Manipud Managbasatayo

Kautibo Maysaak a balud nga addaan dua pay a tawen nga ikaro ti sentensiak. Naminduan a binasak ti artikulo a “Nakautibokami Kabayatan ti Iyaalsa iti Pagbaludan.” (Nobiembre 8, 1996) Kada basaek, makaluaak gapu iti rag-o ken kaslattay adda agbara iti karabukobko. Kanayon a segseggaak ti isasarungkar dagiti Saksi ni Jehova iti daytoy a pagbaludan. Makapabang-ar unay ti isasarungkarda!

J. K., Estados Unidos

Pulos a diak pay nakapagsurat kadakayo idi maipapan iti maysa nga artikulo, ngem ti artikulo maipapan kadagiti nakautibo makapabileg unay iti pammati. Pinabarona ti pammatalged a talaga a pabpabilgen ni Jehova ti ilina no mariribukanda.

K. D., Estados Unidos

Panangiwanwan Talaga a nagustuak ti artikulo a “Ti Panangmatmat ti Biblia: Asinot’ Pagtalkanyo a Mangiwanwan?” (Nobiembre 8, 1996) Makaliwliwa ken makaparegta unay kaniak. Kas iti adu a sabsabali pay, naupayak unay iti napalabas idi binaybay-andak dagidiay nagpaiwanwanak. Timrem dagiti luak iti ilustrasion maipapan iti ubing a mangig-iggem iti ima ni tatangna. Makapabileg unay a maammuan nga idiay Isaias 41:13, kuna ni Jehova a ‘tenglennanto ti ima’ ti ilina.

M. S., Estados Unidos

Agtawenak iti 17 ket nabiit pay nga aduanak iti parikut. Imbaga ti maysa a gayyem nga agkararag ken agbasaak iti naespirituan. Kalpasan a nabasak ti artikulo nga “Asinot’ Pagtalkanyo a Mangiwanwan?” inkeddengko a diak mapukawan iti namnama no di ket ir-irutak pay ti panangpetpetko iti ima ti nailangitan nga Amak!

C. G., Estados Unidos

Panagsenias Agyamanak unay iti artikulo a “Tapno Maawatak ti Anakko, Sinursurok ti Sabali a Pagsasao.” (Nobiembre 8, 1996) Agsolsoloak nga ina nga addaan iti tuleng a baro nga agtawen itan iti 24. Isu nga ammok manipud iti bukodko a kapadasan ti mapaspasaran ni Cindy Adams, ket dayawek unay ti nagapuananna.

H. B., Alemania

Ti artikulo ti nangtignay kaniak a mangadal iti panagsenias tapno mairanudko ti mensahe ti Biblia kadagiti tuleng ken makikomunikar met kadagiti kakabsat iti kongregasion nga adda diperensia ti panagdengngegda.

B. L., Venezuela

Iyad-adalak iti Biblia ti maysa a tuleng a balasitang. Agam-ammokamin a naimbag nupay ti kinaagpaysona ket simple pay la ti ammomi a panagsenias. Ti panangbasak iti determinasion ni Cindy Adams a mangsursuro iti panagsenias para iti pagimbagan ti anakna ti nangparegta kaniak a mangparang-ay iti kinasigok iti daytoy nagpintas a pagsasao tapno mairanudko ti naimbag a damag ti Biblia kadagiti tuleng iti komunidadko.

S. T., St. Martin, Netherlands Antilles

Addaanak met iti anak nga adda diperensia ti panagdengngegna, ket pinilimi ti panagibalikas a pamay-an ti komunikasion. Daytoy a pamay-an ipangpangrunana ti irarang-ay ti panagsao ken panangbasa iti ibalikas ti bibig. Nagsayaatan ti anakko daytoy a pili. Idi damo, bassit ti magunggonana kadagiti gimong iti kongregasion. Ngem ita masurotannan a naimbag ket siak ken dagiti sabsabali ti mangipaulog kenkuana babaen iti panagibalikas. Agpalpalawagen iti Teokratiko nga Eskuelaan ti Panagministro ken maysan a di bautisado nga agibumbunannag. Nagunggonaan met laengen ti adu a tawen a panangikagumaan. Ipakita ti kapadasanmi a ti American Sign Language wenno dagiti panangibalikas a pamay-an ti makagunggona la ketdi no pagreggetan dagiti nagannak ken ti lokal a kongregasion a paregtaen ti ubing ken makikomunikar kenkuana.

M. T., Estados Unidos