“Mapanka ken Kuton”

“DAGITI NAISANGSANGAYAN A KUTON”​—dayta a karkarna a paulo ti nagparang iti maysa nga artikulo ti periodiko sumagmamano a tawenen ti napalabas maipapan iti sipapardas pannakaibangonna a Kingdom Hall dagiti Saksi ni Jehova. Apay a kasdiay ti paulo? Saan a narigat a tarusan no kitaenyo ti retrato a naala manipud tangatang iti lugar a pagibangonan. Inlawlawag ti subtitulo ti isu met la nga artikulo ti periodiko: “Lima gasut a Saksi ni Jehova ti adda idiay lugar a pagibangonan​—karkarna a kaasping ti bunton ti kuton.”

Mayanatup ti panamagdilig, nalabit nga ad-adda pay ngem ti naamiris ti reporter. Pudno a manipud iti ngato, sumagmamano a gasut a tattao ti nagaaripuno iti maysa a lugar ti pagibangonan, mabalin a kasda la kuton iti maysa a bunton. Ngem iti daytoy a kaso, saan laeng a pammarang ti panamagdilig. Apay a kastoy? Sisiserioso nga imutektekan dagiti Saksi ni Jehova ti balakad ti Biblia idiay Proverbio 6:6, a sadiay kunana: “Mapanka ken kuton . . . ; kitaem dagiti dalanna ket agmasiribka.” Kasano ti panagbalin ti maysa a masirib babaen ti panangpaliiw kadagiti kuton?

Iti maysa a banag, adu ti maaramidan dagiti kuton. Kuna ti encyclopedia ti Biblia nga Insight on the Scriptures: “Saan laeng a nakadkadlaw ti nakaisigudanda a panagsagana para iti masakbayan no di ket kasta met ti kinapinget ken determinasionda, a masansan nga awitenda wenno ikarkarigatanda a guyoden dagiti banag nga agdagsen iti mamindua ngem iti kadagsenda, nga aramidenda ti isuamin tapno mairingpasda ti partikular nga annongenda, ket dida agsanud nupay matnag, maikaglis, wenno matulidda iti dadduma a narangkis a derraas.”a

Umasping iti dayta, nupay saan a guyoden dagiti Saksi ni Jehova dagiti materiales a pagibangon a mamindua ngem iti kadagsenda, masansan a pagsiddaawenda ti kaarrubada babaen iti kaadu ti mairingpasda kadagiti proyekto a panagibangon iti ababa laeng a tiempo. Kadawyan a makita ti sipapardas a pannakaibangon dagiti Kingdom Hall-da manipud iti pundasion ken mairingpas iti unos laeng ti dua wenno tallo nga aldaw!

Kasano a mairingpasda amin daytoy? Babaen ti panangtuladda iti kuton iti sabali pay napateg a pamay-an. Kuna ti Insight on the Scriptures maipapan kadagiti kuton: “Tangay naisangsangayan ti panagtutunosda, pagtalinaedenda dagiti balayda a nakadaldalus ken ipakitada ti pannakaseknanda kadagiti padada a trabahador, pasaray tulonganda dagiti nadangran wenno nabannogan a kuton nga agsubli iti balayda.” Kasla naallukoy ti nadakamat-iti-ngato a reporter iti umasping met laeng a mannakitunos nga espiritu kadagiti Saksi ni Jehova, nga inladawanna “ti kasta unay a panagregget a mangiringpas buyogen ti naragsak a pakinakem iti nawaya nga atmospera ti ag-80 a propesional a mangibagi iti tunggal sanga ti trabaho a panagibangon ken sinuportaran ti 400 a boluntario.”

Nupay kasta, amin a kinagaget ken panagtutunos nga aramiden dagiti Saksi ni Jehova iti panagibangon kadagiti Kingdom Hall-da ket maysa laeng a pangripiripan kadagiti mapaspasamak iti uneg dagidiay a pasdek iti mapasungad a tawtawen. Sadiay nga itultuloyda ti kinagaget ken panagtutunos, nga organisarenda ti trabahoda a panangisuro ken panangasaba ken iparangda a makapabileg ken makaisuro dagiti gimongda. Napatpateg pay, ikagumaanda nga ipakita ti umasping a naayat a pannakaseknan iti maysa ken maysa nga impakita ni Jesus kadagiti pasurotna idi isut’ adda ditoy daga.​—Juan 13:34, 35.

No nakakitakayon iti Kingdom Hall dagiti Saksi ni Jehova ken pampanunotenyo no ania ngatat’ mapaspasamak iti uneg, sibabara nga awisendakayo a sumrek ken kitaenyo a mismo. Sitatalek a maipanamnamami kadakayo a maaw-awatkayo a sibabara ken maaddaan iti makaisuro a panagsarungkar.

[Dagiti Footnote]

[Ladawan iti panid 31]

Maysa a napardas pannakaibangonna a Kingdom Hall idiay Aurillac, Francia

[Picture Credit Line iti panid 31]

Dagiti line drawing: Bassit a nalabaga a kuton, Lydekker