Manipud Managbasatayo
Dakes a Kababalin Iti matukodko a lagipen, dakes a kababalin ti ipakpakitak idi. Adda pay tiempo idi a pagpannakkelko ti diak panangyebkas kadagiti balikas ti pammadayaw ken konsiderasion, kas iti “Pagyamanan,” “Pangngaasim ta pakawanennak,” ken “Dispensarennak.” Idi agangay nabasak ti artikulo a “Ti Pannakarbek Dagiti Nasayaat a Kababalin” ken dagiti paset ti Biblia a naadaw sadiay. (Hulio 22, 1994) Naammuak a kanayon a nasayaat ti kababalin ti Dios no makilangen kadagidiay nababbaba ngem isu, a masansan nga inayonna ti “pangngaasim” kadagiti dawatna. Nasdaawak unay a nakakita iti daytoy iti Biblia. Ginutugotnak a mangikagumaan a tumulad iti Dios. Pagyamanan unay kadakayo.
M. E. J., Nigeria
Talaga nga apresiarek ti artikulo. Mainaig unay iti nasayaat a kababalin ti panagraem kadagiti kalintegan ken sanikua ti sabsabali. No dadduma, no awisem dagiti gagayyem idiay balaymo, ipagarup dagiti annakda a gundawayda met nga aramiden ti kaykayatda—a mapanda iti nadumaduma a siled, sada lukatan dagiti uyosen, refrigerator, ken dadduma pay.
G. W., Estados Unidos
Napateg ti tunggal balikas iti artikulo. Eksakto a daytat’ kasapulak a pangisuro iti dua a tin-edyer a barok. Naammuak a nagadu a detalye maipapan iti nasayaat a kababalin ti diak naisuro kadagiti annakko. Ita, ammokon dagitoy a makaay-ayo a detalye ken no kasano a yaplikar ida.
P. H., Estados Unidos
Dagiti Subway ti Moscow Kabasbasak itay nabiit ti “Dagiti Makapasiddaaw a Palasio ti Moscow iti Uneg ti Daga.” (Hunio 22, 1994) Kanayon a tartarigagayak ti agbiahe idiay ballasiw taaw, ket nasarakak a ti panagbasa kadagita nga artikulo ti mangiparikna a kaslattay addaak sadiay.
J. H., New Zealand
Sinarungkarak ti Moscow bayat a tinabunuak ti nabiit pay a kombension dagiti Saksi ni Jehova. Namin-adu a nagluganak iti Metro. Diak nautob idi a kitkitaek gayamen ti maysa kadagiti kapintasan ken kapatgan a subway iti lubong. Isu a talaga a tinagiragsakko ti artikulo.
P. M., Finland
Nakalemmeng a Pumalpaltog? Iti artikulo a “Dagiti Panangmatmatko kas Historiador ti Militar,” inladawan ti mannurat ti iseserrek iti Paris kalpasan ti pannakawayawayana idi arinunos ti Gubat Sangalubongan II. (Abril 22, 1993) Kunana a pinaputokan dagiti nakalemmeng a pumapaltog nga Aleman ken namin-adu a dimsaag iti jeepna tapno aglinged—sa napasamak daytoy iti kalatakan a kalsada idiay Paris! Pulos a di “nawayawayaan” ti Paris no di ket di limmaban nga insuko ti Aleman a komander a ni Dietrich von Choltitz, a nagtignay kontra kadagiti pammilin.
A. W., Italia
Isalsalaysay ti autor ti bukodna a kapadasan, maysa a pananglagip a pinasingkedan ti dadduma a nakasaksi a mismo ken historiador. Kas pagarigan, bigbigen ti libro a “Liberation,” ti historiador ti militar a ni Martin Blumenson, a nupay no sinukir ni von Choltitz dagiti pammilin ni Hitler a puoran ti Paris agingga a dumapo, talaga a napasamak ti nakaro a rinnanget dagiti soldado nga Aleman ken dagiti tropa ti Francia ken E.U. kadagidi aldaw sakbay ti isusukona. No maipapan ti rinnanget idiay Champs Élysées—“ti kalatakan a kalsada idiay Paris”—pasingkedan met daytoy ti dadduma a historiador. Kitaenyo ti “Six Armies in Normandy—From D-Day to the Liberation of Paris,” ni John Keegan.—ED.
Medikal a Supiat Agtawenak iti 12. Nabasak ti artikulo a “Saankami a Mahiko Wenno Didios.” (Mayo 8, 1994) Maragsakanak a nakaammo nga adda maysa a Kristiano nga agtutubo pay laeng a kas kaniak a nangikalintegan kadagiti doktor ken siruhano ti ospital ken ‘immadayo iti dara.’—Aramid 15:20.
P. M. H., Estados Unidos
Agtawenak iti 19. Ania ketdin a pannakapabileg ti pammatik iti nabasak a kapadasan ni Mercy Uwasi! Daytat’ nangipalagip kaniak iti kinapudno a ti kinasungdo ken Jehova ket saan nga agpannuray iti tawen ti maysa no di ket iti nauneg a panagayat kenkuana. Daytoy ti namagbalin kaniak nga ad-adda a determinado a salimetmetan ti kinasungdok ken Jehova.
S. M., Sud Africa