Ti Panangmatmat ti Biblia

Pannakikamalala​—Pakawanen Wenno Di Pakawanen?

“PAKAWANENYO ti aniaman nga adda kadakayo a maibusor iti asinoman; tapno ni Amayo nga adda iti langlangit pakawanennakayo met kadagiti labsingyo.” (Marcos 11:25) Nangpataud dagidiay a sasao ni Jesus iti sumagmamano a narikut a salsaludsod iti kaso a ti panagasawa ket riribuken ti pannakikamalala: Rumbeng kadi a pakawanen ti awan basolna a Kristiano ti asawana ket pagtalinaeden ti panagasawa? No ikeddengna ti makidiborsio, madadaelna kadi ti relasionna iti Dios? Kitaentayo no kasano a makatulong ti Biblia a mangsungbat kadagitoy a saludsod.

Rumbeng Kadi a Kanayon a Mangpakawankayo?

Dagiti kadi sasao ni Jesus a “pakawanenyo ti aniaman nga adda kadakayo a maibusor iti asinoman,” kaipapananna nga iti isuamin a kasasaad​—agraman ti pannakikamalala ti asawa​—ket obligado ti maysa a Kristiano a mangpakawan? Nasken nga awaten ti kinuna ni Jesus a maitunos iti dadduma a komentona maipapan iti pammakawan.

Kas pagarigan, naammuantayo ti nagpateg a prinsipio maipapan iti panangpakawan manipud kadagiti sasao ni Jesus a nairekord idiay Lucas 17:3, 4: “No ti kabsatmo makaaramid iti basol babalawem, ket no agbabawi pakawanem. Uray no agbasol iti mamimpito iti maysa nga aldaw a maibusor kenka ket agsubli kenka iti mamimpito, a kunkunana, ‘Agbabawiak,’ masapul a pakawanem.” Sigurado a kadagiti kaso ti nadagsen a basol, maparegta ti nakabasolan nga ikagumaanna a pakawanen no adda napasnek a panagbabawi. Matmatan ni Jehova a mismo dagiti bambanag iti daytoy a pamay-an; tapno maawattayo ti nadiosan a pammakawan, masapul a sipapasnek nga agbabawitayo.​—Lucas 3:3; Aramid 2:38; 8:22.

Ipakita met daytoy, nupay kasta, a no ti nakikamalala nga asawa ket di agbabbabawi, a dina bigbigen ti basolna, nalawag a mabalin a pilien ti di nakabasol nga asawa ti di mangpakawan.​—Idiligyo ti 1 Juan 1:8, 9.

Panangpakawan​—Dagiti Ngay Ibunga ti Panagbasol?

Ngem kasanon no agbabbabawin ti nakikamalala? No adda panagbabawi, adda pakaibatayan ti panangpakawan. Ngem ti kadi pannakapakawan kaipapananna a mailisin ti nakabasol kadagiti amin a bunga ti dakes a kursona? Usigenyo ti sumagmamano a pagarigan ti pammakawan ni Jehova.

Idi nagrebelde dagiti Israelita kalpasan nga impangagda ti patigmaan ti sangapulo nga espia a nangisangpet iti dakes a damag maipapan iti daga ti Canaan, nagpakaasi ni Moises ken Jehova: “Pakawanem, dawatek kenka, ti kinadakes daytoy nga ili.” Simmungbat ni Jehova: “Pakawanek kas mayabuloy iti saom.” Kaipapanan kadi daytoy a nakalisi dagiti nagbasol iti aniaman nga ibunga dagiti tignayda? Intuloy ni Jehova: “Ngem amin dagidiay a tattao a . . . dida impangag ti timekko, didanto makita ti daga nga insapatak kadagiti ammada.” (Numeros 14:19-23) Tinungpal ni Jehova ti saona; dayta a lallakay a kaputotan​—malaksid da Josue ken Caleb​—dida nakita ti Naikari a Daga.​—Numeros 26:64, 65.

Umasping met, idi binabalaw ni propeta Natan ni Ari David gapu iti basolna ken ni Bat-seba, binigbig ni agbabbabawi a David: “Nagbasolak a maikaniwas ken Jehova.” Kalpasanna, kinuna ni Natan ken ni David: “Ni Jehova inikkatna ti basolmo.” (2 Samuel 12:13) Ngem, nupay pinakawan ni Jehova ni David, sinagaba ni David iti unos ti panagbiagna dagiti imbunga ti basolna.​—2 Samuel 12:9-14; kitaenyo met ti 2 Samuel, kapitulo 24.

Dagitoy a pagarigan ti nadiosan a panangpakawan itampokna ti napateg a leksion: Agsagabatayo no agbasoltayo. (Galacia 6:7, 8) Ti agbabbabawi a managbasol, nupay mabalin a mapakawan, dina maliklikan dagiti ibunga ti dakes a kursona. Kaipapanan kadi daytoy a ti awan basolna nga asawa mabalinna a pakawanen ti nakikamalala​—uray kaskasano ket palabsen ti kasta unay a panagsintirna​—ket kaskasdi ikeddengna nga isut’ idiborsiona?

Panangpakawan ken Diborsio

Kabayatan ti ministeriona, iti namitlo nga okasion, nagsao ni Jesus maipapan iti diborsio. (Mateo 5:32; 19:3-9; Lucas 16:18) Makapainteres, awan a pulos uray naminsan kadagitoy a diskusion a nadakamat ni Jesus ti panangpakawan. Kas pagarigan, kas masarakan iti Mateo 19:9, kinunana: “Siasinoman a mangidiborsio iti asawana a babai, malaksid iti pakaibatayan a pannakiabig, ket mangasawa iti sabali makaaramid iti pannakikamalala.” Babaen ti panagkunana, “malaksid iti pakaibatayan a pannakiabig,” binigbig ni Jesus a ti seksual nga imoralidad ti mangted iti awan basolna nga asawa iti kalintegan, wenno Nainkasuratan a “pakaibatayan,” a mangidiborsio. Ngem, saan a kinuna ni Jesus a ti awan basolna rumbeng a makidiborsio. Kaskasdi, silalawag nga imparipiripna a mabalinna nga aramiden dayta.

Ti panagasawa ket maysa a singgalut a mamagkaykaysa iti dua a tao. (Roma 7:2) Ngem no di agmatalek ti maysa kadakuada, mabalin a mapugsat ti singgalut. Kadagita a kasasaad, ti awan basolna nga asawa ket talaga a maipasango iti dua a pangngeddeng. Umuna, rumbeng kadi a mangpakawan? Kas nakitatayon, ti napateg a banag ditoy ket no ti nakikamalala ket sipapasnek nga agbabbabawi wenno saan. No adda panagbabawi, mabalin nga inton agangay, mangpakawanto ti awan basolna nga asawa​—uray no panangpalabas laeng iti panagsintir.

Ti maikadua a pangngeddeng ket, rumbeng kadi nga idiborsiona? Apay a tumaud daytoy a saludsod no isut’ pinakawannan?a Bueno, kasano no adda nainkalintegan a pakaseknanna maipapan iti kinatalgedna ken ti annakna, nangruna no ni lakayna ket abusado iti napalabas? Wenno kasano no pakadanaganna a di la ket ta maimpektaran iti iyakar ti sekso a sakit? Wenno mariknana unay a gapu iti panangliputna, dinan mabalin ti agtalek kenkuana iti relasionda kas agassawa? Kadagita a kasasaad, talaga a mapanunot ti awan basolna nga asawa a pakawanen ni nakabasol nga asawana (iti kaipapanan a palabsennan ti panagsintir) ngem kaskasdi nga ikeddengna nga idiborsio agsipud ta dinan kayat ti makikabbalay kenkuana. Mabalin a makatulong ti panangpalabas iti panagsintir tapno mapagballigianna ti panagbiagna. Mabalin a kasapulan met nga ad-addan a naibatay iti linteg ti aniaman a masanguanan a pannakilangen iti nakikamalala.

Maysa a personal a pangngeddeng ti panangidiborsio iti di matalek nga asawa, banag a rumbeng a maaramid kalpasan a siaannad ken sikakararag a natingitingen ti awan basolna nga asawa ti isuamin a banag a nairaman. (Salmo 55:22) Awan kalintegan dagiti sabsabali a mangdiktar wenno mangpilit iti awan basolna nga asawa tapno ikeddengna ti makidiborsio wenno saan. (Idiligyo ti Galacia 6:5.) Laglagipenyo a di imbaga ni Jesus ti aramiden ti awan basolna nga asawa. Nalawag, ngarud, a saan a kaluksaw ni Jehova dagidiay pinilida ti makidiborsio maigapu kadagiti umiso a Nainkasuratan a pakaibatayan.

[Dagiti Footnote]

[Picture Credit Line iti panid 10]

Life