Agimtuod Dagiti Agtutubo . . .

Pudno Kadi a Makapagbalinak a Gayyem ti Dios?

AGBALIN a gayyem ti Dios? Imposible, kuna ti 20-ti-tawenna a ni Doris. “Nakanumnumoak ken di maikari a magustuan ti asinoman,” insennaay daytoy a balasang. “Likliklikak payen ti agkararag ken Jehova a Dios agsipud ta mariknak a diak maikari nga umadani kenkuana.” Iti kaunggan a rikriknada, marikna ti dadduma nga agtutubo a dida pulos a maikari a gayyem ti Dios. Nupay mabalin nga apresiarenda ti kapanunotan nga agbalin a gayyem ti Dios, mariknada a dida maaramidan dayta. Nakariknakayo kadin iti kasta?

No dadduma, dagiti bukodna a pagkapuyan ti mangiparikna iti maysa nga agtutubo a di pay ketdin maikari nga umadani iti Dios. Alaentayo kas pagarigan, ni Michael. Kunaenna a sakbay a naapresiarna dagiti nadiosan a banag, isut’ “agbibiag iti gistay isuamin a dakes ken makadangran a kapanunotan ken aramid.” Nupay kasta, ti naadalna iti Biblia ti nangipabigbig kenkuana a pagladladingiten ken papaayenna gayamen ti Dios. Inlawlawagna: “Pinagminar kaniak ti tunggal gimong iti kongregasion ti uray maysa kadagiti nagadu a salungasingko. . . . Diak matukod no mapakawannak pay laeng ni Jehova iti kasla aglaplapusanan a basolko idinto ta diak pay mapakawanen ti mismo a bagik.”

Iti dadduma a kasasaad, ti panangtrato ti dadduma iti maysa nga agtutubo ti mangiparikna kenkuana a di maikari a makigayyem ken Jehova. Kas pagarigan, ni Doris, a naadaw itay, ket binaybay-an ni inana sipud pay idi ubing. Impudnona: “Iti panagkunak awan ti mangdungdungngo kaniak. No ti bukodko nga ina ken pamiliak binaybay-andak, adda aya posibilidad nga addanto pay la mangipateg kaniak?” No ti maysa nga agtutubo ket natagibassit ken naabuso sipud pay kinaubingna, mabalin a sipapasnek a patienna nga isut’ di kayat a pulos ti Dios kas gayyem.

Iti kasumbangirna, mabalin a ti maysa nga agtutubo ket gayyem idi ti Dios ngem, gapu iti pagkapuyanna, nakaaramid iti nadagsen a basol. Napasamak daytoy ken Tracy. “Mabainak unay,” isennaay daytoy nga agtawen iti 21, “napalalo ti sakit ti nakem ken basolko. Nasairko unay ni Jehova nga Amak.”

Nalabit masarakanyo ti bagiyo iti maysa kadagiti umasping a kasasaad. Ngem adda namnama: Makapagbalinkayo a gayyem ti Dios!

No Apay a Makapagbalinkayo a Gayyem ti Dios

Pudno a makalapped dagiti salungasing iti maysa nga agbalin a gayyem ti Dios. Naimbag ta ti naayat nga Amatayo ti immun-unan a tumulong kadatayo. “Ti Dios irekomendana ti bukodna nga ayat kadatayo iti banag a, bayat a managbasoltayo pay laeng idi, ni Kristo natay a maipaay kadatayo,” insurat ni apostol Pablo. (Roma 5:8) Babaen ti ipapatayna, binayadan ni Jesus ti subbot a mangwayawaya kadagiti manangapresiar a tattao manipud iti naan-anay a panangdominar ti basol. (Mateo 20:28) Isu a kinuna pay ti apostol: “Datayo ket kabkabusor idi ti Dios, ngem pinagbalinnatayo a gagayyemna babaen ti ipapatay ti Anakna.”​—Roma 5:10, Today’s English Version.

Sakbay a maapresiarda dagiti pagalagadan ni Jehova, mabalin a naigamer iti nadagsen a basol ti dadduma nga agtutubo, a kas ken ni Michael a nadakamat itayen. Ngem, babaen iti daton a subbot ni Jesus, mabalin a mapakawan ti maysa a tao kadagiti napalabas a basolna, kasano man kadagsen dagitoy. Ited ti Biblia daytoy a makabang-ar iti puso a pammatalged: “No ipudnotayo dagiti basoltayo, isu matalek ken nalinteg tapno pakawanennatayo kadagiti basoltayo ken tapno dalusannatayo manipud iti amin a kinakillo.” (1 Juan 1:9) Nupay kasta, masapul nga aramiden ti maysa a tao dagiti pamay-an a mangipakita iti Dios nga apresiarenna ti kasta a panangdalus. Ibaga ni apostol Pablo ti maysa a prinsipio a mayaplikar: ‘“Ket isardengyo ti mangsagsagid iti di nadalus a banag,” kuna ni Jehova, “ket awatenkayto. Ket agbalinakto nga ama kadakayo”’ (2 Corinto 6:17, 18) Anian a makaay-ayo a maammuan a no agbalbaliw ti maysa a tao kadagita a basol ken sipapasnek nga agbabawi, situtulok ti Dios a manganamong kenkuana kas maysa a gayyem.

Dagiti ngay agtutubo a napadakkel iti abusado nga aglawlaw? Bigbigenyo a ti Dios dina ibilang dagiti tattao a nakabasol iti naaramid kadakuada a maisalungasing iti pagayatanda. Dagita a tattao ket biktima imbes a nakiraman iti basol. Laglagipenyo met, a saan nga agpannuray ti pategyo kas maysa a tao iti panangukom ti sabali a tao. Agbalin a Gayyemyo ni Jehova agpapan pay iti kasasaadyo. Ni Maureen ket pinadakkel ti maysa a Kristiano nga ina iti pagtaengan a napno iti kinaranggas maigapu iti mammartek nga amana. Kaskasdi, kinunana: “Agpapan pay amin dagitoy a narigat a kasasaad, uray kaskasano ket napatanorko ti relasionko ken Jehova. Isut’ naam-ammok kas Daydiay pulos a di nangbaybay-a kaniak.”

Kasanon No Makaaramidkayo iti Nadagsen a Basol?

Nakaaramid ni Doug, a pinadakkel dagiti nadiosan a nagannak, iti seksual nga imoralidad idi agtawen iti 18. Maigapu daytoy kadagiti dakes a kakuykuyogna. “Ammok idi a dakes, ngem intultuloyko nga inaramid agsipud ta kayatko ti ag-good time,” impudno ni Doug. Idi agangay, naamiris ni Doug a minamaag ti kursona. Inaminna: “Naamirisko a gunggundawayandak laeng dagiti amin a makuna a gagayyemko tapno makuartaandak wenno ag-good time-da.” Isu nga inyaplikarna dagiti pamay-an a mangisubli iti pannakigayyemna ken Jehova. Ngem adda dakkel a nanglapped iti irarang-ayna.

“Ti kangrunaan a banag isu a narigatanak nga agsubli isut’ pannakariknak a saanakon a maikari,” impudno ni Doug. “Impagarupko no isuamin a naaramidak ket dakes iti imatang ni Jehova. Ti pannakaammok no kasanot’ kinaimbagna ken no kasanot’ panangan-anusna kaniak, kasla awanen ti panggapuanna a mangpakawan kaniak, agsipud ta nakadakdakesak.” Kaskasdi, naparukma ni Doug daytoy a lapped babaen iti tulong ti panglakayen ti kongregasion ken babaen iti panangusig a naimbag iti salaysay ti Biblia maipapan ken Manases.

Asino ni Manases? Maysa idi nga ari ti kadaanan a Juda. Ipakita ti Biblia nga isut’ sinursuruan ti nadiosan nga amana a ni Ezekias, tapno ayatenna ni Jehova. Ngem kalpasan a pimmusay ni amana ket nagbalin nga ari idi agtawen ti 12, impagarupna a maaramidnan ti kaykayatna. Insukatna ti panagdayaw ken ni Jehova iti panagdayaw ken Baal. Ti kasta a panagdayaw ket napakuyogan iti imoral unay ken nagaramugam a panaglablabes iti sekso. “Nagaramid [ni Manases] iti adu a dakes iti imatang ni Jehova, a panggargarina kenkuana nga agpungtot.” Babaen kadagiti matalek a pannakangiwat, “ni Jehova nagsao ken Manases ken ti ilina, ngem saanda nga impangag.” Kalpasanna, kas ebkas ti panangukom ni Jehova, naipan ni Manases idiay Babilonia kas nakawaran a balud.​—2 Cronicas 31:20, 21; 33:1-6, 10, 11.

Idi inut-utob ni Manases ti napalabas nga ar-aramidna sa indiligna ida iti malagipna a sagudayen ti linlinteg ni Jehova, isut’ nalapunos iti nakabasol a rikna isu a nagpakpakaasi iti pammakawan. Impakumbabana ti bagina iti imatang ti Dios ket “intultuloyna ti nagkararag Kenkuana.” Ket ti Dios “isu inimdenganna ken impangagna ti ararawna ket naisubli manen idiay Jerusalem iti pagarianna.” Wen, “ti Ama dagiti nadungngo nga asi” ket situtulok a mangipalubos iti daytoy agbabbabawi a managbasol nga umadani manen kenkuana. Kalpasan nga immawat iti kasta nga asi, ni Manases, babaen ti bukodna a kapadasan, “nabigbigna [ita] a ni Jehova isu ti pudno a Dios.”​—2 Cronicas 33:12, 13; 2 Corinto 1:3.

No inawat manen ni Jehova ni Manases, sigurado a palubosanna met ti simmukir nga agtutubo ita a makirelasion manen Kenkuana la ketdi no ipakita ti agtutubo nga agbabbabawin. Nagtignay ni Doug iti tulong dagiti naespirituan a pastor iti kongregasionna. Isut’ natulongan a makaawat a silalawag a ti Dios “saanto a kankanayon a mangbabalaw, ket dinanto met ing-ingpen a kanayon ti pungtotna.”​—Salmo 103:9.

Agtalinaedkayo Kas Gayyem ti Dios

Apaman nga agbalinen a Gayyemyo ti Dios, rumbeng nga ipategyo daytoy a relasion tapno mataginayonyo dayta. Nagbalin a di naikasar nga ina ti maysa a 18-ti-tawenna a nabautisaran a balasang. Agpapan pay iti dayta, isut’ natulongan a mangilinteg kadagiti bambanag ken ni Jehova. (Kitaenyo ti Isaias 1:18.) Ti makagapu iti panagbalbaliwna? “Naadalko a ni Jehova ket maysa a naayat nga Ama ken saan a manangpapatay,” inlawlawagna. “Naamirisko nga isut’ nasair iti naaramidak. Nakapatpateg ti agpannuray iti Dios kas maysa a Gayyem, nga addaan emosion, ken saan a basta di makita nga Espiritu a pagraeman ngem pulos a di ay-ayaten.” Kas ken Manases, isut’ natignay a makiraman a naan-anay iti panagdayaw ken Jehova. (2 Cronicas 33:14-16) Napaneknekan a salaknib daytoy kenkuana. Balakadanna ti sabsabali nga agtutubo: “Ikagumaanyo a dayawen ni Jehova uray pay no narigat ti kasasaad. Siaayat a palanasento manen ni Jehova ti dalanyo.”

Napateg met a makigayyemkayo kadagiti gagayyem ti Dios. Nupay kasta, liklikanyo a naan-anay dagidiay nalawag nga awan panagraemda kadagiti nadiosan a prinsipio. (Proverbio 13:20) Nakaaramid ni agtutubo a Linda iti seksual nga imoralidad iti agtutubo a ti pannakigayyemna ket nagbalin a “napatpateg ngem iti aniaman.” Kalpasan ti naespirituan nga iyuungarna, inamin ni Linda: “Madadaelmo ti intero a biagmo no awan ti personal a singgalutmo ken Jehova.”

Adda kadi kasta a singgalutyo? No awan, ikagumaanyo a magun-odan dayta. Gupgopen ni Linda ti kinapateg ti pannakigayyem iti Dios iti panagkunana: “Ti kapatgan a banag iti intero a lubong isut’ naimbag a personal a relasion ken Jehova. Awan asinoman a lalaki wenno babai iti daytoy a lubong a napatpateg ngem iti dayta. No awan ti pannakigayyem ken Jehova, ngarud, awanen ti aniaman pay a napateg.”

[Ladawan iti panid 15]

Mabalin a marikna ti dadduma nga agtutubo a saanda a maikari kas gayyem ti Dios