Sabali Manen a Trahedia ti Ekolohia
ADDA pagsasao a nagkuna a di mapasamak ti isu met laeng nga aksidente iti maymaysa a lugar, ngem saan nga agaplikar dayta kadagiti tanker a nagkarga ti krudo. Namindua idi napalabas a 20 a tawen, namulitan ti puerto ti La Coruña idiay amianan a laud nga España babaen ti kasta unay a pannakaibukbok ti krudo.
Idi nakasapsapa pay idi Disiembre 3, 1992, naidungpar ti tanker ti Grecia nga Aegean Sea kadagiti nakatud-aw a batbato iti lugar a nakaisaadan ti La Coruña. Iti sumagmamano laeng nga oras nawara a nagudua ti tanker, ket pito kadagiti siam a tangkena ti simged. Kasta unay a nakapuspuskol nga asuk ti mangilasin iti inawagan ti presidente ti España a ni Felipe González a “maysa a pannakadadael ti ekolohia.”
Aw-awiten ti Aegean Sea ti dandani 80,000 a tonelada a krudo iti North Sea, ket maysa nga aldaw kalpasan ti aksidente, nagwaras ti 50 kilometro kuadrado a krudo kadagiti uppat nga asideg a sabangan. Sangapulo ket innem a tawenen a napalabas, limned ti tanker nga Urquiola iti pagserkan dayta met laeng a pagsangladan, a nangmulit iti kosta iti nasurok a 100,000 a tonelada a krudo.
Malaksid iti kasta unay a pannakadadael dagiti biag iti baybay, nagpeggad manen ti pagsapulan dagiti rinibo a mangngalap, a dadduma ti kaaw-awatda pay laeng ti bayad a naipaay iti napalabas a didigra. Apay a nakaad-adu dagiti aksidente ti tanker? Nupay no nakadaldaleg ti baybay idi rabii ti kaudian nga aksidente, naipagarup a ti biddut ti tao ti kangrunaan a makagapu iti didigra.
Nakalkaldaang, naidungpar ti Aegean Sea 90 metro laeng manipud iti maysa a lighthouse—ti kadaanan a lighthouse iti lubong—ti simbolo ti La Coruña. Dandani dua ribo a tawenen ti napalabas idi imbangon dayta dagiti Romano, isu a makaammo kadagitoy a peggad dagitoy a dandanum iti kosta. Ti agdama a lighthouse, isu a nangitalimeng kadagiti natda nga artifact a Romano, mangisilsilnag pay laeng kadagiti pakdaar a lawagna. Nakalkaldaang, idi rabii ti Disiembre 3, 1992, dayta a pakdaar di naikankano.
[Picture Credit Line iti panid 31]
Foto Blanco