Ti Panangmatmat ti Biblia

Talaga Kadi a Kasapulantayo Dagiti Papadi?

“AGYAMANKAYO gapu iti parabur ti Kinapadi,” kinuna ni Juan Paulo II iti tinawen a suratna kadagiti papadi idi “Huebes Santo,” 1992. Malaksid kadagiti Katoliko, adu pay ti nakabigbig kadagiti bukodda a biddut. Naamirisda a kasapulanda ti maysa a makaay-ayo iti Dios a mangibaga kadakuada iti pagayatan ti Dios, a mangidiaya Kenkuana iti maysa a daton, ken mangibabaet kadakuada iti Dios. Ti kasta a tao ket maawagan padi. Talaga kadi a kasapulantayo ti padi tapno tumulong kadatayo a manggun-od ti pammakawan ti Dios?

Saan a nagtaud iti tao ti kapanunotan maipapan kadagiti papadi ken daton no di ket nagtaud iti Dios. No awan dagiti basol maibusor iti Dios, saan koma a kasapulan dagiti papadi. Idiay Eden, saan a kasapulan ni perpekto nga Adan ti padi. Isut’ naparsua nga awanan-basol.​—Genesis 2:7, 8; Eclesiastes 7:29.

Asino Dagiti Immuna a Papadi?

Amintayo ita ti nakatawid iti kinamanagbasol gapu ta inggagara ni Adan ti nagbasol ket datayo dagiti annakna. (Roma 3:23) Nabigbig daytoy ni Abel, ti anak ti immuna a tao a ni Adan. Kunaen ti Biblia maipapan kenkuana: “Gapu iti pammati ni Abel indiayana iti Dios ti maysa a daton.” (Hebreo 11:4) Nupay ni Abel ken dadduma a lallaki ti pammati idi ugma​—kas ken Noe, Abraham, ken Job​—ket saan a naawagan a papadi, nangidiayada kadagiti daton iti Dios para kadakuada wenno dagiti pamiliada. Kas pangarigan, kunaen ti Biblia maipapan ken Job ken dagiti annakna: “[Ni Job] nangipaay kadagiti daton a mapuoran kas mayalubog iti bilangda amin; ta, ni Job kinunana, ‘mabalin a nagbasol dagiti annakko a lallaki.’” (Job 1:5) Kasano ngarud a dagiti papadi ken daton ket nagbalin a kadawyan iti nakaad-adu a kultura?

Usigenyo dagiti kasasaad iti aglikmut ti patriarka idi ugma a ni Noe. Ni la Noe ken ti pamiliana ti tattao a naispal idi sangalubongan a Delubio. Idi dimsaagdan iti maysa a nadalusan a daga, nangbangon ni Noe iti maysa nga altar ket nangidiaya kadagiti daton kas panangapresiarna iti asi ken panangispal ni Jehova. Yantangay amin a nasion ket kapuonan ni Noe, nalawag a sinurotda ti padronna ket idi agangay nangpartuatda iti nadumaduma a tradision a mainaig kadagiti mangibabaet ken daton para kadagiti basol.​—Genesis 10:32.

Nasurok a maysa a siglo kalpasanna, rimsua ti maysa nga iyaalsa maibusor iti Dios idiay siudad ti Babel. Riniribuk ti Dios ti pagsasao dagiti tao ket nawarawarada. (Genesis 11:1-9) Dadduma a papadi, nga itan ket mangitantandudo iti tiritir ken nalulok a doktrina, nangpartuatda kadagiti nakaap-aprang a ritual iti dagdaga a nakaiwarasanda. Kaskasdi, nakita ti Dios a masapul a masursuruan dagiti managdaydayawna maipapan iti pannakasapulda iti pudpudno a kinapadi nga addaan nangato a padi, nababbaba a papadi, ken daton a makaay-ayo kenkuana.

No Apay a Nangdutok ti Dios Kadagiti Papadi

Idi agangay nangipaay ni Jehova iti nasion ti Israel kadagiti papadi a nagakem iti dua a kangrunaan nga annongen. Umuna, inrepresentarda dagiti umili iti Dios kas uk-ukom ken mannursuro iti Linteg ti Dios. (Deuteronomio 17:8, 9; Malakias 2:7) Maikadua, inrepresentarda ti umili iti Dios babaen ti panangidiayada kenkuana kadagiti daton iti biang dagiti umili. Ilawlawag ti surat ni Pablo kadagiti Hebreo a Kristiano: “Ta isuamin a kangatuan a padi, a mapili kadagiti tattao, matudingan a maipaay kadagiti tattao kadagiti banag a maipanggep iti Dios, tapno mangidiaya kadagiti sagut ken kasta met dagiti daton gapu kadagiti basol. . . . Ket awan koma ti maysa a tao a mangakem itoy a dayaw no di inayaban ti Dios.”​—Hebreo 5:1, 4.

Intuloy nga inlawlawag ni Pablo a ti kinapadi iti Israel ket saan nga isu ti maudi a pamay-an ti Dios a maikappia dagiti tattao Kenkuana. Dagiti annongen dagiti papadi ket simbolo a mangitudo kadagiti nasaysayaat a banag, “dagiti nailangitan a banag.” (Hebreo 8:5) Apaman a dumtengen dagiti nailangitan a banag, saanen a kasapulan dagiti simbolo. Tapno iyilustrar: Mabalin nga ik-ikutanyo ti advertisement ti maysa a produkto a kasapulanyo unay, ngem diyo kadi ibelleng dayta apaman a nagun-odanyon ti produkto?

Sakbay a timmaud ti nasion ti Israel, pinanggep ti Dios ti maysa a kinapadi nga agserbi a pakagunggonaan ti intero a sangatauan, saan laeng a ti Israel. Idi damo, naikkan ti Israel ti pribilehio nga agbalin a kameng dayta a kinapadi. Idi nabuangay ti nasion, kinuna ni Jehova iti Israel: “No umannugotkayo a napaypayso iti saok . . . , dakayonto kaniak ti maysa a pagarian dagiti papadi ken maysa a nasantuan a nasion.” (Exodo 19:5, 6; idiligyo ti Genesis 22:18.) Nakalkaldaang, mammano nga impangag ti nasion ti timek ti Dios. Gapuna, kinuna ni Jesus kadagiti papadi ken Fariseo: “Ti pagarian ti Dios maikkatto kadakayo, ket maitedto iti maysa a nasion, a mangpataud kadagiti bungana.” Asino ita dagiti agserserbi kas papadi agpaay a pakagunggonaan ti sangatauan?​—Mateo 21:43.

Ania a Kinapadi ti Kasapulan Dagiti Kristiano?

Gapu ta natawidtayo ti basol manipud ken Adan, posible laeng ti pannakaisalakan nga agturong iti agnanayon a biag babaen ti perpekto a daton nga impaay ni Jesus. (1 Juan 2:2) Ni Jesus a mismo ti mangibabaet kadatayo kas Nangato a Padi, kas inladawan ti kinapadi ti Israel. Kunaen ti Hebreo 9:24: “Ta saan a simrek ni Kristo iti maysa a nasantuan a disso nga inaramid ti ima nga isu ti kaasping ti napudno, no di ket idiay langit met laeng tapno agparang ita iti sanguanan ti Dios gapu kadatayo.” Gapuna, ti awan kaaspingna a kinatan-ok ti nangato a kinapadi ni Kristo ti namagbalin a saanen a kasapulan dagiti tattao a papadi kas mangibabaet. Kaskasdi, kasapulan pay laeng ti serbisio dagiti nababbaba a papadi. Iti ania a pamay-an?

Masapul a “mangidiaya [dagiti papadi] kadagiti daton a makaay-ayo iti Dios babaen ken Jesu-Kristo.” (1 Pedro 2:5) No maipapan ti kita dagitoy a daton, insurat ni Pablo: “Idatontayo a kankanayon iti Dios ti daton ti panagdaydayaw, kayatna a sawen, ti agaon kadagiti bibig.” (Hebreo 13:15) Gapuna, dagidiay mangbukel iti naarian a kinapadi, bayat nga addada ditoy daga, irepresentarda ti Dios kadagiti tattao kas dagiti Saksina, saan a kas mangibabaet. Inton agangay, idiay langit a kaduadanto ni Jesu-Kristo, irepresentardanto dagiti tao iti saklang ti Dios, nga ipaaydan dagiti gunggona ti daton ni Kristo ken isayangkatda ti pannakaagas dagiti amin a sakit.​—Idiligyo ti Marcos 2:9-12.

Nupay masapul a mangasaba amin a manamati, bassit laeng dagiti agserbi iti nailangitan a “pagarian dagiti papadi.” Kinuna ni Jesus: “Dikay agbuteng, bassit nga ipastoran, ta nagayatan ni Amayo nga ited kadakayo ti pagarian.” (Lucas 12:32; Apocalipsis 14:1) Mapagungardanto idiay langit ket “isudanto dagiti papadi ti Dios ken ni Kristo, ket makipagaridanto kenkuana bayat ti sangaribo a tawen.”​—Apocalipsis 20:6.

Inyurnos ti Dios a dagitoy a nailangitan a papadi aramidenda agpadpada iti naespirituan ken pisikal ti saan pay a pulos a naaramidan ti aniaman a kinapadi. Din agbayag, bayat nga ipakatda ti gunggona ti subbot a daton ni Jesus, makiramandanto iti pannakaisubli amin a manamati a sangatauan iti natauan a kinaperpekto. Ket maaddaanton ti nakaskasdaaw a pannakatungpal ti Isaias 33:24. Kunana: “Ket ti agtaeng dinanto kunaen: ‘Masakitak.’ Dagiti umili nga agtaeng sadiay mapakawanto ti kinadangkesda.”

[Picture Credit Line iti panid 26]

“Benediction of the Wheat at Artois” 1857, ni Jules Breton: France/Giraudon/Art Resource, N.Y.