Panagpipinnatay iti Nagan ti Dios
BABAEN TI KORESPONSAL TI AGRIINGKAYO! IDIAY FRANCIA
“Iti nagan ti dios, pumataykami ken itultuloyminto pay ti pumatay”
ITI sidong ti naadaw a paulo nga adda iti ngato, kinuna ti International Herald Tribune: “Daytoy a siglo, a pasaray kayat nga ibilang dagiti optimistiko kas nalawlawaganen, ti minulitan ti nakaal-alingget a pagannayasan ti tattao nga agpipinnatay iti nagan ti Dios, a kas met laeng iti napalabas.”
Nangdakamat ti mannurat kadagiti pagarigan dagiti narelihiosuan a masaker kadagiti nagkauna a siglo. Sa, iti panangitudona kadagiti masaker a napasamak iti maika-20 a siglo, inkonklusionna: “Ti makitkitatayo ket makaaliaw a panagtultuloy ti narungsot a di kinamanagpanuynoy dagiti napalabas a panawen. Agtalinaed pay laeng ti panagdaydayaw kas pangikalintegan kadagiti napolitikaan a kinaranggas ken panangsakup iti teritoria.”
Padasen ti dadduma nga ikalintegan dagiti narelihiosuan a gubat ita babaen ti panangipamatmat nga inanamonganto met ngamin ti Dios ti panangpapatay dagiti nagkauna nga Israelita kadagiti Canaanita. Ngem, daytat’ di mangikalintegan tapno makigubat ita dagiti agkunkuna a Kristiano. Apay? Agsipud ta direkta idi a binilin ti Dios dagiti Israelita nga agtignay kas berdugo dagiti nalinteg a panangukomna kadagiti tattao nga agdaydayaw kadagiti demonio, a ti panagdaydayawda inramanna ti nalabes a seksual nga imoralidad ken panangidaton iti ubbing.—Deuteronomio 7:1-5; 2 Cronicas 28:3.
Maysa a pammaneknek a saan nga ordinario a rinnupak dagiti gubat ti kadaanan nga Israel ket ti namilagruan a kita dagiti panamagballigi ti Dios iti nasion. Kas pagarigan, naminsan a nabilin dagiti nagkauna nga Israelita a mangusarda kadagiti tangguyob, gorgorita, ken aluten—a sigurado a saan nga igam ti tipikal a gubat! Iti sabali pay a pasamak, naisaad dagiti kumakanta iti sanguanan ti maysa a buyot ti Israel a naisarang idi iti nagadu a puersa dagiti rumaut a buyot ti sumagmamano a nasion.—Oc-ocom 7:17-22; 2 Cronicas 20:10-26.
Kanayonanna, idi pasaray nakigubat dagiti Israelita kadagiti di intuding ti Dios, dina ida binendisionan ket naabakda. (Deuteronomio 28:15, 25; Oc-ocom 2:11-14; 1 Samuel 4:1-3, 10, 11) Saan ngarud a mausar dagiti pannakigubat ti Israel a pangikalintegan kadagiti gubat a maar-aramid iti Kakristianuan.
Iti nagan ti relihion, nakibakal dagiti Hindu kadagiti Muslim ken Sikh; nakigubat dagiti Shiite Muslim kadagiti Sunni Muslim; ket idiay Sri Lanka, nagpipinnatay dagiti Budista ken Hindu.
Dagiti gubat a napasamak idiay Francia ti tipikal a panagpipinnatay iti nagan ti Dios kabayatan ti maika-16 a siglo. Buklen ti pakasaritaan dagitoy a gubat ti sumagmamano kadagiti kadadaraan a pasamak iti pakasaritaan ti Romano Katoliko ken Protestante a relihion iti Europa. Usigentayo dagitoy a gubat, ket kitaentayo no aniat’ maadaltayo kadakuada.
[Picture Credit Line iti panid 3]
Rinetrato ti U.S. Army