Danum ken ti Salun-atmo

“DIMO mapangnamnamaan ti kinawaw tapno maammuam no kasano kaadu a danum ti kasapulan ti bagim,” ipaganetget ti magasin a Health. Ngem napateg ti iyiinum iti adu a danum iti pisikal ken emosional a pagimbagan, ken uray iti langatayo. Kanayon a mapukawan ti bagitayo iti danum babaen ti panagling-et, panaglua, ken panagisbo agraman ti panagangestayo. Masapul a masukatan daytoy a napukaw a pluido. Kasano kaadu ti kasapulan? Isingasing ti adu nga autoridad ti iyiinum iti saan a nababbaba ngem walo a baso ti danum​—dua litro​—iti kada aldaw.

Apay? Napateg ti danum iti pannakaiwaras dagiti sustansia iti bagitayo ken iti panangikkat kadagiti mangmulit. Kasapulan dayta tapno makontrol ti temperaturatayo ken sumayaat ti kasasaad dagiti susuoptayo. “Uray no bassit laeng ti kurang a danum, mariknam a nabannog . . . wenno kasla masakitka,” kuna ti Health. “Ti pannakaugot ket kadawyan a di maikankano a pakaigapuan ti pannakabannog.” Isingasing ti magasin: “Dikay paallilaw iti kinalikido ti kape wenno tsa, addaan caffeine a soft drink, ken arak; kinaagpaysuanna pakaigapuanda iti pannakaugot.” Ti kape ken arak ket agserbi kas pangpaisbo ken pakaigapuan ti pannakamagmag ti bagi.

Kanayonanna, “kasapulan ti kudilmo ti danum tapno agtalinaed a nalamuyot ken nalukneng.” Tapno matulongan daytoy, mabalin met a mayapros dagiti moisturizer iti kudil. Ngem saanda a mangnayon iti moisture. Imbes ketdi, mangibatida iti pangsalaknib a palunapin tapno tumulong a mangtaginayon iti moisture a sigud nga addan iti kudil. Ti panamagtalinaed iti daytoy a moisture ket napatpateg no lumaklakay wenno bumakbakettayo, tangay mapukawan ti kudiltayo iti dadduma nga abilidadna a mangtaginayon iti danum bayat nga agmatmataengantayo.

Nakalkaldaang ta iti kaaduan iti lubong, kasapulan ti adu a panagregget tapno magun-odan ti umdas a nadalus, nadarisay a danum. Ngem adu ti iyegna a gunggona. Ikagumaam ti uminum iti adu a danum, ket gundawayam daytoy a simple a pamay-an tapno sumayaat unay ti langa ken riknam!