Manipud Managbasatayo
Kinaawan Panggedan Agyamanak unay iti serye a “Kinaawan Panggedan—Adda Solusion.” (Marso 8, 1996) Dimteng dayta idi agbirbirokak iti trabaho, ngem awan ti nasarakak. Pinadasko ti nangparnuay iti trabaho iti pagtaengak, kas dinakamatyo iti panid 11, ket adda nagimbaganna kaniak. Agyamanak ken Jehova gapu kadakayo!
3J. M., French Guiana
Dagiti artikulo inladawanda ti kasasaad a nabiit pay a napasarak. Iti sumagmamano a bulan, nakibagayak a mangaramid iti “amin a kita ti trabaho,” kas iti kinuna ti maysa nga artikulo. Ngem diak naupay. Pinadasko ti maaddaan iti positibo a panangmatmat, ket kamaudiananna, nakasarakakon iti agpaut a trabaho. Bayat dayta a tiempo, tinulongannak ti asawak, a nakasalsalimetmet iti panaggatang. Agyamanak manen iti impormasion a tumultulong kadatayo a mangyaplikar kadagiti prinsipio ti Biblia iti narigat a kasasaad.
U. C., Italy
Nagustuak unay ti kahonyo a “Panangpataud iti Trabaho iti Pagtaengan.” Maysaak a regular payunir, amin-tiempo nga ebanghelisador, ket iti dua a tawen addaanak iti lisensiado a “home day-care center.” Bambantayak dagiti ubbing sakbay ken kalpasan ti klase ket dakkel ti birokko. Nawayaak a mangasaba iti tengnga ti aldaw, ket agtrabahoak laeng iti uppat nga oras iti inaldaw. Adu a nagannak ti agyamyaman agsipud ta narigat ti makasarak iti de-kalidad a panangaywan. Inanamaek a makasarak met ti dadduma iti panggedan a makatulong kadakuada nga agserbi ken Jehova.
T. K. L., Estados Unidos
Insingasingyo a dagiti awan panggedanda mabalin nga ag-upholsterda a pribado, mamukis, agserbi a janitor, ken dadduma pay. Imbagayo met nga iti dadduma a kasasaad mabalin nga ipablaakda dagiti serbisioda nga awan bayadanda wenno nalaka laeng ti bayadanda. Legal kadi daytoy ditoy Alemania?
R. T., Alemania
Saan nga agpapada dagiti linteg iti nadumaduma a pagilian, ket nalabit saan a legal daytoy iti dadduma a daga. Isu nga iti panid 9 impakitami a nasken nga ammuen ken raemen dagiti linteg a pinansial ken panagbuis sakbay a rugian ti kasta a panggedan. Obligado dagiti Kristiano a mangtungpal kadagiti linteg ti daga a pagnanaedanda. (Roma 13:1)—ED.
Zoo Talaga a tinagiragsakko ti artikulo a “Pannakaadal ti Biblia—Idiay Zoo!” (Marso 8, 1996) Pagay-ayatko ti impormasion maipapan kadagiti ayup a nadakamat iti Biblia. Pulos a diak naammuan a dagiti zebra nadakamatda iti Biblia. Pagay-ayatko met ti parapo maipapan kadagiti kuton. Pinaregtanak ti artikulo nga agsirarak maipapan iti nagduduma nga ayup iti tunggal bulan.
M. F., Estados Unidos
Ti Patpatgek a Gayyem Kayatko nga iyebkas ti napasnek a panangapresiarko iti nagsayaat nga artikulo a “Ti Patpatgek a Gayyem.” (Pebrero 22, 1996) Makaparagsak ti makabasa nga adda kasta a nagsayaat a panaggayyem ti kasta a nagdakkel a nagdumaan ti edad. Iparangarangna a saan a nasken a maaddaan laeng dagiti agtutubo iti nasinged a gagayyem kadagiti kataebda. Adu ti maipaay dagiti adu a natataengan babaen kadagiti kapadasan, kinasirib, ken pakaragsakanda.
S. T., Inglatera
Pinaneknekan ti artikulo a dagiti agtutubo ken nataengan nagsayaat ti panagkakaduada ket magunggonaan dagiti agtutubo iti adu a kapadasan dagiti natataengan a kaputotan. Siak a mismo addaanak kadagiti adu a nakaragragsak ken makaay-ayo nga oras a kadua ti nataengan a gayyem. Adut’ naaramidanna a timmulong kaniak a mangtaming kadagiti parikut a kas ti panangdurog dagiti kapatadan.
W. S., Austria
Agingga ita diak pay pulos pinadas ti nagsursuro kadagiti natataengan. Gapu itoy nga artikulo, maawatakon dagiti bambanag a mabalinko a masursuro kadagita a nataengan. Kayatko unay ti agbalin a nasinged a gayyem ti dadduma a nataengan nga aduan kinasirib.
R. K., Japan