Nakaskasdaaw a Panagrana

“TI KARARAGSAKAN pay laeng a banag a napasamak iti biagko!” Kasta ti panangiladawan ni Kristie iti nakaskasdaaw a naranaanna. Kastoy met ngata ti nariknayo no nakapaglangoykayon a kadua dagiti dolphin idiay Gulf of Mexico?

Maragsakan ti amin no makitada dagiti dolphin nga aglanglangoy wenno mangar-aramid kadagiti nakaskasdaaw a tignay iti danum, kas iti pannagna a paatras babaen kadagiti ipusda, panaglagto iti danum iti nakaskasdaaw a kangato, wenno panangipalubosda nga aglugan ti tattao kadakuada. Ti laengen panagbuya kadagitoy ti mangabbukay iti panagtarigagay ti tao a tumapog iti danum ken makiay-ayam kadagidiay a dolphin.

Kanayon idi a kastoy ti panagrikna ni Kristie. Maysa nga aldaw idi agangay, bayat nga agluglugan iti bilog ken aglanglangoy iti Gulf of Mexico, adda ulo a kellaat a nagparang iti sangona. Di nagbayag, kaslattay tallo nga usioso a dolphin ti nangipagarup a nakasarakdan iti kaay-ayamda. Idi damo, medio mabuteng ni Kristie, ngem ti butengna ti nagbalin a gagar bayat a nakiay-ayam kadagiti dolphin. Nagkalma, nga impalubosna a kontrolenda ti kasasaad, tapno makitana no aniat’ sumaruno nga aramidenda.

Kinuna ni Kristie: “Basta agparang ti maysa a dolphin iti sangok​—ket agkikinnitakam laeng iti maysa ken maysa. Nasarakak lattan ti bagik a mangap-apros ken makisarsarita iti dayta​—a kas met laeng iti ar-aramidek iti tarakenko nga aso.”

Gapu iti kinasaririt dagiti dolphin, nalatakda kas mananglinglingay, ket kuna ti kaaduan a manangsanay a gapu iti kinamannakigayyemda iti tattao, saan a kanayon a mapasuksokan dagiti dolphin iti taraon tapno makigantilda.

Idi napagsaludsodan no aniat’ makaparagsak unay nga aramiden iti pannakipagtrabaho kadagiti dolphin, kinuna ni Liz Morris, maysa nga animal behaviorist (mangad-adal iti kababalin dagiti ayup iti natural a kasasaadda) idiay Sea World sadi Florida, E.U.A.: “Iti panagkunak, isut’ nakaparsuaanda. Gapu ta nakaparsuaanda ti makigantil ken agusioso unay, talaga a matignayka a makigantil kadakuada . . . Pagay-ayatda unay ti maaprosan ken madungngo.” Iti inkari ti Dios a baro a sistema ti bambanag, amintayto ti maaddaan iti adu a nakaskasdaaw a panagrana a kas ken ni Kristie.