Agimtuod Dagiti Agtutubo . . .

Kasano a Mapaksiatko Dagitoy a Rikna?

“Nupay karimonko itan ti homoseksualidad, addada kanito a masarakak ti bagik a maallukoy iti dayta. Riribukendak dagitoy a rikna, no dadduma aldaw ken rabii. Kankanayon nga inkararagko ken Jehova, ‘Paksiatem dagitoy a nakaro a rikrikna!’ Mapaksiatdanto aya?”​—Dennis.a

ADU a Kristiano nga agtutubo​—lallaki ken babbai​—ti nangaramid iti umasping a panagpakpakaasi iti tulong. Agduyosda iti homoseksualidad ngem dida kayat ti makiraman iti kinalulok, sakit, ken pannakadadael ti moral a pakabuklan dayta nga estilo ti panagbiag. Napatpateg pay, kayatda a maay-ayo ti Dios, ket sibabatad a kondenaren ti Saona ti homoseksualidad.​—Roma 1:26, 27; Colosas 1:10.

Masansan a kunada a din agbalbaliw dagiti homoseksual. Ngem, saan a pudno daytoy. Sigud nga ar-aramiden ti dadduma a Kristiano idi ugma ti homoseksualidad, ngem nagbalbaliwda. (1 Corinto 6:9-11) Wen, maikontra kadagiti nalatak a sariugma, kabaelan ken makapagbalbaliw ti tattao. Nupay kasta, nupay sibaballigi a mabalinan ti maysa nga agtutubo a liklikan ti homoseksual nga ar-aramid, mabalin a marigatan a mangiwaksi a naan-anay iti homoseksual a tarigagay. Impudno ti maysa nga agtutubo a lalaki: “Inkagumaak a balbaliwan ti rikriknak. Nagkararagak ken Jehova maipaay iti tulong. Nagbasaak iti Biblia. Dimngegak kadagiti palawag maipapan iti tema. Ngem diak ammo no sadinot’ sumaganad a pagpatulongak.”

Awan ti kellaat wenno madagdagus a solusion. Malagip ni Dennis: “Dinurogak ti bagik a makiraman iti nalulok nga aramid ti lalaki ken babai iti panagreggetko nga agbalin a ‘lalaki.’ Ubbaw amin dagitoy ken nangpataud laeng iti nasasaem a rikna.” Nupay kasta, no mayaplikar dagiti prinsipio ti Biblia, maparmek ti maysa dagita a rikna.

Panangbigbig Kadagiti Dakes a Padron ti Panunot

Umuna iti amin, bigbigenyo a ti ar-aramid isut’ resulta ti pampanunot. (Isaias 55:6, 7; Santiago 1:14, 15) Kinapudnona, kuna ni Dr. Wayne W. Dyer: “Dika maaddaan iti rikna (emosion) no dika pay la nagpanunot nga umuna.” Isu a ti ramut dagiti homoseksual a tarigagay mabalin a ti maysa a padron ti tiritir a panagpampanunot ti maysa maipapan iti bagina, iti kasungani a sekso, ayat, ken dadduma pay. Sakbay a ‘mapabaro [ti maysa] ti panunotna’ ken balbaliwan ti kasta a pampanunot, masapul nga ilasinna pay la ida. (Roma 12:2) Ti panangaramid iti dayta ti mangted iti maysa iti napateg a pannakaawat no apay a maallukoy ti maysa iti kaseksona.

Kasano a maaramidan ti maysa a tao dayta? Maysa a wagas isut’ panagkararag, kas inaramid idi ti salmista: “Usigennak, O Dios, ket ammuem toy pusok. Sukimatennak, ket ammuem dagiti makariribuk a pampanunotko, ket kitaem no adda aniaman a dinadangkes a dalan kaniak.” (Salmo 139:23, 24) Mabalin a makatulong met ti panangilawlawag iti rikrikna ti maysa iti masirib ken nataengan a Kristiano. Kas kuna ti Proverbio 27:17, ‘ti landok patademenna ti landok.’ Isu nga impeksa ti maysa nga agtutubo a lalaki ti rikriknana iti maysa a Kristiano a panglakayen nga agdindinamag iti kinamannakaawat ken kinamannakipagriknana. Adda rigrigatna idi nga italekna iti maysa a tao ti palimedna, ngem napatanor ti maysa a napateg a relasion. “Maibagak kenkuana ti aniaman,” kunana. Saan laeng a dimngeg ti panglakayen no di ket, ti nasigo a panagimtuod, isut’ timmulong iti pannakaipeksa ti rikrikna ken pampanunot ti agtutubo a lalaki.​—Idiligyo ti Proverbio 20:5.

No ti maysa a lalaki ket addaan idi iti di mangikankano wenno abusado nga ama, mabalin a masarakanna a ti pannakaallukoyna iti kaseksona isu ti talaga a panangikagumaanna met piman a penken ti tarigagayna iti naamaan a panagayat. Tangay di naaddaan iti lalaki a paguadan, mabalin a mariknana met ti awagan ni Dr. Joseph Nicolosi a “sentido ti kinakapuy ken di pannakabael no maipapan kadagidiay galad a mainaig iti kinalalaki, nga isut’ pannakabalin, pammasingked, ken bileg.” No usigen ti maysa a tao ti tunggal maysa kadagiti espesipiko a kababalin a mariknana nga awan kenkuana, mabalin a matakuatannanto buyogen ti panagsiddaaw a dagitoy met la a kababalin ti pakaallukoyanna iti dadduma a lallaki.

Nakalkaldaang a “Leksion” Manipud Napalabas

Maamiris ti dadduma nga agtutubo a ti parikutda ket mainaig kadagiti napalabas a pannakapasakit. Malagip ti maysa a babai: “Naisarangak iti pornograpiko a material a homoseksual dagiti temana. Nakapatanorak kadagiti di nainkasigudan a tarigagay.” Kuna ti maysa nga agtutubo a lalaki: “Maysaak a biktima ti incesto ni amak. Kas bungana, kasla normal kaniak ti pannakidenna iti lalaki.” Dagita a nasaem a kapadasan mabalin nga isurona dagiti biktima a kaluksaw wenno kaamak ti kasungani a sekso wenno pagpadaen ti ayat kadagiti kinalailo ti bagi. Gapuna, dineskribir ti maysa a biktima dagiti seksual a tarigagayna kas “emosional, saan a pisikal, a kasapulan​—panagkasapulan iti kinadungngo ken pannakaawat.”

Nalawag, nupay kasta, a komplikado dagiti pakaigapuan ti homoseksualidad, ket saan la simple a panangilawlawag ti kasapulan ti adu a kaso.b Agpapan pay ti nakaigapuan ti tiritir a kapanunotan, nupay kasta, adu ti maaramidan ti maysa tapno ilinteg dayta.

Panangpabaro iti Panunot ti Maysa

Ti kasayaatan a wagas isut’ panangusar iti Sao ti Dios. Usigenyo, kas pagarigan, ti maysa nga agtutubo a lalaki a nasarakanna ti bagina a naallukoy iti lallaki a nangipakita kadagiti nalalakian a kualidad a mariknana nga awan kenkuana. Wenno ti maysa nga agtutubo a babai a kaamakna ti kasungani a sekso. Maysa a wagas nga agpadpada a mangpatanor iti nasayaat a panangmatmat iti kinalalaki isut’ panangutob iti ulidan ni Jesus. (1 Pedro 2:21) Isu ti naan-anay nga ulidan ti kinamalalaki a natimbengan iti kinaalumamay. (Mateo 19:14; Juan 19:5) Isu a masarakan ti maysa nga agtutubo a lalaki a makatulong ti panagadal iti libro a Ti Katan-okan a Tao a Nagbiag Pay Laeng.c “Ti panangam-ammo ken Jesus binaliwanna ti panangmatmatko iti no ania ti rumbeng a pagbalinan ti maysa a lalaki,” kunana.

Ti panangmennamenna kadagiti teksto ti Biblia a mangilawlawag kadagiti tema kas ti panangmatmat ti Dios iti sekso, ayat, ken ti panagginnayyem ti agkasekso ket makatulong met iti pannakailinteg ti panagpampanunot ti maysa.​—Genesis 1:27, 28; Ruth 1:16, 17; 1 Samuel 18:1; Proverbio 5:18, 19; 1 Corinto 13:4-8.

Napateg met a liklikan ti naynay a panangpanunot iti dakes. Masansan a dagitoy a rugso ket nangnangruna a nabileg no malidliday, malmaldaang, wenno maup-upay ti maysa. (Proverbio 24:10) “Ti panangsukat iti naimbag kadagiti dakes a kapanunotan ti kakaisuna a wagas tapno mabalbaliwan ti kinataotayo,” kuna ti maysa a Kristiano a balasang. No sumken ti narugit a rugso, palagipanna ti bagina iti panangmatmat ti Dios iti homoseksualidad. Kuna ti maysa a tin-edyer a baro: “No sumken ti homoseksual a tarigagayko, mennamennaek ti paboritok a teksto ti Biblia.” (Idiligyo ti 2 Corinto 10:4; Filipos 4:8.) Nasarakan ti dadduma a makatulong ti pannaturog babaen iti uni ti nadumaduma a naibasar-Biblia nga audiocassette ti Watch Tower Society.

No kasano a ti wagas ti panagpampanunottayo apektaranna ti wagas ti panagtigtignaytayo, ti wagas ti panagtigtignaytayo apektaranna ti wagas ti panagpanunot ken panagrikriknatayo. Isu a masapul nga isardeng met ti maysa ti kababalin ken pannakikuyog a mangpasekken wenno mangpabileg iti dakes a tarigagay. (1 Corinto 15:33) Mabalin a kasapulan met ti ‘panagannad’ kadagiti pangpubliko a rest room, aplaya, locker room, ken dadduma a lugar a mangisarang iti pannakasulisog ti maysa.​—Salmo 119:9.

Ti masturbasion ket sabali pay a dakes nga aramid a masapul a liklikan. Iti adu a homoseksual a lallaki ken babbai, dida matengngel dayta a pakaguyugoyan. “Parikutkon ti masturbasion manipud pay idi agtawenak iti innem,” impudno ti maysa nga agtutubo a lalaki. “Ti panangdardarepdepko iti sekso ti nangpabileg kadagiti homoseksual a rikriknak.” Labananyo daytoy narugit a kababalin!d​—Colosas 3:5.

Iti kasumbangirna, napateg met nga ipasdek ti maysa dagiti nasalun-at a padron ti kababalin. Insingasing ti dadduma a no patanoren ti maysa nga agtutubo a lalaki dagiti nalalakian a kababalin, saanto unay a mallukoy iti dadduma a lallaki. Siempre, saan nga ammo daytoy ti maysa nga agtutubo a lalaki no awan nabileg a lalaki a paguadanna kas maysa nga ubing. Mabalin a kasuronna pay ketdi ti bukodna a bagi ken makarikna iti di maiparbeng wenno di kinalalaki. Masansan a ti pannakiraman iti pisikal a trabaho, kalalainganna a panagehersisio, wenno kadagiti makapabang-ar a panagay-ayam ti makatulong itoy a banag. (Idiligyo ti 1 Timoteo 4:8.) Ngem kas iti panagbalin ni agtutubo a lalaki a Timoteo a kaarigna anak ni apostol Pablo, mabalin a masarakan ti maysa a nangnangruna a makatulong ti panangpatanor iti nasayaat a pannakaawat iti maysa a natimbeng a nataengan a Kristiano a lalaki. (Filipos 2:19-22; 2 Timoteo 3:10) Babaen ti panangipasdek kadagiti nalawag a beddeng ti kababalin ken pananginsiar iti prangka a komunikasion, ti kasta a relasion ket agbalin a nabara ken mapagtalkan, kaskasdi nga awanan iti aniaman nga erotiko a panangisingasing.

Kangrunaan iti amin, masapul a napigsa ti naespirituan a panglaban ti maysa. Ti regular a panagadal iti Biblia, panagkararag, ken panangiranud iti pammati iti sabsabali ti tumulong iti maysa a mangsalimetmet iti panunotna iti naespirituan a tarayen. (Salmo 55:22; 119:11; Roma 10:10) Addada kanito a ti rikrikna a kinaawan-serserbi ti mabalin a mangparigat iti pannakilangen kadagiti pada a Kristiano, ngem mamakdaar ti Biblia maibusor iti panangiputputong iti bagi. (Proverbio 18:1) Ti nasayaat a pannakikuyog kadagiti Kristiano a kasekso ken di kasekso makatulong iti panagtalinaed ti maysa a natimbeng.​—Hebreo 10:24, 25.

No rirriribukennakayo ti homoseksual a tarigagay, mabalin a makatulong dagitoy a singasing. Ngem dikay maupay unay no agtalinaed dagiti dakes a rikrikna. Maawatan ti Dios dagiti riknayo ken adda asina kadagidiay mangikagumaan nga agserbi kenkuana. (1 Juan 3:19, 20) Idiay baro a lubong, mapadasanto ti sangatauan ti pannakaagas amin a sagsagabaen a mangparparigat kadatay ita. (Apocalipsis 21:3, 4) Kabayatanna, agpannuraykay iti Dios ken labananyo dagiti dakes a tarigagay. (Galacia 6:9) Buyogen ti panawen ken determinado a panagregget, nalabit mapabassit uray dagiti dakes a tarigagay.

(Mangrugi iti sumaganad a ruarmi, ti “Agimtuod Dagiti Agtutubo . . .” ket agparangto iti maminsan iti kada bulan.)

[Dagiti Footnote]

[Blurb iti panid 22]

Patanorenyo ti nasayaat a panangmatmat iti kinalalaki babaen ti panangadalyo iti ulidan ni Jesus