“Saankami a Mapapaidaman!”
Kunaen dagiti mannursuro ken dagiti dadduma a tattao a dagiti annak dagiti Saksi ni Jehova mapapaidamanda babaen ti saanda a pannakiraman iti ragragsak kadagiti selebrasion ti eskuelaan a kas ti Krismas, Easter, ken Halloween. Dagiti sumaganad ket bassit a pangarigan dagiti komento dagiti annak dagiti Saksi ni Jehova, nga inyebkasda babaen iti surat no apay nga isuda a mismo agkedkedda a makipaset iti aniaman a panangrambak kadagitoy a piesta.
“NUPAY inlawlawagkon kadagiti kaeskuelaak no apay a diak selebraran dagitoy a banag, mariknada pay laeng a mapapaidamanak. Ngem saanak a mapapaidaman! Kitaenyo, masapul nga agurayda pay laeng agingga iti Krismasda wenno dadduma a piesta sakbay a makagun-odda kadagiti regalo, ngem maikkanak kadagiti regalo ken mapanak kadagiti padaya iti isuamin a tiempo ti tawen. Ammok nga ay-ayatendak saan laeng a ti pamiliak no di ket ti kongregasion ken kasta met ni Jehova, ket ad-adda a naisangsangayan dayta kaniak ngem ti aniaman a piesta.”—Becky, agtawen iti 13.
“Ammok nga amin a piesta adda dakes a nagtaudanda. Saan a naipasngay ni Jesus iti Krismas. Saan a masapul a mangaramid ti pamiliak iti aniaman a mangsukat kadagita a piesta. Kanayon a mapangnamnamaak ti pamiliak a tumulong kaniak no kasapulak ida. Napatpateg dayta kaniak ngem ti aniaman a regalo a maipaayda kaniak.”—Josh, agtawen iti 15.
“Krismas. Diak mapapaidaman gapu ta daytat’ saan met a talaga a Nakristianuan. Naim-imbag a maammuak a regregaluandak dagiti dadakkelko ngem ti misterioso a persona a maawagan Santa. Easter. Talaga a makapaupay ti Easter gapu ta dagiti tattao kunaenda a daytat’ agpaay ken ‘Jesus ken ti panagungar’ wenno daytat’ ‘panagsapul [laeng] kadagiti itlog.’ Ngem ania ngay ti pakaipadisan dagiti itlog ken Jesus? Uray pay ti nagan nga Easter agtaud iti maysa a diosa idi ugma. Halloween. Ti kangrunaan a kapanunotan iti Halloween di makaawis a pulos kaniak. Dagiti al-alia ken mangkukulam, YUCK!”—Katie, agtawen iti 10.
“Kas agtutubo diak pulos narikna a malidayak gapu ta mailiwak kadagiti nailubongan a selebrasion dagiti piesta. Di imbagbaga dagiti nagannakko kaniak a ‘dika maaramid daytoy wenno dayta agsipud ta maysaka a Saksi ni Jehova,’ no di ket pamiliarak iti Biblia ken kadagiti panangmatmat ni Jehova kadagitoy a piesta. No maipapan kadagiti regalo, idiay balaymi, ti panangited kadagiti regalo ket iti intero a tawen.”—Ryan, agtawen iti 17.
“Tunggal piesta selselebraranna ti ulbod a banag ken naisentro kadagiti ulbod a banag. Kaaduan nga ubbing nga am-ammok selebraranda dagiti piesta gapu kadagiti kendi wenno regalo. Ti adda kaniak a nasaysayaat ngem dagiti piesta isu ti nagsayaat nga organisasion dagiti Saksi ni Jehova. Imbes nga agpaut iti maysa nga aldaw, kas iti piesta, ti Sao ni Jehova a Dios addaan iti naragsak a mensahe nga agpaut iti agnanayon.”—Brooke, agtawen iti 14.
“Dagiti rason no apay a diak mailiw kadagiti piesta: 1. Kunaen ti Biblia a dakesda. 2. Diak ikankano ida. 3. Ik-ikkandak da mommy ken daddyk kadagiti regalo.”—Brandi, agtawen iti 6.
“Diak marikna a mapapaidamanak. Awan aniamanna kaniak ti diak panangrambak kadagiti piesta. Makagunggun-odak kadagiti regalo, ket agay-ayamkami ken tumabuno kadagiti padaya. Makagun-odak kadagiti adu a bambanag uray awan dagiti piesta. Kayatko ti agtalinaed a Saksi aniaman ti aramidek ket awan ti makalapped kaniak.”—Brianne, agtawen iti 9.
“Sumrekakton iti maika-lima a grado ket diak naliday a mangamin a maysaak a Saksi ni Jehova. Naminsan kinuna kaniak ti maysa a barito a kaasiak met ta awan ti magun-odak a regalo iti tiempo ti Krismas, ngem kinunak a makagunggun-odak kadagiti regalo iti intero a tawen. Kalpasanna kinunana a nasaysayaat ti kasasaadko. Rumbeng nga awan koma ti Saksi ni Jehova a makarikna a nakapimpiman gapu ta isu ket maysa a Saksi ni Jehova.”—Jeff, agtawen iti 10.
“Dakam iti kabsatko a babai pinagbalinmi ti panangrambak iti anibersario dagiti dadakkelmi a piesta ti pamiliami. Makagun-odak ti kadakkelan a rag-o babaen ti panagplano kadagiti regalo ken kard ken dagiti bambanag ken tulongak dagiti dadakkelko nga agplano kadagiti banag a mangsorpresa iti maysa ken maysa ngem ti pananggun-odko kadagiti regalo manipud iti asinoman. Nasaysayaat ti mangted ngem ti umawat.”—Rachel, agtawen iti 16.
“Idi ubingak pay, makapaupay kaniak ti dadduma a piesta. Ngem kamaudiananna nabigbigko a dagiti piesta ti pakaigapuan iti kinaagum, panagsususik, ken kinaliday. No adda naikeddeng a tiempo iti pannangted, dikay pulos masdaaw a masagutan. Kaykayatko ti umawat kadagiti naisangsangayan a regalo iti aniaman a tiempo ti tawen. Ti panangrambak wenno saan a panangrambak ket bassit laeng a paset ti napatpateg a pangngeddeng: ti panangidedikar wenno saan a panangidedikar iti bagim nga agserbi ken Jehova. Idi pinanunotko dayta, nalawag ti umiso a pili.”—Ben, agtawen iti 13.
“Addada tiempo idi bassitak pay a mariknak a kasla mapapaidamanak iti banag a tartarigagayak, ngem makakatawaakon no panunotek no kasano a dagiti itlog, ni Jesus, ken ti koneho ti Easter ket agkakanaigda. Idi dakkelakon ket inlawlawag dagiti dadakkelko no kasano a timmaud amin dagiti simbolo, makarimonen dagita. Maupayak a mangpanunot no kasano ti rikna ni Jehova ken ni Jesus iti pannakainaigda kadagita a pagano a kapanunotan.”—Alexa, agtawen iti 18.
“No dandanin ti Krismas, makaupay ti kaadda idiay eskuelaan ket mariknam a maipupueraka. Kalpasanna nabigbigko a ti panangrambak iti Krismas dina masolbar dagiti parikutmo, dina pasingeden ti pamiliam, ket dinaka paragsaken. Maaramidmo laeng daytoy babaen ti panagbiag a maitunos kadagiti pagalagadan ti Biblia.”—Joe, agtawen iti 15.
“Imbes a rambakanmi ti Krismas wenno dadduma pay a piesta, rambakanmi ti Aldaw Dagiti Dadakkel nga Ay-ayam. Umawatkami iti regalo a kuarta nga igatangmi ti aniaman a magustuanmi. Maysa a tawen nangtedak ti palawag iti klasek maipapan iti relihionko. Imbes a sinurotko ti dalan ti lubong, nangipasdekak iti bukodko a dalan babaen ti itatabunok kadagiti gimong, ipapan iti tay-ak ti pangasabaan, ken agkararag kas paset ti panagbiagko. Agpabautisarakon inton sumaganad nga asamblea.”—George, agtawen iti 11.
“Pagay-ayatko ti umawat kadagiti regalo, ket awatek ida iti intero a tawen. Diak unay mailiw kadagiti padaya. Parparagsakek ni Jehova no itandudok ti kinapudno. Nakaay-ayat a makita a dadduma kadagiti kaklasek a saan a Kristiano, a dagitoy ket Hindu, Judio, ken dadduma pay, selebraranda ti Krismas ket umawatda kadagiti regalo ngem dida ammo no ania ti panggep dayta a piesta.”—Julia, agtawen iti 12.
“No awanak kadagiti piesta ti eskuelaan diak agbabawi. Agaramid dagiti ubbing iti adu a di umno a bambanag, kas ti panagkawes a kas iti Halloween. Diak pulos segseggaan dayta. Ibagak kadakuada nga igatgatangandak dagiti dadakkelko kadagiti bambanag iti intero a tawen. Ibagada met ti maipapan iti relihionda ken no kasano a makauma dayta, ket ibagak kadakuada maipapan kadagiti gimong a sagpaminsan nga ang-angayenmi iti parke, ket no dadduma umapalda. Ngem diak umapal kadakuada. No gupgopen, makunak a makigayyemkayo laeng kadagidiay a mangraem iti pammatiyo ket dikay palubosan ti maysa nga estudiante wenno mannursuro a mangpilit kadakayo a mangaramid iti aniaman a maibusor iti pagayatan ni Jehova.”—Justin, agtawen iti 12.
“Mariknak aya a mapapaidamanak? Saan, gapu ta addaankami kadagiti sabali pay a padaya, ken no agrambak dagiti tattao iti Krismas, pampanunoten laeng dagiti ubbing ni Santa Claus, wenno iti Easter pampanunotenda ti koneho ti Easter, ngem ammok a dagita ket nagtaud kadagiti pagano a relihion. Kaykayatko ti agserbi iti tay-ak agsipud ta tulongannak dayta a mangipamaysa iti kinapudno.”—Sharon, agtawen iti 8.
“Sipapasnek a makunak a kontentoak kas maysa a Saksi ni Jehova. Adut’ pakaragsakan ti pamiliami. No adda dagiti padaya idiay eskuelaan mangaldawkam ken nanangko iti ruar. Mangted dagiti dadakkelko kadagiti regalo idiay eskuelaan uray awan ti naisangsangayan a rambak ket ammo dagiti ubbing nga adda pagraragsakanmi. Nasingedak unay kadagiti dadakkelko ket no imtuoden dagiti ubbing no apay a diak agrambak kadagiti piesta ibagak kadakuada nga inaldaw nga agramrambakkami. Kasano a marikna ti asinoman a Saksi a kasla maikapkapis?”—Megan, agtawen iti 13.
“Halloween. Dagiti ubbing nga agkawes kas diablo, dagiti karakter manipud iti komiks—agpaay iti ania? Agsawar dagiti ubbing kadagiti kalsada a mapan kadagiti binalaybalay nga agdawat kadagiti sinupotsupot a kendi. Wenno ibarsakda dagiti itlog kadagiti balay, nga arkosanda kadagiti papel de banio dagiti kaykayo, ket ti dakesna kaaduan a nagannak anamonganda dayta.”—Zachary, agtawen iti 10.
“Diakon aguray iti naisangsangayan nga aldaw tapno umawatak kadagiti regalo. Iyalaandak da nanang ken tatangko kadagiti adu nga ay-ayam iti amin a tiempo. Ti Halloween ket panagdayaw kadagiti espiritu dagiti natay. Saan nga umiso dayta. Ti laeng Dios a rumbeng a dayawentayo isu ni Jehova.”—Nicholas, agtawen iti 6.