Itandudo ti Korte Suprema ti Norway ti Relihioso a Kalintegan

ANIA dagiti kasasaad a mamagbalin iti nagannak a di maikari a mangpadakkel iti anak? Iti aglawlaw ti lubong, daytoy a saludsod ti mapagsusupiatan unay kadagiti kaso maipapan iti panangaywan. Adu a banag ti mausig, agraman ti salun-at ti nagannak, kasasaad ti panagbiag, ken ti relasion iti anak.

Ngem ti ngay relihion? Maibilang kadi a di maikari ti maysa a naganak gapu laeng iti pammatina? Daytoy a saludsod ti nakaisentruan ti dangadang maipapan iti panangaywan idiay Norway a nakairamanan ti maysa kadagiti Saksi ni Jehova. Nasurok a dua tawenen ti napalabas ken naaramiden ti tallo a bista sakbay a narisut ti isyu idiay Korte Suprema ti Norway.

Nangrugi dayta idi 1988. Naan-anayen a nagsina dagiti nagannak idi Marso 1989, ket ti ina ti nangaywan iti balasitangda. Nagdarum ti ama iti korte, a kunana nga isut’ rumbeng a maikkan iti naan-anay a panangaywan iti balasitang. Imbagana a di kabaelan ti ina ti mangipaay iti normal, nasalun-at a panangpadakkel iti ubing ket ngarud maikkan laeng iti kalintegan a bumisita. Ti rason daytoy a panangaklon? Isut’ naitimpuyog kadagiti Saksi ni Jehova.

Iti panangsapulna ti “eksperto” a pammaneknek dagiti bumusbusor kadagiti Saksi ni Jehova, kinumbinsir ti ama ti korte a maikontra dagiti sursuro ken estilo ti panagbiag dagiti Saksi ni Jehova kadagiti kababalin ken nasayaat nga ugali a nasken iti makagunggona a panangpadakkel. Inkeddeng ti korte iti distrito ti 2 kontra 1 [a desision] a ti ubing rumbeng nga agtalinaed nga aywanan ti ina iti inaldaw, nga inikkanna ti ama iti kalintegan a bumisita. Inyapelar ti ama ti kaso iti nangato a korte. Manen, naitandudo ti pangngeddeng a 2-kontra-1 a ti ina ti inaldaw a mangaywan iti ubing. Nupay kasta, iti daytoy a tiempo naikkan ti ama iti at-atiddog a kalintegan a bumisita. Kasta met, uray pay dagiti hues a nangikeddeng a pabor iti ina ket kasla adda panagduaduada iti masakbayan ti ubing. Babaen itoy a nabilbileg a rason, inyapelar ti ama ti kaso iti Korte Suprema iti Norway.

Maminsan manen a binabalaw ti ama ti pammati dagiti Saksi ni Jehova. Makadangranto, kinunana, no dumakkel ti balasitangna iti sidong ti kasta nga impluensia.

Nupay kasta, naiduma ti panangmatmat ti Korte Suprema iti banag. Kas panangpatalged iti pangngeddeng a naipaulogen idi Agosto 26, 1994, indeklara ti immuna a hues ti korte: “Ti pannakimiembro ti ina kadagiti Saksi ni Jehova ket di makalapped iti panangyawat kenkuana iti inaldaw a panangaywan iti ubing.” Kinunana pay: “Makitak a nagsayaat ti kababalin ti ubing ken naragsak a balasitang. Kasla nagsayaat ti panangtamingna kadagiti parikut a tumaud gapu ta nagduma ti panangmatmat ti ama ken inana iti biag.” Ti konklusionna ket pinatalgedan nga interamente ti dadduma nga uppat a hues.

Apresiaren dagiti managayat iti kinapudno idiay Norway a naamiris a naimbag dagiti hues iti Korte Suprema dagiti ulbod a pammabasol a maibusor kadagiti Saksi ni Jehova. Babaen itoy a pangngeddeng, pinatalgedan ti korte ti wayawaya ti tunggal indibidual nga agdayaw iti Dios ken ipaay kadagiti annakna ti nabara a panangpadakkel nga itandudo dagiti prinsipio ti Biblia.a

[Footnote]