Sumungsungaden—Ti Kasayaatan a Panawen!
SIGUN iti Biblia, pinanggep ti Dios nga agbiag nga agnanayon ti natauan a pulí iti sangalubongan a paraiso. (Genesis 1:28; 2:8, 9) Nabatad, adayo ti simiasiantayon manipud iti orihinal a panggep ti Dios. Aniat’ napasamak?
Simmukir ti immuna a natauan a pagassawaan iti Dios, a nangibunga iti kinaimperpekto ken ipapatay kadakuada a mismo ken iti amin nga annakda. (Genesis 2:16, 17; 3:6, 7, 17-19; Roma 6:23) Ilawlawag ti Biblia: “Dimteng ti basol iti lubong babaen ti maysa a tao, ket inyeg ti basolna ti ipapatay. Kas resultana, nagsaknap ti ipapatay iti intero a natauan a pulí agsipud ta nagbasolda amin.”—Roma 5:12, Today’s English Version.
Agpapan pay iti daytoy a kasasaad, nagtalinaed latta ti panggep ti Dios. “Ti saok ket kas iti niebe ken iti tudo a bumaba manipud langit a mangsibug iti daga. Pagtubuenda ti mulmula ken mangted iti bukel agpaay iti panagmula ken taraon a kanen. Kastanto met ti saok nga isawangko . . . Tungpalennanto amin a banag nga ibilinko nga aramidenna.” (Isaias 55:10, 11, Today’s English Version.) Aniat’ ibanagto ti kari ti Dios kadatayo?
DAGITI BENDISION ITI SIDONG TI PAGARIAN TI DIOS
Kinatalged
“Bassit pay a darikmat, ket ti nadangkes maawanton; ket mingmingamto la ketdi ti lugarna, ket isu awanton.”—Salmo 37:10.
Biag nga Agnanayon
“Dagiti nalinteg a mismo tagikuaendanto ti daga, ket agtaengdanto nga agnanayon iti dayta.”—Salmo 37:29.
“Awanton ni patay, awanto metten ti panagleddaang wenno panagsangit wenno ut-ot.”—Apocalipsis 21:4.
Makapnek a Trabaho
“Mangbangonto dagiti tattao iti balbalay ket agnaeddanto kadakuada—saanto ida nga usaren ti sabali pay. Agmuladanto kadagiti kaubasan ken tagiragsakenda ti arak—daytat’ dinto inumen ti sabsabali. Kas kaykayo, ti ilik ket agbiagto iti napaut. Tagiragsakendanto a naan-anay ti bambanag nga inaramidda.”—Isaias 65:21, 22, TEV.
Salun-at
“Awanto ti agtaeng nga agkuna: ‘Masakitak.’ Dagiti tattao nga agtaeng iti daga isudanto dagidiay napakawan kadagiti biddutda.”—Isaias 33:24.
Awanton ti Kinabaldado
“Dagiti mata ti bulsek maluktandanto ket dagiti lapayag ti tuleng maluktandanto. Iti dayta a tiempo daydiay pilay agkalay-atto a kas iti ugsa, ket ti dila daydiay umel agpukkawto a siraragsak.”—Isaias 35:5, 6.
Kinawadwad ti Taraon
“Addanto kinaruay ti bukel iti daga; addanto panaglaplapusanan agingga iti tapaw dagiti bantay.”—Salmo 72:16.
Talna
“Umaykayo, dakayo a tattao, imatanganyo dagiti aramid ni Jehova, no kasano nga impasdekna dagiti nakaskasdaaw a pasamak ditoy daga. Pasardengenna dagiti gubat inggana iti ungto ti daga.”—Salmo 46:8, 9.
NO ANIAT’ RUMBENG NGA ARAMIDENYO
Aniat’ rumbeng nga aramidenyo tapno matagiragsakyo dagitoy a bendision nga inkari ti Dios? Sumungbat ti Biblia idiay Juan 17:3: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” Wen, babaen iti panangammo iti Dios—ti naganna, panggepna, ken linlintegna—magun-odantayo ti umiso a panangiwanwan. Kanayonanna pay, babaen ti panangammo ken Jesus—ti biagna ditoy daga, ti subbot a datonna agpaay kadagiti basoltayo, ti saadna kas Agturay iti Pagarian ti Dios—makapagtalektayo a matungpalton ti panggep ti Dios.
Ti panangipalubos ti Dios iti kinadakes ti nabatad a nangipabigbig a ti tao, a nayarig iti biahero iti di pamiliar a lugar, dina maiturong dagiti bukodna nga addang. (Jeremias 10:23) Kinapudnona, babaen iti nagadun a gobierno—manipud kinadiktador agingga iti demokrasia—pinagreggetan ti tao ti tunggal wagas a mapanunotna. Ngem, limitado latta ti balligina.
Anian a yamantay ta ti Pagarian ti Dios ti mangsungbatton iti kararag a yeb-ebkas ti minilion: “Maaramid koma ti pagayatam, kas sadi langit, kasta met iti rabaw ti daga.” (Mateo 6:10) Matagiragsakton ditoy daga dagiti pammendision ti Pagarian ti Dios inton sukatannan amin a natauan a gobierno. Ikari ti Biblia: “Kadagiti al-aldaw dagita nga ar-ari ti Dios ti langit mamangonto ti maysa a pagarian a ni kaanoman dinto madadael. Ket ti panagturayna dinto maited iti sabali nga ili. Dadaelennanto ken ibusenna amin dagitoy a pagpagarian, ket isu agtalinaedto iti panawen a di nakedngan.”—Daniel 2:44.
Anian a nagdayagto dayta a tiempo! Ti pannakaammo iti Biblia talaga a mapabilegna ti namnamatayo. Wen, dagitoy ti nariribuk a panawen—ken kumarkaro pay. Ngem dayta paneknekanna laeng nga agbibiagtayon iti maudi nga al-aldaw daytoy nadangkes a sistema ti bambanag. Din agbayag, dagitoy a dakes a panawen sukatanton ti kasayaatan a panawen iti sidong ti Pagarian ti Dios!