Manipud Managbasatayo

Mangbingaybingay a Di-Pagkikinnaawatan Kayatmi nga iyebkas ti panagyamanmi iti serye a “Masapul Kadi a Bingayennatayo Dagiti Di-Pagkikinnaawatan?” (Hulio 8, 1996) Agarup makatawenen nga agtartrabahokami kas paset ti timpuyog dagiti internasional a boluntario ditoy Mexico. Uray kalpasanen ti sumagmamano a bulan, mapaspasaranmi pay laeng dagiti rigat ti pannakibagay, ngem dimi maawatan idi no apay. Dagiti artikulo ti timmulong kadakami a mangammo iti parikut kas pannakariribuk iti kultura. Impangagmi ti nadakamat a “ti panangapresiar iti sabali a kultura pabaknangenna ti panagbiagtayo” ket naragragsakkamin iti nakaitudinganmi.

C. H. ken J. H., Mexico

Natignayak iti pannakaiparang ken pannakaputar daytoy a sensitibo a tema. Dagiti di pagkikinnaawatan ti talaga a nangrubrob iti nakaro a gura iti historia ti tao. Daytoy a serye ti tumulong itan kaniak nga agbalin nga ad-adda a mannakaawat iti sabali a kultura. Sapay koma ta basaen ti amin a tattao iti lubong dagitoy nga artikulo ken balbaliwanda ti di makaay-ayo a panangmatmatda iti sabsabali!

G. O., Nigeria

Dagiti artikulo pinagluadak. Adda gayyemko a gistay kanayon a makatunosak. Ngem kanayon a mariknak nga adda di makita a lapped iti nagbaetanmi. Maamirisko itan a naggapukami kadagiti nagduma unay a kultura. Dakkelto unay ti maaramidan daytoy nga impormasion iti pannakilangenko kenkuana iti masakbayan.

A. F., Estados Unidos

Bayat nga ar-aramidek ti panagsirarakko para iti thesis-ko iti antropolohia iti kolehio, nangbusbosak iti sumagmamano a lawas iti maysa a pagilian idiay Africa. Naam-ammok ti adu kadagiti lokal a Saksi ni Jehova ken tinabunuak dagiti gimongda. Makaparagsak a kapadasan daydi! Kas kinuna ti artikulo, makapabaknang ti pannakilangen iti tattao a sabali ti kulturada. Naaddaanak iti baro ken nagpateg a gagayyem.

S. B., Italia

Habu Nagsayaat la ketdin ti artikulo a “Habu​—Uleg a Masapul a Raemen.” (Hulio 8, 1996) Naisurat iti makapainteres a pamay-an, ken nagpintas dagiti retrato!

E. P., Ukraine

Makaisuro ken makapakatawa ti artikulo. Ngem adda maysa a punto a maisupadi iti naisuro kaniak. Inadawyo ti maysa a libro a nangisingasing iti panangsusop iti gita iti mismo a nagkagatanna. Talaga kadi a natalged daytoy?

C. D., Nigeria

Agparang a di umanamong ti kaaduan nga autoridad iti medisina iti gubuayan nga inadawmi iti artikulomi. Kinapudnona, patien ti dadduma a doktor a ti panangpadas a mangsusop iti gita ti makadangran para iti mangaramid iti dayta ken bassit ti maitulongna iti nakagat. Umanamong dagiti doktor a ti kapatgan a first aid ket panangyospital a dagus iti biktima iti kabiitan a panawen.​—ED.

Dagiti UFO Pagyamanan iti artikulo a “Ti Panangmatmat ti Biblia: Dagiti UFO​—Mensahero a Naggapu iti Dios?” (Hulio 8, 1996) Iti lugarmi, patien ti dadduma a tattao dagiti damag maipapan kadagiti extraterrestrial. Tangay ammoda nga awan ilawlawag ti Biblia maipapan itoy a banag, agduaduada maipapan iti Biblia. Ti artikulo ti timmulong kadakami a mangtarus a ni Satanas ken dagiti demoniona ti mangikagkagumaan a mangallilaw iti tattao ket di nainsiriban a patien dagiti awan pakaibatayanna a damag maipapan kadagiti extraterrestrial.

A. W., Taiwan

Dagiti Tulip Pagyamanan iti nakaskasdaaw nga artikulo a napauluan “Ti Tulip​—Sabong a Nariribuk ti Nangrugianna.” (Hulio 8, 1996) Makapainteres unay kaniak ti impormasion maipapan iti nagtaudanna agraman dagiti singasing iti panagmula iti tulip.

D. G., Estados Unidos