Ti Kadadakkelan a Kayo ti Kasuy iti Lubong

BABAEN TI KORESPONSAL TI AGRIINGKAYO! IDIAY BRAZIL

TI KADADAKKELAN iti lubong? Sigun iti Guinness O Livro dos Recordes 1994, nalabit dayta ti kadadakkelan. Masarakan iti asideg ti kosta ti Rio Grande do Norte, ti kayo ti kasuy a nailadawan ditoy ket pudno a kadadakkelan idiay Brazil. Kinapudnona, daytoy maymaysa a kayo saknapanna nga agdama ti maysa a dakkel a bloke ti siudad​—a katupag ti 70 a kalalainganna ti kadakkel a kayo ti kasuy!

Ti kayo ti kasuy ket maysa a kayo a kankanayon a nalangto a gagangay a nadumaduma ti kadakkelna manipud bassit a mula agingga iti kayo nga agarup 20 metro ti katayagna. Dagiti babassit a sabong ti kayo ti kasuy maisupadi unay iti dadakkel, nakulbet a bulongna. Ti mabalin a kanen a bukelna isu ti naimas a bukel ti kasuy, nga agparang a kasla naipilit a nailumlom iti kasla-peras a bunga a maawagan iti bunga ti kasuy. Nakaskasdaaw, ti kayo a kasuy ket mainaig iti poison ivy, ket masapul a naannad dagidiay mangiggem iti dayta. Adda dua nga ukis ti bukel, ket iti baet dagitoy nga ukis adda lana a makapataud iti kapuyo iti kudil. Naimbag laengen ta ti panangituno ikkatenna ti sabidong ti bukel.

Karkarna, ti kasla bekkel ti langana a bukel dumakkel iti ruar ti bunga, a kasla nalipatan ti Namarsua ti bukel ket impigketna dayta kalpasanna. Ti bunga susuonenna ti bukel. Ngarud, awagan ti dadduma ti bukel a pudno a bunga ti kayo. Aniaman dayta, inton sumaganad a mangankayo iti bukel ti kasuy, nalabit kankanenyo ti bunga ti kadadakkelan a kayo ti kasuy iti lubong!