Manipud Managbasatayo
Natutudo a Kabakiran iti Amazon Nagustuak unay ti serye ti artikulo a “Ti Matutudo a Kabakiran ti Amazon—Dagiti Sarsarita ken Kinapudno.” (Marso 22, 1997) Kas ekologo dagiti mula iti U.S. Forest Service, kasapulan nga adalek ti adu a literatura maipapan iti aglawlaw. Ngem ti artikuloyo ti ibilangko a kasayaatan pay laeng kadagiti nabasak maipapan iti tema. Nagsayaat unay ti pannakasirarakna, makaisuro, ken naintiempuan, ket talaga a makaay-ayo a basaen. Napabilegak a nangtarus kadagiti ideya a kas iti kinanadumaduma ti biag, panangapit kadagiti produkto iti kabakiran, panangiputputong, ken sistema ti ekolohia nga agparang iti pagiwarnak a nasaknap ti pannakaiwarasna iti sangalubongan. Daytoy ti mangpadur-asto laeng kadagiti bambanag.
D. S., Estados Unidos
Agtawenak iti 12, ket agyamanak unay kadagiti artikulo. Kasapulan idi a basaek ida iti mismo a rabii a naawatmi ti magasin! Tangay daytoy a tema ti ad-adalenmi iti klasemi a geograpia idiay eskuelaan, kabigatanna inikkak ti maestrak iti geograpia iti kopia. Siempre, daytat’ nagusiosuan ti dadduma nga estudiante iti klase, ket sapay koma ta mapaimaak ida iti ad-adu pay a magasin.
T. E., Alemania
Agpayso a makapainteres dagiti artikulo. Nakaad-adu dagiti kita ti insekto a nadakamat, a tunggal maysa adda bukodna nga annongen iti sirok dagiti bulong iti arisadsad ti kabakiran. Siersiertuen ni Jehova a mataraonan ti amin nga agnanaed sadiay. Maawatakon ti gapu nga ‘iyegnanto ti pannakadadael dagidiay mangdaddadael iti daga.’—Apocalipsis 11:18.
D. K. H., Estados Unidos
Panangasing—Aniat’ Peggadna? Pagyamanan iti artikulo nga “Agimtuod Dagiti Agtutubo . . . Panangasing—Aniat’ Peggadna?” (Marso 22, 1997) Idiay eskuelaan, tunggal maysa pabainanna ti nakapuy, ket nagargariak met a mangaramid iti kasta. Ngem dakkel ti naitulong kaniak ti naibalakad iti daytoy nga artikulo nga isaad ti bagim iti sasaaden ti sabali a tao tapno maliklikan ti panangasing. Pagyamanan manen.
M. N., Francia
Agtawenak iti 17, ket agyamanak unay iti artikulo. Daytat’ sungbat dagiti kararagko, ket talaga a pinaregtanak. Dakkel ti naitulong kaniak ti pannakaammo a kagura ni Jehova ti panangasing tapno aramidek dagiti nasken a panagbalbaliw iti kababalinko. Naipasagepsep met kaniak ti Nabalitokan a Bilin ken ti ulidan ni Jesus, ket tinulongandak nga agtignay a siuumiso.
V. T., Italia
Itay nabiit, iti maysa a pagurayan, pinidutko ti maysa nga Agriingkayo! ket natakkuatak daytoy nagsayaat-pannakaisuratna nga artikulo. Silalawag a naawatak ti napaut a panangdangran nga ibunga ti panangasing. Ni manongko ket nasakit nga agsao, manangsair, ken manangdangran [kaniak nga adingna]. No mababalaw, di mangikankano, agkatawa, ken ibagana nga agang-angaw laeng kano. Imbagana kaniak a siak ti ayan ti problema agsipud ta saanak kano a naparato! Idi agtawenak iti 13 ket isut’ 15, nangrugin a nagpangta a gundayawannak. Kanayon a mabutbutengak kenkuana agsipud ta in-inauna, dakdakkel, ken napigpigsa nga amang! Pulos a didak sinalakniban dagiti dadakkelko. Pagyamanan Agriingkayo!, iti panangtamingmo kadagiti nadagsen a parikut iti biag. Ammok a kasapulan laeng ti tured. Patiek nga adu a puso ti natukayyo babaen itoy nga artikulo.
B. S. M., Estados Unidos
Hardinero a Kuton Kalpasan a nabasak ti artikulo nga “Eksperto a Hardinero” (Marso 22, 1997), sinarungkarak ti maysa eksibision ket nasaksiak ti mismo a trabaho a dineskribiryo. Kaslattay magmagna dagiti bulong iti tali a naibitin iti bobida. Kinapudnona, dagiti kuton ti mangaw-awit kadagidiay a bulong, ket iti asideg, makumikomda a mangaramid iti hardin iti uneg ti daga. Ti pannakakitak a mismo iti nadakamatyo ket agpayso a nakaskasdaaw a buya ket pinasingednakami nga agaama iti naayat a nailangitan nga Amatayo, ni Jehova.
P. F., Scotland