Maum-umaka Kadin iti Trabahom?

NALABIT agtrabahoka iti agarup walo nga oras iti maysa nga aldaw. Kailala ti adu a tiempo ken masayang laeng ti biag gapu iti pannakauma! Ngem adu a trabaho iti maika-20 a siglo ti maulit-ulit ket bassit la ti maipagpannakkel a mismo ti trabahador.

Gapuna adu ti magunggonam no pagbalinem a makaay-ayo ti trabahom. Ad-adu ti rag-om nga agtrabaho, ket masursurom a pagbalinen a makaay-ayo ti aniaman a trabahom iti masanguanan. Ngarud, sukimatentayo ti dadduma a pamay-an ti panangibanag iti daytoy.

Agtignay a Sigagagar

Irekomendar ti dadduma nga autoridad nga agtrabahoka a kasla tinagiragsakmo dayta. No kasta ti aramidem, inton agangay maay-ayokanton iti trabahom.

‘Ngem diakto pulos matagiragsak ti trabahok!’ nalabit kunam. Ti trabahom mabalin a kasapulan a maulit-ulit, kas iti trabaho iti assembly-line. Wenno mabalin a nagtrabahokan iti adu a tawen iti panggedam ta mariknam a naumakan iti dayta. Nupay kasta, dagiti simple a panagtignay a kas iti panagisem ken panagprinti mabalin a tulongannaka nga agbalin a naganaygay iti trabahom.

Ti panangipamaysa a naan-anay iti ar-aramidem nalabit makatulong met. Dika agtrabaho a mekanikal, wenno dikan agpampanunot, ket dika agtrabaho a pampanunotem ti pangngaldaw, ti ngudo ti lawas, wenno uray ti sabali a trabaho nga aramidem. Gagangay a nainsiriban nga ipamaysam a naan-anay ti tartrabahuem. Ti resulta? Tagiragsakemton ti trabahom, ket kalpasanna kasla nakaparpartak a lumabas ti tiempo.

Gagangay a kastoy ti mapasamak no naipamaysaka iti trabaho a talaga a pagay-ayatmo. Mabalin a kasta ti epektona kenka no ikagumaam nga ipamaysa ti trabaho a kadawyan a dika kaay-ayo.

Aramidem ti Amin a Kabaelam

Ti panangaramid iti amin a kabaelam tulongannaka a manggun-od iti pannakapnek iti trabaho. Siempre, maikontra dayta a balakad iti nalatak a kapanunotan a no saan a makapainteres ti trabaho, padasem ti agpamayan. Ngem ti panangbaybay-a, panangitantan, ken panagpamayan sigurado a paksuyannaka ken lalo a pagdanagen ken bannogennaka. Iti kaaduan a kasasaad, ti tao a kanayon nga agawid a nabannog, madanagan, ken napaksuyan nga aggapu iti trabaho sigurado nga agsagsagaba gapu iti dina panagtrabaho a sipapasnek.

Sigun iti Biblia, ti sigagaget a panagtrabaho iti maysa a proyekto pagbalinenna pay a nakaragragsak dagiti oras ti panaglinglingay. “Awan sabali a naim-imbag nga agpaay iti tao no di ti mangan koma ken uminum ken ti panangparag-ona iti kararuana iti kinaimbag a nagbannoganna.” (Eclesiastes 2:24, NW) Kadagiti dadduma, nalabit kasla saanen nga uso daytoy a replan, ngem iyap-aplikar ti dadduma daytoy manayon a prinsipio. Umanamongda a pudno nga “awan ti naim-imbag” ngem ti panagragsak koma iti bunga ti nagaget a panagtrabahoda. Bigbigen ti libro a The Joy of Working: “Mangparagsak ti umiso ti pannakaturposna a trabaho.”

Gapuna, aramidem ti amin a kabaelam, ket nalabit mariknam a maparegtakanto. Aramidem ti ad-adu ngem iti kalalainganna laeng, ket mariknam a naragragsakkanto. Aramidem nga umuna dagiti napateg a trabaho, ket tagiragsakemto ti panaginanam kalpasan ti pangngaldaw ken kadagiti ngudo ti lawas nga ad-adda ngem ti tao a mangpaksuy iti bagina babaen iti panangitantan.​—Idiligmo ti Ester 10:2; Roma 12:11; 2 Timoteo 2:15.

Imbes a makisalisalka kadagiti sabsabali, ikagumaam a daegen ti bagim. (Galacia 6:4) Mangikeddengka kadagiti baro a pagalagadan, baro a kalat. Ikagumaam ti rumang-ay. Maysa a babai, a ti trabahona iramanna ti maulit-ulit a panagdait a mabalin nga ibilang ti dadduma a makauma, nangaramid iti ay-ayam a panangoras iti bagina. Sinipsiputanna ti kaadu ti magapuananna iti inoran-oras, ket kalpasanna pinadasna a nayonan dayta. Pudno a tinagiragsakna ti trabahona agsipud ta inkagumaanna ti nagtrabaho agingga iti kabaelanna.​—Proverbio 31:31.

“Arkosam” ti Trabahom

Irekomendar da Doktor Dennis T. Jaffe ken Cynthia D. Scott: “Panunotem ti trabahom a kas maysa a balay nga awan nagyanna. Immakarka ket minatmatam ti itsura ken pannakaaramidna. Kalpasanna natignay ti kinamanagparnuaymo. Inkeddengmo ti disenio a kayatmo, inarkosam, ket pinagbalinmo ti balay a pagtaengam. Imbilangmo a kukuam babaen ti panangaramidmo iti bukodmo nga estilo.”

Kaaduan a trabaho ti naited kenka nga addaan kadagiti pangkaaduan a paglintegan ken annuroten. Ti basta panangaramid iti naibaga nga aramidem ket kas iti panagnaed iti awan nagyanna a balay. Awan ti pakabigbigan. Ngem no nayonam iti personal nga estilom, ad-adda nga agbalin a makaay-ayo ti trabahom. Awan dua a tao nga agpareho ti “panangarkos[da]” iti trabahoda. Maysa a serbidor ikabesana dagiti taraon a paggugusto dagiti suki. Ti sabali ket naanus ken nadayaw. Agpadpadada a mangtagiragsak iti trabahoda agsipud ta napasnekda iti trabahoda.

Kanayon nga Agsursuroka

Ti sabali pay a pamay-an ti panagrag-o iti trabaho ket ti panagsursuro. Ti libro a Tension Turnaround ilawlawagna a bayat a dumakkeltayo, rumang-ay ti kapasidad ti utektayo a mangtaming kadagiti impormasion. Daytoy ilawlawagna no apay a dagiti bambanag a nangparagsak kadatayo idi mabalin a makapauma kadatayo itan. Ti solusion ket pennekem ti ganas ti utek a manggun-od iti baro nga impormasion babaen ti panangsursuro kadagiti baro a bambanag.

Ti panangsursuro iti ad-adu pay maipapan iti trabahom mabalin a mangiturong inton agangay iti pannakaipaay iti ad-adda a makaay-ayo a trabaho. Ngem uray no di mapasamak dayta, ti pamay-an ti panagsursuro a mismo pagbalinenna ti trabahom nga ad-adda a makaay-ayo ken makapnek. Ipamatmat dagiti autor a da Charles Cameron ken Suzanne Elusorr: “Ti panagsursuro saanna laeng a parang-ayen ti panagtalekmo babaen ti panangparang-ay iti abilidadmo, apektaranna pay ti intero a panangmatmatmo iti biag: a dagiti problema marisutda, maparmek dagiti pakarigatan, maksayan dagiti panagamak, ket mabalin a maaramid ti ad-adu a banag ngem ti impagarupmo.”

‘Ngem,’ nalabit kunaem, ‘Nabayagen a naammuak amin a masapul a maammuak maipapan iti trabahok!’ No kasta, mabalin kadi a sursuruem dagiti banag a saan a direkta a mainaig iti trabahom? Kas pagarigan, mabalin nga ikeddengmo a sursuruen ti ad-adu pay maipapan iti pannakilangen iti tao wenno maipapan iti alikamem. Nalabit sursuruem ti agsurat iti nasaysayaat a memo ti opisina wenno no kasano nga idaulom ti nasaysayaat a miting. Mabalin a masursurom ti kaeepektibuan a wagas ti pannakilangen kadagiti superbisor.

Kasano a masursurom dagitoy a banag? Mabalin a ti kompania a pagtartrabahuam mangituktukon kadagiti kurso a mabalinmo a gundawayan. Wenno ti maysa a libraria mabalin nga addaan kadagiti libro nga apag-isu a kasapulam. Ngem dika liplipatan dagiti di ipagpagarup a gubuayan ti impormasion. Ti panangbuya kadagiti tattao nga agtrabaho ken panangpaliiw kadagiti paglaingan ken pagkapuyanda mabalin a makaisuro. Makasursuroka kadagiti kamalim, ken makasursuroka met kadagiti balligim, babaen ti panangamiris iti umiso nga inaramidmo. Ti maadalmo kadagiti mismo a kapadasam ken iti panangpaliiwmo kadagiti sabsabali maisuronaka iti nalabit saanmo a mabasa kadagiti libro wenno mangngeg iti klase.

Dadduma a Maudi a Singasing

Adda pay sabali a pamay-an a mabalin nga amirisem iti trabahom. Mabalin nga ipapanmo a maikarika iti nasaysayaat pay koma​—a dagiti dadduma addaanda kadagiti amin a gundaway ket pulos a dika naikkan iti gundaway a mangaramid iti trabaho a talaga a kayatmo nga aramiden. Mabalinmo ti makisarita a kanayon kadagiti sabsabali nga umanamong kenka, ket makombinsirka a pudno amin daytoy.

Ngem nalabit saan a pudno dayta. Adu a tattao a mangtagtagiragsak iti trabahoda nasursuroda nga aramiden ti kasta. Ti maysa a tao a mangtagiragsak iti panagdisenio kadagiti balay nalabit tagiragsakenna met ti agmaneho iti bus. Apay? Agsipud ta ti kinamanagparnuayna iti trabaho ti mangparag-o ken mangpennek kenkuana.

Gapuna, ikkatem ti negatibo a panagpampanunot a mangpaleddaang iti lawas ti trabaho a maisupadi iti ngudo ti lawas. Dika sayangen ti tiempo a mangpampanunot kadagiti napalabas a biddutmo, a pampanunotem no anianto ti sumaruno a pagbiddutam, ket madanaganka maipapan iti pampanunoten ti sabsabali kenka. Matmatam ti trabaho nga adda iti sanguanam. Asikasuem a naan-anay. Padasem nga ipasnek dayta a kas iti aramidem iti paboritom a pagesman. Saysayaatem pay ketdi, ket maragsakanka iti trabaho a nagsayaat ti pannakaaramidna.

[Kahon/Ladawan iti panid 11]

Dika Liwayan ti Trabahom

Kuna ti Biblia, idiay Proverbio 27:23, 24: “Gagetam nga ammuen ti kasasaad dagiti pangenmo. Imatangam a naimbag dagiti arbanmo; ta dagiti sanikua saanda nga agnanayon, ket ti balangat saan nga agpaut agingga iti amin a kaputotan.” (NW) Ania ti kaipapanan dayta?

Kaipapananna a ti kinabaknang (gameng) ken dagiti saad a natan-ok (ti balangat), no magun-odan, masansan a mapaneknekan a temporario. Ngarud, ipakpakita idi ti maysa a pastor idi panawen ti Biblia ti kinasirib no sigagaget nga asikasuenna ti karnerona, a kaipapananna nga ‘imatanganna a naimbag ti arbanna.’ Kas ipakita dagiti sumaganad a tallo a bersikulo, ti resulta ket material a kinatalged para iti trabahador ken iti pamiliana.​—Proverbio 27:25-27.

Ita ngay? Dagiti tattao masansan nga isaadda ti pusoda iti pananggun-od iti kinabaknang wenno natan-ok a saad, nga inanamaenda a mangpasardeng kadakuada iti agdama a trabahoda. Dadduma adda realistiko a planoda; dadduma ti agar-arapaap laeng. Iti aniaman a kasasaad saan a nainsiriban ti manglais wenno mangbaybay-a iti agdama a trabaho. Dayta ti mapangnamnamaan unay ken mabalin nga agtultuloy a pagsapulan. Ad-adda a nainsiriban nga isaad ti maysa a tao ti pusona iti “arbanna,” nga ipamaysana ti mapangnamnamaan a pagtrabahuan. Ti panangaramidna iti kasta ket agbanag a material a kinatalged iti agdama ken iti masanguanan.