Danum—Ti Pagbiagan ti Planeta
TI DANUM nga awanan iti kolor, angot, raman, ken calorie, ket napateg iti amin a biag ditoy daga. Awan ti tao, animal, wenno mula nga agbiag no awan dayta. Manipud kadagiti elepante agingga kadagiti mikrobio, nasken ti danum; ken awan ti kasukat dayta. Tunggal maysa kadagiti nasurok a lima a bilion a tattao ditoy daga masapul nga uminumda, kadagiti likido ken taraon, iti agarup dua ket kagudua a litro a danum iti inaldaw tapno nasalun-atda. No awan ti danum, awan ti biag.
No awan ti danum imposible ti mangpadakkel iti mula wenno mangtaraken iti dinguen. No awan ti danum, awan ti taraon—no awan ti taraon, awan ti biag.
Naimbag ta adda adu a danum. Idi naretrato ti law-ang, ti napintas nga asul a planetatayo kasla maiparbeng a maawagan koma a Danum, saan a Daga. Kinapudnona, no ti danum iti lubong ket parepareho a maisaknap iti rabaw ti planeta, mangporma dayta iti sangalubongan a taaw a 2.5 a kilometro ti kaadalemna. Ti isuamin a rabaw ti daga mabalin a saknapan ti Taaw Pacifico, ket adda pay sobrana.
Siempre, kaaduan a danum iti daga adda kadagiti baybay, ket naapgad ti danum ti baybay. No danum laeng ti baybay ti inumen ti tao, matayton iti waw ken pannakaugot bayat a padasen ti bagi nga iruar ti sobra nga asin. Ti danum ti baybay saan a nasayaat iti agrikultura wenno iti industria—papatayenna ti kaaduan a mula ken mabibiit nga aglati ti kaaduan a makinaria. Gapuna, kaaduanna, mausar laeng ti tao ti danum ti baybay no ikkatenda ti asin, ket nakanginngina dayta a pamay-an.
Adda laeng 3 a porsiento a tamnay, saan a naapgad a danum, iti lubong. Dandani amin dayta a tamnay a danum—agarup 99 a porsiento dayta—ti adda kadagiti glacier ken nayabbungot a yelo wenno adda iti uneg ti daga. Maysa laeng a porsiento ti nalaka a magun-odan ti sangatauan.
Kasla bassit laeng ti maysa a porsiento. Mabalin kadi nga agkurangtayto iti tamnay a danum? Nalabit saan. Kuna ti magasin a People & the Planet: “Uray daytoy [1 porsiento], no padapada ti pannakaiwarasna iti aglawlaw ti lubong ken nainkalintegan ti pannakausarna, umanayen a mangbiag iti mamindua wenno mamitlo iti agdama a populasion ti lubong.”
Kangrunaanna, ti dagup ti danum ditoy daga saan nga umadu wenno bumassit. Kuna ti Science World: “Ti danum nga usarenyo ita nalabit pinenneknan idi ti waw ti maysa a dinosaur. Ti makagapu ket amin a danum nga adda iti Daga ita isu ti adda kadatayon idi—wenno ti addanto kadatayo.”
Ti makagapu iti daytoy ket ti danum iti intero a lubong agrikrikus nga awan inggana—manipud kadagiti taaw nga agturong iti atmospera, a mapan iti daga, kadagiti karayan, ken agsubli manen kadagiti taaw. Kas iti insurat ti masirib a tao idi ugma: “Amin dagiti karayan agayus nga agturong iti baybay, nupay kasta saan nga aglippias ti baybay; agsublidanto manen iti pagayusan dagiti karayan tapno agayusdanto manen.”—Eclesiastes 1:7, New English Bible.
Nupay kasta, uray nawadwad ti danum a tamnay ditoy daga, adu a rehion ti agkurang unay iti dayta. Dagiti sumaganad nga artikulo sukimatenna dagiti parikut ken dagiti panginanamaan ti panangrisut kadakuada.
[Picture Credit Line iti panid 3]
Rinetrato ti NASA