Nangisalakan ti Hippopotamus!

AGDAGSEN iti uppat a tonelada, ti hippopotamus ti maikadua a kadadakkelan a mamalia nga agbibiag iti daga. Dagiti nabileg a pangana mabalin a lasangenna ti maysa a bilog iti maminsan laeng a panangkagatna. Gapuna, talaga a nasdaaw ti maysa a grupo dagiti lallaki idiay Hwange National Park, Zimbabwe, idi nakitada ti maysa a hippo a naisangsangayan ti panagtignayna a namagsiddaaw kadakuada​—saan nga aglablabes ti panagsao.

Nakita dagiti lallaki ti dua nga impala bayat nga asidegda iti dam a napalalo ti panangkamat ti siam nga atap nga aso. Gapu ta awan paglisianda a dalan, timpuak dagiti impala iti danum. Nagtaltaltag dagiti aso a nangtaraigid iti danum, nga inanamaenda nga addanto lugar a rumkuasan dagiti impala.

Kamaudiananna, maysa a nabannoganen nga impala ti nangrugin a naglangoy iti adayo nga igid, a dina napanunot nga agur-uray sadiay dagiti aso. Nupay kasta, idi asidegen a makatakdang ti impala, nakita dagiti lallaki ti adda iti asideg a hippopotamus nga aglanglangoy a sumabat iti impala. Idi nakadanonen iti yanna, kuna ti magasin a Wildlife, “pinusipos [ti hippo] dayta ket pinilitna nga aglangoy nga agsubli.” Nagtungpal ti impala. Simmaruno ti hippo, a masansan nga iduronna no kasla ipakita ti impala nga agsardeng.

Idi nakagtengen ti impala iti igid ti danum, binuya dagiti lallaki ti nabannayat ngem nabileg a panangiduron ti hippo iti impala a sumang-at [iti danum]. Immaddang ti impala iti sumagmamano nga agkakapsut nga addang, kalpasanna simmardeng ket nagtakder nga agpigpigerger. Di nagbayag, nagnan ti impala nga immadayo iti danum. Simmaruno ti hippo agingga a nailingeddan a dua.

Aniat’ napasamak iti sabali nga impala? Impadamag dagiti lallaki a “naipamaysa [dagiti atap nga aso] a mangbuybuya iti panangisalakan ta nakalibasen ti sabali nga impala a di nadnadlaw.”