No Kumawen Dagiti Ganggannaet ti Ubbing
“PANGNGAASIYO TA TULONGANDAKAMI A MANGSAPUL KENKUANA. PANGNGAASIYO, PANGNGAASIYO TA TULONGANYO NI SARA!”
Daytoy a nakapaspasnek nga ikkis ti dua a madanagan a nagannak ket naipabuya iti telebision iti intero nga Estados Unidos iti panangikagumaan a mangpasubli iti 12-tawenna a balasitangda a ni Sara Ann Wood. Isut’ nakumaw tallo a lawas sakbayna bayat ti panagbisikletana iti lansangan iti away a pagtataenganna.
MAYSA a dakkel a grupo dagiti managsapul ti siiinget a nangsukimat iti kakaykayuan, tay-ak, ken dagiti asideg a dan-aw a mangbirbirok kadagiti pangtuntonan ti mapukpukaw a balasitang. Iti dayta met la a tiempo, ni Tina Piirainen, sabali a madandanagan a naganak iti kabangibang nga estado, nagparang met iti telebision nga agpakpakaasi gapu iti mapukpukaw a balasitangna. Gapu ta naawis iti aduan kaykayo a dalan, nagpukaw ti sangapulot’-tawenna a ni Holly iti nakurang a maysa nga oras. Kamaudiananna nasarakan ti bangkayna iti maysa a tay-ak.
Ti panagbiag para iti nagannak dagiti mapukpukaw nga ubbing ket nasaem a kapadasan. Inaldaw a makidangdangadangda iti panagduadua no sibibiag pay ti anakda, nalabit nadangran iti pisikal wenno seksual a naabuso, wenno natay, kas iti napasamak ken agtutubo nga Ashley. Kimmuyog ni Ashley iti pamiliana a nangbuya iti kabsatna a makisalisal iti ay-ayam a soccer. Gapu ta nauman nga agbuybuya, napan iti pagay-ayaman—ket nagpukawen. Kamaudiananna, nasarakan ti bangkay ni Ashley iti asideg a tay-ak. Isut’ nabekkel.
Nakaam-amak a Batibat
Idiay Estados Unidos, tinawen, manipud 200 agingga iti 300 a pamilia ti makapadasto ti nakaam-amak a batibat a kaadda ti makumaw nga anak ken nalabit pulos a didanton makita ti ubing a sibibiag pay. Nupay bassit ti bilang no idilig kadagiti dadduma a naranggas a krimen a naaramid, ti buteng ken panagamak nga agsaknap iti intero a komunidad apektaranna dagiti rinibo a tattao. Iti pannakakigtot mayebkasda, ‘Kasano a mapasamak ti kasta a trahedia ditoy? Tinto kadi anakko ti sumaganad?’
Idiay Estados Unidos, ti tinawen a bilang dagiti naipadamag a kaso dagiti ubbing a nakumaw ket adda iti nagbaetan ti 3,200 ken 4,600. Dua a kakatlo wenno ad-adu pay kadagitoy ti maabuso iti sekso. Kinuna ni Ernest E. Allen, presidente ti National Center for Missing and Exploited Children: “Ti kangrunaan a rason [iti panangkumaw iti ubbing] ket sekso, a sarunuen ti panggep a mangpapatay.” Kasta met, sigun iti Department of Justice, nasurok a 110,000 a dadduma a panangkumaw ti maiplano iti tinawen, kaaduanna babaen kadagiti managbiahe, a gagangay ket lallaki, a padasenda nga allukoyen ti maysa nga ubing a sumrek iti kotseda. Mapadpadasan met ti dadduma a daga ti nasaknap a kinaranggas a maibusor kadagiti ubbing.
Mapabasol Met Kadi ti Kagimongan?
No maipapan iti panangpatay iti ubing, ipakita ti maysa a managsirarak a taga Australia a daytat’ “naiplano a pasamak.” Iti librona a Murder of the Innocents—Child-Killers and Their Victims, kunaen ni Paul Wilson a “nasiluan agpadpada ti mammapatay ken ti napapatay iti maysa a dakes a siklo a pinataud a mismo ti kagimongan.”
Mabalin a nakaskasdaaw a panunoten a ti kagimongan ti mabalin a makimbiang, wenno mabalin a pakaigapuan daytoy a trahedia, yantangay mabigbig ti kaaduan a tattao a ti pananggundaway ken ti panangpapatay kadagiti ubbing ket nakaam-amak nga ar-aramid. Ngem, kadagiti nabaknang a kagimongan, ken uray kadagiti adu a napanglaw pay laeng a pagilian, nakaad-adun dagiti pelikula, pabuya ti TV, ken babasaen a mangitantandudo iti sekso ken kinaranggas.
Umad-adu itan dagiti pelikula a mangipabuya ti nakaro a pornograpia a mangiparang kadagiti ubbing ken uray pay dagiti nataengan a nakawesan a kasla ubbing. Dagitoy iladawanda ti nakalawlawag a pannakidenna ken kinaranggas a pakairamanan dagiti ubbing. Kuna pay ni Wilson iti librona nga adda dagiti paulo ti sine a kas iti Death of a Young One, Lingering Torture, ken Dismembering for Beginners. Kasano kaadu dagiti agbuya iti sadistiko a kinaranggas ken pornograpia? Daytat’ binilbilion a doliar nga industria!
Addaan ti kasta unay nga epekto ti nakabatbatad a kinaranggas ken pornograpia iti biag dagidiay a manggundaway kadagiti ubbing. Nagpudno ti maysa a napaneknekan a nakabasol gapu iti sekso a nangpapatay iti lima a barito: “Maysaak a homoseksual a pedophile a napabasol iti panangpapatay, ket ti pornograpia ti nakaituggod iti panagbasolko.” Ilawlawag ni Propesor Berit Ås, iti Oslo University, ti epekto ti pornograpia ti ubbing: “Dakkel ti nagbiddutanmi idi arinunos ti dekada ’60. Namatikami a mabalin a sukatan ti pornograpia dagiti krimen iti sekso babaen ti panangipaayna iti pakaipeksaan dagiti managbasol iti sekso, ket dikam linapdanen ti pornograpia. Ita ammomin a nagbiddutkami: ti kasta a pornograpia patalgedanna dagiti krimen iti sekso. Ituggodna ti managbasol a mangpanunot, ‘No mabuyak daytoy, ngarud maipalubos nga aramidek dayta.’”
Kumaro ti pannakagargari ti tarigagay ti nataengan bayat nga agbalin nga adikto iti pornograpia. Kas banagna, dadduma ti mayat a mangusar iti panangpilit wenno kinaranggas tapno magun-odanda dagiti ubbing nga usarenda iti dakes nga aramidda, agraman ti panangrames ken panangpapatay.
Adda pay dadduma a makagapu iti panangkumaw iti ubbing. Iti dadduma a dagdaga, immadu daytoy gapu iti dakes a kasasaad ti ekonomia. Gapu ta maawisda iti dadakkel a gatad ti pangsubbot a kuarta a pagbayad dagiti nabaknang a pamilia, puntiriaen dagiti manangkumaw ti ubbing. Tinawen adu a maladaga ti matakaw ken mailako kadagiti mangampon a grupo a dakes ti panggepda a mangibiahe kadakuada iti sabali a pagilian.
Asinot’ mangbukel iti kangrunaan a paset dagiti mapukpukaw nga ubbing? Aniat’ mapasamak kadakuada? Usigen ti sumaganad a dua nga artikulo daytoy a banag.
[Kahon iti panid 6]
Minilion nga Ubbing a Balangkantis
Sigun iti Naciones Unidas, agarup sangapulo a milion nga ubbing, a kaaduanna [adda] kadagiti napanglaw a pagilian, ti napilitan nga agbalangkantis, adu kadakuada ti nakumaw. Immadu daytoy dakes a trabaho idiay Africa, Asia, ken Latin America a naigiddan iti irarang-ay ti turismo dagiti ganggannaet. Iti dadduma a lugar, kadagiti minilion a turista, nangnangruna manipud kadagiti nababaknang a daga, agarup dua a kakatlo ti “turista a manggundaway kadagiti ubbing gapu iti sekso.” Ngem addanto aldaw ti pannakasingir, yantangay dagiti krimen ti tao “sipapanayagda a nailatak kadagiti mata daydiay pagidatagantayo,” ni Jehova a Dios.—Hebreo 4:13.
[Ladawan iti panid 5]
No makumaw ti maysa nga ubing, maysa dayta a nakaam-amak a batibat