Apay a Di Marungdo ti Tengnged Dagiti Woodpecker?
NAKANGNGEGKAYO kadin iti maysa a woodpecker a mangab-abut iti kayo? Yantangay adda agarup 200 a kita dagiti woodpecker iti sangalubongan, nalabit a nadlawyon ti kanayon a panagtuktokna a kasla masinggan ti unina. Idi nakitak ti maysa, a naiyadayonan ti sippitna iti puon ti kayo, nagpanunotak, ‘Apay a di marungdo ti tengngedna wenno madangran ti utekna?’ No datayo a tattao aramidentayo ti umasping a nabileg a tignay, nalabit kasapulantayo ti panangaywan ti maysa a chiropractor wenno maysa a siruhano ti utek! Gapuna, ania ti sekretona?
Usigenyo kas pangarigan, ti nalabagat’ barukongna a woodpecker a masarakan idiay makindaya a deppaar ti Estados Unidos. Kunaen ti Book of North American Birds: “Babaen iti nadagsen, kasla likop ti itsurana a sippitna, kitkitenna dagiti insekto a naiseksek iti ukis ti kayo, abutanna ti kayo tapno maalana dagiti barrairong nga umabut iti kayo, pirpirsayenna ti kayo bayat a mangabut ti umokna.” Kasano a salaknibanna ti bagina manipud iti tapuk ti kayo? “Ti agongna nagsayaat ti pannakaabbongna iti bassit a maskara a nagpipino a dutdot.”
Ket ti ngay pannakaipak-ol ti ulona? “Tapno maliklikan ti pannakadangran ti utek . . . , ti napigsa a tengnged, napuskol a bangabanga, ken ti mangep-ep a baet ti napuskol a makinruar a kulapot ken ti utek a mismo ti agserbi a naisangsangayan a salaknib.”
Ti sabali a woodpecker, ti duyaw-barukongna a sapsucker, mangaramid ti agdadayday nga abut iti ukis ti kayo, isu a pangsusopanna iti tubbog. Saan a kas ti nalabagat’ barukongna a woodpecker, a talaga a nakaat-atiddog ti nagbukbukel a dilana a ti murdongna ti pangtiliwna kadagiti insekto, ti sapsucker ab-ababa ti dilana nga addaan napino a buok a makatulong iti panangsisipna iti tubbog.
Talaga a ti kasta a napintas a nagduduma a disenio ipasimudaagna ti maysa a Diseniador, ni Jehova a Dios. Sipapakumbaba koma nga iyebkastayo dagiti sasao ni Job: “Ammok a sika maaramidmo amin dagiti bambanag, ket awan panggepmo a mabalin a tubenen.” Ket nagsurat ni David: “Nakaskasdaaw dagiti ar-aramidmo, ket dayta pagaammo unay toy kararuak.”—Job 42:2; Salmo 139:14.
[Picture Credit Lines iti panid 31]
Leonard Lee Rue, 111/ H. Armstrong Roberts
Kanigid: H. Armstrong Roberts