Naimpusuan a Pakaasi
NAGLAON ti Mayo 8, 1996 nga Agriingkayo!, iti serye dagiti artikulo maipapan iti panangampon. Maragsakan ken nasdaawkami iti naawatmi a subalit dagiti managbasa iti intero a lubong. Makapikapik unay ti sumaganad a surat.
“Mapilitanak a mangyunay-unay nga adu kadakami a nangipaampon iti annakmi ti mangayat idi a talaga nga agtalinaedda koma iti podermi. Maysaak idi a di naikasar a tin-edyer, nga ages-eskuela pay laeng. Apaman a naammuan dagiti nagannak kaniak a masikogak, imbagada a rumbeng nga ipangpangrunak ti pagimbagan ti anakko ngem iti bagik isu nga ipaamponko. Kinunada kaniak a ti ‘maladaga masapulna agpadpada ti ina ken ama,’ banag a diak maipaay. Di kayat dagiti nagannak kaniak nga agtalinaed ti ubing iti poderko—awan lugarko idiay balayda no adda anakko. Aniat’ aramidek? Inrasonda: ‘Marurodkanto laeng iti ubing no ikkatem ti wayawayam.’
“Apaman a madlawen a masikogak, pinasardengdak nga ageskuela ket imbaondak a makipagnaed iti maysa a kabagian. Idi pimmanawak idiay balay, ammok a didak awaten agingga a nakapagpasngayak ken naipaamponkon ti ubing.
“Napaggianak iti pagtaengan dagiti balasang nga inna. Idi dinamag ti social worker no desididoak nga ipaampon ti ubing, ammok a dina ammo nga awan idin ti pagpiliak. KAYATKO NGA AGTALINAED TI ANAKKO ITI PODERKO! Kanayon nga il-iliwek a makita nga agkatkatawa ken naragsak. Rumbeng a maammuan dagiti managbasayo a ti riknak ket kas met laeng iti rikna ti adu a nagipasngay nga inna.
“Awan idin ti naipaay nga aniaman a makagunggona a pagpiliak. Isu nga inaramidko ti kinunada kaniak nga agpaay iti ‘kasayaatan a pagimbagan’ ti ubing. Ket sipud idin, nasaemen ti panagbiagko. Madanaganak nga ipagarupto ketdi ti barok a diak man la naseknan kenkuana ken diak man la kinayat isuna.
“Ita, kas maysan a Kristiano, kanayonen nga apresiarek ti balakad ti Biblia maipapan kadagiti narikrikut a kasasaad a pangisagmakantayo iti bagitayo gapu iti di panangyaplikar iti Sao ti Dios iti biagtayo. Ipakitana ti nasakit ken nasanaang nga epekto ti nailubongan a panagrasrason. Ngem rumbeng a maammuan dagiti naampon a tattao a gapu ta naipaamponda, dina kaipapanan a saanda a matarigagayan. Pangngaasiyo ta ipakaammoyo kadakuada!”