Maysa a Baro nga Eskuelaan Idiay Africa

Babaen ti koresponsal ti Agriingkayo! idiay Nigeria

IDI Hulio 1990 naibasa ti maysa a surat a nangparagsak unay kadagiti nasurok nga 400 a boluntario a Saksi ni Jehova, nga agtataeng ken agtartrabaho iti sanga nga opisina ti Watch Tower Society idiay Igieduma, Nigeria. Addan idiay Africa ti Ministerial Training School, a nairugi idiay Estados Unidos idi 1987, ket maangay idiay Igieduma dagiti kaunaan a klase!

Kadagiti simmaruno a bulan, nagsagana ti pamilia ti Bethel para iti umuna a klase.a Kasapulan dagiti estudiante ken instruktor dagiti pagdagusan. Saan nga umdas dagiti datin a kuarto a pagdagusan dagiti sangaili; kasapulan ti 15 a kanayonan a kuarto. Isu a rinugian a pinagbalin dagiti Saksi dagiti bodega kas napipintas a kuarto. Nairaman ditoy ti panangikabil iti tiles kadagiti kadsaaran, panangpinta kadagiti diding, ken panangikabit kadagiti kurtina. Nangaramid ken nangikabil ti carpenter shop kadagiti katre, aparador, ken tugtugaw. Kamaudiananna, naiserreken dagiti tugaw, pagbasa a silsilaw, ken pagsalansanan ti libro. Napno dagiti pagsalansanan kadagiti nateokratikuan a publikasion.

Kasta met a ti salas ti pamilia ket napagbalin a siled a pagadalan ken libraria para kadagiti estudiante. Maysa kadagiti kuarto ti infirmary ti nagbalin a temporario nga opisina dagiti instruktor a kompleto iti tugtugaw, lamisaaan, ken dadduma pay a kagawaan ti opisina. Kabayatanna, idi a ti damag nga adda eskuelaan a maangay ket naipakaammon iti intero a pagilian kadagiti kumbension ken asamblea dagiti Saksi ni Jehova, nangrugi a nagsangpet ti ginasut nga aplikasion manipud kadagiti agngayangay nga ageskuela.

Idi pagserrek ti umuna a lawas ti Pebrero 1992, nakasaganan ti amin. Simmangpet ti dua nga instruktor, da Michael Purbrick ken ni Peter Nicholls, manipud Britania tapno isuro ti umuna a klase. Kanayonan dagiti 22 nga estudiante, immay met ti tallo a mainanama a mangisuro, da Isaiah Mnwe, Isaiah Olabode, ken Pius Oparaocha. Taga Nigeria dagitoy a Saksi a nasanay a mangisuro kadagiti sumaganad a klase.

Panggep ti Eskuelaan

Iti intero a Bethel, adda panagsegga ken kinaragsak. Apay? Gapu iti makagunggona nga epekto ti eskuelaan iti panangaramid-adalan idiay Nigeria. Nabayagen nga impadto ni Jehova a mangipaayto iti “sagsagut iti tengnga dagiti tattao.” (Salmo 68:18) Inaramidna daytoy idi panawen dagiti apostol, kas insurat ni apostol Pablo idiay Efeso 4:8-11. Ita, mangipapaay met ni Jehova iti sagsagut kadagiti tattao. Ti Ministerial Training School ket maysa a naayat a probision tapno makabalan dagitoy a lallaki a mangibaklay kadagiti kanayonan a responsabilidad iti organisasion.

Iti pagilian, adda nasurok a 160,000 a Saksi iti nasurok a 3,000 a kongregasion. Dadduma kadagitoy a kongregasion ti addaan maysa wenno dua laeng a panglakayen ken sumagmamano a ministerial nga adipen. Addaan nalalawa a teritoria ti dadduma a kongregasion a sadiay saan unay a maisaksaknap ti naimbag a damag. Gapuna, kasapulan unay dagiti makabael a lallaki saan laeng nga iti trabaho a panangidaulo iti panagebanghelio no di ket iti panangipastor met iti arban ken panangisuro kadagiti kongregasion.

Ti panggep ti Ministerial Training School ket tapno sanayen dagiti kakabsat a lallaki a mangaywan kadagitoy nga annongen. Kalpasan ti panagraduarda, dadduma nga estudiante ti agserbin kas espesial a payunir wenno agdaldaliasat a manangaywan, benneg ti serbisio a kasapulan unay idiay Nigeria. Daddumat’ agsubli kadagiti kongregasionda tapno tumulong ken mangparegta kadagiti lokal a kakabsat. Anian a bendision dagitoy a makabael unay a lallaki kadagiti kongregasion a pagserbianda!

Naisangsangayan a Panagsanay

Nupay ti Ministerial Training School ket maysa a kanayonan ti Watchtower Bible School of Gilead, a mangsansanay kadagiti misionero iti ganggannaet a serbisio, ti kurikulumna ket naisangsangayan. Bayat ti walo a lawas a panageskuela, sigaganetget nga adalen dagiti estudiante ti Biblia. Siaannad nga usigenda ti adu nga isursuro ti Biblia, agraman ti pammalakad iti trabaho a panangipastor ken dagiti pagalagadan no mataming dagiti parikut ti Nakristianuan a panagbiag. Adalenda met ti isursuro ti Kasuratan maipapan kadagiti administratibo, hudisial, ken organisasional a banag. Umawatda iti nainget a panagsanay kas pumapalawag iti publiko ken personal nga atension kadagiti naayat nga instruktorda, a tumulong iti naespirituan nga irarang-ayda.

Kas pakagupgopanna, awaten ti kadawyan nga estudiante ti 45 a classroom assignment, ket magunggonaan manipud ti 256 nga oras a pannakaisuro iti klase. Kanayonanna, mangbusbos iti 140 nga oras a mangaramid iti homework-na ken 14 nga oras a panageksamin.

Nupay ti Biblia ti kangrunaan a libro a mausar, makiddaw kadagiti estudiante nga itugotda dagiti bukodda a kopia ti 16 a dadduma pay a libro, dagiti katulongan iti panagadal ti Biblia nga impablaak ti Watch Tower Society. Kabayatan ti panageskuela, agsirarak a naimbag dagiti estudiante iti dadduma a publikasion a magun-odan iti kompleto a libraria ti Bethel. Isu a nalawag a masapul a nalaingda nga agbasa.

Malaksid iti schoolwork-da, agtrabaho dagiti estudiante iti 45 a minuto iti kada aldaw iti maysa kadagiti walo a departamento ti Bethel: panagdalus, siled a panganan, panangmantinir iti aglawlaw, housekeeping, kusina, paglabaan, pagipaktoraan, ken trucking. Agririnnilieboda iti trabaho tapno inton arinunos ti walo a lawas a panageskuela, tunggal maysa napadasannan ti agtrabaho kadagitoy amin a departamento. Kinuna ti maysa nga estudiante: “Ti panagtrabahok iti nadumaduma a departamento ti nangipaawat kaniak a ni Jehova ti superbisor iti trabaho.” Kinuna pay ti sabali: “Dagiti manangaywan [iti kada departamento] ket sidadaan a mangisuro ken mangkorehir buyogen ti ayat.” Ket inkomento pay ti sabali: “Ti trabaho ti Bethel ket trabaho a masapul a mapadasan ti tunggal maysa ket mananamna a naimbag dayta.”

Aniat’ makuna dagiti kakabsat iti inawatda a pannakasanay? Kinuna ti maysa: “[Daytat’] kasayaatan kadagiti amin nga eskuelaan.” Naimpusuan a kinuna pay ti maysa: “Anian a nagsayaat unay nga urnos!” Buyogen ti puspuso a napnot’ rag-o ken panangapresiar, insurat dagiti estudiante ti umuna a klase: “Ti pangngeddengmi ket . . . ipamaysa ti biagmi iti mensahe ti naimbag a damag.”

Dagiti Komento Manipud Tay-ak

Bayat ti Pebrero inggat’ Hunio ti 1992 ken 1993, naangay dagiti umuna nga uppat a klase ti Ministerial Training School idiay Nigeria. Iti maysa a surat ti panangapresiar a naiturong iti Bagi a Manarawidwid, kinuna dagiti estudiante ti maikadua a klase: “Pudno unay, dikam pay nakatabuno iti aniaman nga eskuelaan a nasaysayaat ngem iti daytoy. Adayo a nasaysayaat ti kurso ngem ti programa ti unibersidad. Naawatanmi a nalakakam laeng nga umannugot ken William Phelps a ‘ti pannakaammo iti Biblia uray awan ti kurso ti kolehio ket naim-imbag ngem ti kurso ti kolehio nga awanan [pannakaammo iti] Biblia.’ Kadagitoy amin, nabatad ti napudno a pannakaseknanyo kadakami. Isu a determinadokami a pagbalinen ti amin-tiempo a trabaho kas karerami.”

Kasanot’ pannakaabrasa dagiti nagraduar kadagiti kabbaro a nakaibaonanda? Insurat ti maysa nga agdaldaliasat a manangaywan maipapan iti dua a nagraduar iti umuna a klase nga agserserbin kas espesial a payunir: “Makaay-ayo, makaparegta, makaparagsak, ken nabagasen dagiti gimong. Rumangrang-ay dagiti aktibidad iti tay-ak ti panagserbi . . . Aglaplapusanan ti rag-o ti kongregasion . . . Idi kinapatangko ti dadduma a kakabsat maipapan ti magapgapuanan dagitoy nga espesial a payunir, uray la a nakalua gaput’ rag-o ti mangidaulo a manangaywan a nagkuna: ‘Agyamankam ken Jehova ken ti organisasionna iti panangibaonna kadagiti nalaing ken epektibo a katulongan ti kongregasionmi.’”

Asino Dagiti Makualipikar?

Ti itatabuno iti Ministerial Training School iti sadinoman a pagilian ket maysa a naisangsangayan a pribilehio ti serbisio, maysa a nakaskasdaaw a bendision manipud ken Jehova. Talaga a daytoy a panagsanay ti tumulong kadagiti estudiante a parayrayen ti kasasaadda kas naespirituan a lallaki ken mangkabal kadakuada nga ad-adda nga agpaibaon ken Jehova.

Isu a nalawag a nangato dagiti pagalagadan. Tapno makualipikar, dagiti agngayangay ket masapul a papanglakayen wenno ministerial nga adipen iti kongregasion Kristiano iti aganay a duan a tawen. Maipangpangruna dagiti regular payunir. Masapul nga amin ket di kasado ken 23 inggat’ 50 ti tawenda. Masapul a saanda a nababalaw wenno nailaksid iti napalabas a lima a tawen. Dagiti agngayangay ket masapul a kabaelanda ti agbasa, agsurat, ken agsao a sitatandas iti Ingles, ket rumbeng a nasalun-atda, a saanda a kasapulan ti espesial a panangaywan wenno taraon.

Kangrunaan iti amin, dagidiay nga agboluntario ket masapul a sisasagana, situtulok, ken kabaelanda ti agserbi sadinoman ti pakasapulan. Saan laeng a sapulen daytoy ti nasged a tarigagay a mangaramid iti pagayatan ti Dios no di ket ti espiritu met ni Isaias, a situtulok a nangipaay iti bagina iti maysa nga espesial a trabaho, a kinunana: “Adtoyak! Ibaonnak.”​—Isaias 6:8.

Addaankay met kadi ti umasping nga espiritu? Addakay kadi iti kasasaad a gumaw-at iti daytoy a pribilehio ti serbisio? Dagidiay nangaramid iti dayta dida pulos nagbabawi. Insurat ti maysa a nagraduar iti eskuelaan nga agserserbi itan kas manangaywan ti sirkito: “Para kaniak, ti Ministerial Training School ket maysa a sagut nga awan pakaiyaspinganna. Nagbalin dayta a kasayaatan a paset ti naespirituan a biagko. No maaddaanak iti gundaway nga agbiag manen, diak pulos mangpili pay iti sabali a wagas ti panagbiag.”

[Footnote]

[Dagiti ladawan iti panid 16, 17]

Dagiti instruktor a da Isaiah Mnwe ken Pius Oparaocha

Panangisuro iti klase

Panagsasarita ti grupo iti siled a pagadalan

Panagsirarak idiay libraria

[Dagiti ladawan iti panid 18]

Panagtrabaho idiay Paglabaan ken idiay Departamento a Pagipaktoraan