Agtultuloy a Nakasagana Agpaay iti Naraniag a Masakbayan
“AGTULTULOY a nakasagana,” indagadag ni Jesus. (Lucas 12:40) No aramidentayo dayta, inton umay ni Kristo “agraman pannakabalin ken dakkel a dayag,” makapagtignaytayo a buyogen ti rag-o iti imbilinna: “Tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.”—Lucas 21:27, 28.
Ania a kita ti pannakaispal? Ay ket, ti kita ti pannakaispal a tinagiragsak ni Noe ken ti pamiliana—wen, pannakailasat iti panungpalan daytoy a lubong! “Ti lubong aglabas,” insurat ni apostol Juan, “ngem ti mangaramid iti pagayatan ti Dios agtalinaed iti agnanayon.”—1 Juan 2:17.
Iti baro a lubong ni Jehova, tagiragsakento dagiti naindagaan nga iturayan ti Ari, ni Jesu-Kristo, ti agnanayon a biag. “Dagiti nalinteg a mismo tagikuaendanto ti daga,” kuna ti Biblia, “ket agtaengdanto nga agnanayon iti dayta.” (Salmo 37:29) Anian a nakaskasdaaw a masanguanan ti inkari ti Dios agpaay iti ilina! “Ti Dios a mismo addanto kadakuada,” kuna ti Saona. “Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” Agpayso daytoy a padto!—Apocalipsis 21:3, 4.
Ngem, tapno matagiragsak daytoy a masakbayan, masapul nga agtignaykayo. Ti pananggun-od ti pannakaammo isut’ nasken nga umuna. Ilawlawag ti Biblia: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.
Masapul met a makitiponkayo a kanayon kadagiti sabsabali a mangsapsapul itoy a pannakaammo, kas indagadag ti apostol: “Ket agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa . . . ket nangnangruna a kasta bayat a makitkitayo a ti aldaw umas-asidegen.” (Hebreo 10:24, 25) Kinapudnona, makitkita ti ili ni Jehova nga umad-adanin ti aldaw ti pannakaisalakan a mangiserrek iti baro a lubong ti Dios, isu nga aglatlatakda iti sangsangkamaysa a panaggigimongda.
Iti panagkomentona iti panagtitipon iti maysa a dakkel nga istadium, impadamag ti Sunday Telegraph ti Londres: “Awan ti kadawyan a panagliday a makita kadagidiay a mangiwaragawag a ‘Ti Panungpalan Asidegen.’ Nalabit [patien dagiti Saksi] nga asidegen ti panungpalan. Kabayatanna, tunggal maysa ti kasla mangtagtagiragsak iti natalna, nalinteg, Nadiosan ngem naragsak a kasasaad.” Kalpasanna, innayon ti periodiko: “No talaga a dandanin marbek ti agdama nga urnos ti lubong, dagiti Saksi sadiay Twickenham ti kasla nakasaganan a naimbag a mangorganisar iti baro a lubong nga urnos.”
Ti naynay a panagsagana kaipapananna ti panagtultuloy nga okupado, a mangar-aramid iti trabaho a kas iti inaramid ni Noe, a nagserbi idi al-aldaw sakbay ti Layus kas “manangaskasaba iti kinalinteg.” (2 Pedro 2:5) Ti panagtultuloy a nakasagana kaipapananna met ti pannakiraman “kadagiti nasantuan a panagbibiag ken ar-aramid ti nadiosan a debosion.” Maawiskayo, wen, maparegtakayo, a makikadua iti ili ni Jehova a ‘mangur-uray ken agtalinaed a silalagip unay iti kaadda ti aldaw ni Jehova.’—2 Pedro 3:11, 12.