Ti Disiplina ti Nakaisalakanak
IDI uppat ti tawenko, impalistadak dagiti nagannakko iti maysa a klase ti calisthenics. Kinalikaguman dayta ti panagensayo, ket masapul idi nga agsanayak a kadua ti dadduma a babbalasitang. Di nagbayag, nagsanayakon tapno agbalin a sumasala. Nagbalin a paset iti biagko ti disiplina.
Agpayso a manangdisiplina dagiti nagannakko ket ninamnamada a dumakkel dagiti annakda a nadayaw, nasingpet, ken managraem. No dadduma, ipagarupko idi a saanda a nainkalintegan, ngem ita no lagipek ti napalabas—ita ta nakapadakkelak metten iti tallo nga annakko—maawatak ti kinapateg ti disiplina. Kinapudnona, agyamanak kadagiti nagannakko iti kasta unay a panangtaripatoda kaniak.
Ti nasapa a panangsanayko iti disiplina iti bagi, agraman ti pannakipagtrabahok iti maysa a timpuyog ket timmulong kaniak idi agangay iti biag.
Panangsaranget Kadagiti Pakarigatan
Idi walon ti tawenko, nakaalaak iti rheumatic fever, maysa a sakit a nangidalit kaniak. Nagsagabaak iti nakaro nga ut-ot iti agpada a tumengko, ket di naipalubos a magnaak iti 12 a bulan. Ti nadungngo a pamiliak ti mangubba kaniak iti uray sadinoman. Awan idi ti mangipagarup a makapagsalaak manen. Ngem maigapu unay iti panangtaripato dagiti nagannakko, agraman ti kinalaing ken anus ti doktor ti pamiliami, naan-anay a nakaungarak saak nagsubli iti panagsalak nga ad-adda a determinado ngem idi damo tapno agbalinak a kalaingan a sumasala.
Pinalubosandak dagiti nagannakko a panawan ti regular a panageskuela idi agtawenak iti 16 tapno maitultuloyko ti karerak kas maysa a sumasala. Inaramidko daytoy buyogen iti kinaregta ken kinapinget. Nagtungpalanna, nangrugiakon a nagsanay iti classical ballet. Ad-adda a disiplina ti bagi ti kinalikaguman daytoy. Nagadal ken nagsanayak iti tallo ket kagudua a tawen, innem nga aldaw iti kada lawas.
Idi agtawenakon iti 19, naangay dagiti audition agpaay iti Australian Ballet School. Nainget ti pannakisalip tapno maawat iti daytoy a natan-ok nga eskuelaan. Manmano laeng ti mapili manipud iti intero nga Australia. Naragsakanak ta maysaak kadagidiay napili. Isu a nangrugi ti 18 a bulan ti naganetget a panagsanay. Ti panageskuela ramanenna dagiti klase iti ballet, mime, drama, ken arte. Ti ballet ket maysa a nangayed a kita ti panagsala, ngem kalikagumanna ti pudno a pigsa tapno agparang a kasla nakalaklaka. Isu a tapno mapapigsa dagiti gurongmi, inaramidmi ti naiprograma a panagehersisiomi iti maysa a gymnasium.
Kamaudiananna, idi Hunio 1970, naangay dagiti audition agpaay ti Australian Ballet Company. Napiliak manen, ket iti unos ti makalawas nakikaduaakon iti kompania.
Biag iti Naiduma a Lubong
Sakbay a maammuak ti mapaspasamak, awanakon idiay balay iti damo unay iti biagko ket kapilitan nga aggianak iti naiduma unay nga aglawlaw. Nagpasiar ti kompaniami iti Australia, ket kalpasanna napankami iti Asia. Kasla panagbiag dayta iti sabali a lubong nga adda bukodna a pagannurotan ken pagalagadan. Addada napaut nga aldaw ken rabii ti panagtrabaho, agraman ti panagletteg, pannakasugat, ken panagkapuyo ti saka. Ngem dagiti panagpabuya ti namagbalin iti panagregget a makagunggona. Makaparagsak ti agpabuya iti entablado.
Kalpasan a nagsublikami idiay Australia, dimteng ti saplit ti trangkaso iti kompania, a nakaigapuan ti di panagpabuya ti kaaduan kadakami. Diak nakapagsala iti tallo a bulan. Idi agsubliak iti kompania ti ballet, nangrugin a marigatanak iti biag ti maysa a sumasala—kanayon ti panangikagumaak a di agkamali ken liklikan ti aniaman a kita ti sosial nga aramid iti ruar ti ballet, tangay ti tiempo ken bannog lapdanna ti sosial a panagbiag. Kalpasan amin a tawen ti panagsanayko, daytoy kadi idin ti pagpatinggaan ti karerak?
Nangrugin a naaddaanak iti di nasin-aw, agkakanat a rikna. Nakaro ti panagpaknik ken panangiputputongko iti bagik. Kamaudiananna, agarup makatawen kalpasanna, nagsakitak iti nakaro nga allergy a maawagan urticaria. Kas banagna, addada limteg iti intero a bagik a nagatel, nalabaga a bukol a nagraraay agingga a limmabbasit ti intero a bagik. Daytoy ti kangrunaan a makagapu—a nagikkatak manipud iti Australian Ballet Company. Adu a bulan ti limmabas sakbay a nakaungarak. Inaywanandak manen dagiti nagannakko agingga a nakaungarak.
Panagasawa ken Maysa a Pamilia
Idi 1974, naam-ammok ti maysa a nagsayaat nga agtutubo a lalaki. Isut’ maysa nga aktor nga adda bukodna a negosio. Nagkasarkami ken nagbiahe iti intero nga Europa. Apagsublimi idiay Australia, naipasngay ti inauna nga anakmi, ni Justin, idi 1976. Idi agangay, immakarkami idiay Perth, ti kabesera ti Makinlaud nga Australia, ket gimmatangkami iti maysa a hotel. Anian a panagbalbaliw iti estilo ti panagbiag ti kaipapanan daydi!
Napalalo ti kaadu ti trabaho, tangay inkagumaanmi a dakami a mismo ti mangimanehar iti hotel. Bumangonak iti alas kuatro ti agsapa ket no dadduma diak pay malpas ti trabaho agingga iti sumaganad nga agsapa. Mainayon pay iti dayta a rigat, addada napigsa nga impluensia ti demonio iti hotel. Daytoy ti in-inut a nangapektar iti biagmi, nangnangruna iti biag ti ing-ingungotek nga asawa. Isu a kalpasan ti tallo a tawen, maigapu iti problemami nga agassawa ken kuarta, inkeddengmi nga ilako ti hotel ken urnosen ti panagasawami.
Dimmakkel ti pamiliami iti lima idi naipasngay ti dua a babbalasangmi, da Bianca ken Victoria. Saan a dagus a nailako ti hotel, ket kabayatan daytoy a tiempo a sinapulko ti Dios agpaay iti tulong. Nalagipko ti kararag nga Amami nga inkabesak idi ubingak pay. Sangkalagipko, ken kanayon nga ilulualok dayta.
Kamaudiananna, nalakon ti hotel. Nupay kasta, pimmusay ni lakayko gapu iti aneurysm tallo laeng a lawas sakbay a panawanmi ti Perth tapno mapankamin idiay Melbourne. Agtawen laeng idi iti 32. Napalalo ti lidayko, ket saan a naep-ep idi kinuna kaniak ti maysa a Katoliko a padi idiay Melbourne a maigapu iti pannakiapa ni lakayko idi kadagiti demonio, sigurado nga addanto met dakes nga impluensiada kaniak. Isu a winarsiannak iti agua “bendita” ken dagiti annakko ken ti tunggal siled iti pagtaengan ni nanangko, nga isut’ paggigiananmi idi.
Salsaludsod a Di Pay Nasungbatan
Limmabas ti sumagmamano a tawen, ket nagtultuloy a nagsaludsodak maipapan iti Dios, ngem awan naawatko nga aniaman a makapnek a sungbat manipud iti relihionko a Katoliko. Inkeddengko ngarud nga iyakar ti pamiliak manipud Melbourne iti Queensland, a sadiay nabarbara ti klima. Idiay Brisbane, sireregta a nakiramankam iti ar-aramid ti simbaan. Nageskuela dagiti ubbing iti Katoliko nga eskuelaan, ket regular a nakimismisakami, nagayunar, nag-Rosario, ken inaramidmi ti impagarupko a kalikaguman ti Dios kadakami.
Tangay saan a nasungbatan dagiti saludsodko, inkeddengko a pribado a basaek ti maysa a paset ti Biblia iti kada aldaw tapno maammuak no masarakak dagiti sungbat a bukodko. Nagtungpalanna, nabasak ti Mateo 7:7, a namagsiddaaw kaniak. Basta kinunana nga itultuloyko ti agdawat ken agsapul. ‘Nalaka daytoy,’ kinunak. Isu a basta inaramidko dayta. Intultuloyko ti nagkiddaw iti Dios agpaay iti tulong tapno magun-odak ti sungbat dagiti saludsodko.
Naipaay Met Laengen Dagiti Sungbat
No lagipek ti napalabas, patiek a saan a naiparna ti panagtuktok dagiti Saksi ni Jehova iti ruanganko di nagbayag kalpasan dayta. Kasla nakaskasdaaw ti kinunada. Nupay dimngegak buyogen ti panaginteres, diak nabigbig a daytoy ti nabayagen a birbirokek. Isu a kalpasan ti sumagmamano a panagsarungkar, imbagak kadagiti babbai a simmarungkar kaniak a didan agsubsubli.
Okupadoak unay iti dayta a tiempo idi nasapa a paset ti 1987. Ti balayko ket madama idin a malpas a maretubar, ket kasapulan ti maysa a nalaing nga agpintura tapno mairingpasen ti intero a proyekto. Nangirekomendar ti nangretubar iti mannakigayyem, managraem, ken manangtulong nga agtutubo nga agpintura nga agnagan Peter. Siaayat nga inestoria ni Peter maipapan iti asawa ken annakna, ken nagsayaat, nadalus ti langlangana. Kayatko a kasta met ti panaglanglangak, isu a dinamagko iti maysa nga agsapa kabayatan nga ur-urnosenna ti andamio: “Sadinot’ pakimismisaanyo?”
Apaman a naammuak a maysa kadagiti Saksi ni Jehova, adut’ damagek apaman a sumangpet nga agtrabaho iti agsapa agingga a nabannogen iti malem. Ket nasungbatanna amin ida. Rinugiak ti nagadal aldaw ken rabii, ket nagbalin a makaparagsak ken napaypason ti Biblia. Gapu iti nalaus a ragsakko, immanamongak a makipagadal iti Biblia iti pagtaengan a kaduak ti intero a pamiliak. Daytat’ karagsakan a tiempo iti biagmi maigapu iti rag-o a naammuanmi a nasarakanmin ti kinapudno.
Imbellengmi amin a basurami—dagiti banag iti panunotmi ken sanikua a patienmi a mainaig iti idolatria. Naipanaw idiay balaymi ti nagadu a bag a napno iti basura ket naipan dagita iti pagbasuraan. Di nagbayag siraraem a nakiddaw kadagiti annakko a pumanawdan kadagiti Katoliko nga eskuelaan. Saan a naapresiar ti panangasabada maipapan ken Jehova.
Nagkaykaysa iti Pudno a Panagdayaw
Dakam nga uppat ket bautisado itan a Saksi. Nagturposen iti eskuelaan da Justin ken Bianca ket agserserbida itan iti amin-tiempo a ministerio kas payunir. Agtawen ni Victoria iti 16 ken ages-eskuela. Addaak metten iti maikanem a tawen ti kinapayunirko.
Binusbosmi ti innem a tawen iti kongregasion ti Brisbane, a sadiay tinulongak ti dua a babbaket a nangidedikar iti biagda ken ni Jehova a Dios idi agangay. Idi 1994, immakarkam iti maysa a lugar a dakdakkel ti pakasapulan kadagiti manangikasaba ti Pagarian. Ita agserserbikamin iti bassit nga ili a managan Charleville iti abagatan a laud ti Queensland. Naglawa ti sakupen ti teritoria a kasabaanmi, agarup kas iti kadakkel ti isla-estado ti Australia a Tasmania!
No lagipek ti kinaubingko ken ti panagsanayko, naamirisko no kasano a nagunggonaanak manipud iti disiplina. Daytat’ timmulong kaniak a mangyaplikar kadagiti prinsipio ti Biblia ken mangaramid kadagiti kasapulan a panagbalbaliw iti biag. Kinapudnona, ti disiplina ni Jehova ita ket mangyeg iti manayon a rag-o ken ti namnama nga agnanayon a gunggona agpaay kaniak ken iti ipatpategko a pamiliak.—Proverbio 6:23; 15:33.—Kas insalaysay ni Sue Burke.
[Ladawan iti panid 21]
Kaduak ti tallo nga annakko