, E.U.A., a saan met nga adayo manipud iti pagtaenganda idiay Winnfield. Idi adda sadiay, kimmaro ti kasasaad ni Joshua, ket idi agsapa ti Sabado naipan iti kuarto nga emerhensia iti maysa a hospital. Kalpasan ti kumbension impan dagiti dadakkelna iti hospital idiay New Orleans, a sadiay kanayon a maag-agasan.

Bayat ti kaadda ti pamilia idiay New Orleans, maysa a social worker ti nangibaga iti ina ni Joshua, ni April, maipapan iti maysa a programa a mangtungpal kadagiti pagayatan dagiti nakaro ti sakitda nga ubbing. Maysa nga aplikasion agpaay iti programa ti naibati ken ni April, ket isu ken ti asawana, ni Paul, sinuratanda dayta. Idi naiyawiden ni Joshua idiay New Orleans idi arinunos ti Agosto agpaay iti binulan a panagpakonsultana, ni Jim, maysa a pannakabagi ti programa, immay nakisarita ken Joshua maipapan iti tarigagayna.

“Kayatko ti mapan idiay Nueva York,” kinuna ni Joshua.

Yantangay masansan a tarigagayan dagiti ubbing ti mapan iti maysa a kita ti parke a paglinglingayan, nagpanunot ni Jim no apay a kayat ni Joshua ti mapan idiay Nueva York. “Kayatko a makita ti Watchtower Society,” insungbat ni Joshua.

“Ania dayta?” inimtuod ni Jim.

“Ammom, sadiay ti pagar-aramidanda kadagiti magasin, Biblia, libro, ken dagiti tract.”

Inlawlawag pay ni April ken Jim maipapan ti hedkuarter dagiti Saksi ni Jehova ken ti trabaho a panagipablaak a maar-aramid sadiay. “Ti kabsatko agbisbisita a mismo idiay itatta,” kinuna ni Joshua, “ket kayatko ti mapan a kaduak ti intero a pamiliak.”

Kalpasan a naammuanna nga adda innem iti pamilia, inimtuod ni Jim ni Joshua no kayatna ti mapan laengen idiay Disney World idiay Florida. Talaga a kayat ni Joshua ti mapan idiay Nueva York. Inlawlawag ni Jim a dina ammo no matungpal ti kalikagumna ngem kayatna a maibanag dayta. Dinamag ni Jim ken ni Joshua ti maikadua a pilina.

“Maysa a kompiuter nga IBM,” insungbat ni Joshua.

Kayat a maammuan ni Jim no “apay nga IBM.”

Imbaga ni Joshua a masapul dayta tapno magun-odanna ti Biblia iti diskette manipud iti Watch Tower Society. (Ammo ni Joshua a ti diskette ti Biblia ket maipaay kadagiti IBM-compatible a kompiuter.) Ngarud inimtuod manen ni Jim: “Talaga kadi a dimo kayat ti mapan idiay Disney World?”

“Wen,” kinuna ni Joshua.

Sumagmamano nga aldaw kalpasanna, nagsubli ni Jim a mangibaga ken Joshua a ti tarigagayna a mapan idiay Nueva York a kadua ti pamiliana ket napatgan. “Ni Josh ket maysa nga ubing a saan unay a magagaran kadagiti bambanag a pagragsakan ti kaaduan a tattao,” inlawlawag ti inana, “ngem magagaranak ken naragsakak!”

Idi Setiembre 30 nageroplano ti pamilia ti Wood manipud New Orleans a napan Siudad ti Nueva York. Awan pay idi ti bimmisita kadagiti pasilidad ti Watchtower malaksid ken ni Buddy, ti inauna a lalaki, nga adda sadiayen sumagmamano a lawas sakbayna. Amin dagiti innem ket nagdagusda idiay Ramada Inn idiay Manhattan, Nueva York, ket mailuganda iti limousine a mapan kadagiti patakder a pagipatulodan, pagimalditan, opisina, ken pagtaengan dagiti Saksi idiay ballasiw ti East River idiay Brooklyn.

Bayat ti dua nga aldaw a kaaddada sadiay, immawat ti pamilia kadagiti maiwanwanwan a panagpasiar kadagiti pasilidad ti hedkuarter. Maysa nga aldaw pinasiarda dagiti patakder ti opisina ken dagiti lima a patakder ti paktoria. Iti sumaganad nga aldaw, binisitada ti 90,000 metro kuadrado a patakder a pagipatulodan, tape duplicating, ken dagiti dadduma pay a pagtrabahuan, agraman dagiti 21 a patakder a pagtaengan a pagdagdagusan dagiti nasurok a tallo ribo a boluntario. Bayat ti panagnaed ti pamilia sadiay, adda naisangsangayan nga urnos a naipaay kadakuada tapno matagiragsakda ti makipangan iti tallo a pannangan a kadua dagiti kameng ti hedkuarter, a manganda iti maysa kadagiti sangapulo a kuarto a panganan.

Idi Oktubre 3 nangarkila ti pamilia iti maysa a kotse ket nagbiaheda iti agarup 160 kilometro a nagpaamianan a mapan bumisita iti Watchtower Farms. Pinasiarda ti dakkel a patakder a pagimalditan sadiay ken nakitada met ti lugar a paggapgapuan ti kaaduan a taraon dagiti kameng ti hedkuarter. Iti malem, binisita ti pamilia ti maibangbangon pay laeng a Watchtower Educational Center, nga adda iti asideg ti Patterson, Nueva York, agarup maysa nga oras a panagbiahe manipud Watchtower Farms, ket kalpasanna nagsublida idiay Nueva York idi rumabiin.

Iti sumaganad nga aldaw impan ida ti limousine idiay Eropuerto ti Kennedy iti Nueva York maipaay iti panagawidda idiay New Orleans. Ti tarigagay ni Joshua a makita “ti lugar a pakaar-aramidan dagiti magasin, Biblia, libro, ken tract” natungpalen. Agyaman unay ti pamilia ti Wood iti urnos a mangtungpal ti tarigagay ti ubing a nadagsen ti sakitna a libre, panagbiahe a makapabileg iti naespirituan.

Sumagmamano a lawas kalpasanna, idi agtengngan ti Nobiembre, idi adda idiay hospital idiay New Orleans maipaay iti binulan a pannakaagasna, naawis ni Joshua a kas maysa a bisita ti nalatak a kumakanta iti pagilian ken iti lumaud a ni Garth Brooks iti maysa kadagiti pabuyana idiay Monroe, Louisiana. Kalpasanna, idi inawis ni Mr. Brooks ni Joshua ken ni tatangna iti likud ti entablado, imparang ni Joshua kenkuana ti maysa a kopia ti katulongan iti panagadal ti Biblia a Mabalinyo ti Agbiag nga Agnanayon iti Paraiso a Daga. Idi kinomusta ni Joshua ti anak ni Mr. Brooks (isut’ addaan iti balasitang), madlaw nga isut’ natignay iti interes ni Joshua.

Talaga a makapabang-ar no maseknan ti maysa nga ubing iti pagimbagan dagiti dadduma, nangnangruna no dagiti pagayatanna iparangarangda ti panaginteres kadagiti naespirituan a bambanag! No matungpal ti tarigagayyo, pilienyo kadi daydiay makagunggona kadakayo ken kadagiti dadduma iti naespirituan?

[Dagiti ladawan iti panid 16, 17]

Ti lugar a binisita ni Joshua ken ti pamiliana

Kannawan: Watchtower Educational Center

Baba: Dagiti opisina ti Watchtower

Kannigid: Patakder idiay 360 Furman a yan ti Shipping Department

Baba: Paktoria

Kannigid: Watchtower Farms ken patakder a pagimalditan