Eksperto a Hardinero

PAGSIDDAAWEN ti leaf-cutting ant iti Abagatan nga America dagiti biologo babaen ti komplikado a panaghardinna. Tapno maipaay ti taraon, mangputed daytoy a bassiusit nga insekto kadagiti bulong ken mangurnong kadagiti tedtedda iti suelo ti kabakiran ken ipanna dagitoy iti umokna iti uneg ti daga. Kalpasanna, gilingen ti koton dagitoy a pirpirsay a pangabuno iti hardinna iti uneg ti daga. Daytoy a manangputed iti bulong nainkasigudan nga ammona no kasano a taginayonen ti mulana iti kalalainganna a temperatura ken kinaagneb tapno magun-odan dagiti kasayaatan a resulta. Tapno maparnuay dagiti baro a binglay, iyakarna dagiti naputed manipud iti naipasdeken a mula kadagiti baro a pagurnongan iti bulong. Nagbalin payen ti leaf-cutting ant a batido iti arte ti panagarbas tapno mapapardas ti idadakkel dagiti mulana. Napaliiw dagiti managsirarak iti Wales nga ibagay daytoy a nasigo a horticulturist dagiti panagreggetna maitunos iti kasapulan a taraon ti umok, iti kasta makaekonomia iti panawen ken enerhia.

Masapul ti kinagaget iti panaghardin, ket nakaskasdaaw ti kinagaget ti leaf-cutting ant iti daytoy a benneg. Isu met la a kuna ti Biblia: “Inka ken koton, sika a nasadut; utobem dagiti daldalan ni koton ket sumiribka. Isu nga idinto nga awan pangulona, mangaywan man wenno agturay saganaenna ti kanenna iti kalgaw; agurnong iti taraonna iti panagani.” (Proverbio 6:6-8) Kinapudnona, paneknekan ti kasisigud ti leaf-cutting ant ti kinasirib ti Namarsua iti dayta, ni Jehova a Dios.​—Proverbio 30:24, 25.