Manipud Managbasatayo
Dagiti Bekkel Kayatko nga ipakaammo kadakayo no kasano a pinaregtanak ti artikulo a “Dagiti Bekkelmo—Sagat a Mangtaginayon iti Biag.” (Agosto 8, 1997) Imbaga kaniak ti doktorko nga adda sakit ti bekkelko. Gapu iti artikulo, diak unay mariknan a sisiak ti agsakit.
V. M., Estados Unidos
Adda sakit ti bekkelko a nakayospitalak iti uppat a bulan. Ti panangbasak iti artikuloyo tinulongannak a nakaamiris nga ignoranteak gayam iti bagik. Ita, nasaysayaaten ti panangilawlawagko iti kasasaadko kadagiti sabsabali.
S. H., Japan
Dimteng daytoy nga artikulo idi naibaga ken ni baketko nga adda kanser ti bekkelna. Nupay naklaatkami iti nairekonoser, silalawag a naawatanmi ti nadumaduma a maaramidan ti bekkel idi nga inlawlawag daytoy ti siruhano kadakami. Naikkat ti bekkel ni baketko babaen iti operasion ket ita agpapaungaren manipud pannakaoperana.
G. S., India
Pakasaritaan ti Eskultor Naragsakanak a nangbasa iti “Nasaysayaat Ngem ti Agbalin a Mabigbigbig iti Lubong,” ti kapadasan ni Celo Pertot. (Agosto 22, 1997) Sakbay a nagbalinak a Kristiano, musika ken teatro ti ad-adalek kas karera. Iti rabii sakbay ti panagbautisarko, tineleponuandak dagiti mannurat iti nalatak a programa iti telebision. Idi imbagak a saanakon a mananglinglingay, kinunada, “Agballaka kadi?” Kas ken ni Celo Pertot, patiek nga aglaplapusanan ti panangbendision ni Jehova iti pangngeddengko.
R. F., Estados Unidos
Ruso a Teologo Pagyamanan unay iti panangimaldityo iti artikulo a “Dagiti Saksi ni Jehova Idiay Russia.” (Agosto 22, 1997) Pagraemak ken dayawek unay ti tured ken tarigagay ni Sergei Ivanenko nga imaldit ti kinapudno maipapan kadagiti Saksi ni Jehova.
S. M., Estados Unidos
Gura Dagiti serye ti “Apay a Nalaus ti Guranggura? Apay a Nakabasbassit ti Panagayat?” (Setiembre 8, 1997) ti addaan iti maysa kadagiti kasayaatan pay laeng nga akkub nga immaldityo. Tinulongandak dagiti artikulo a mangtarus a nalawlawag no apay nga aginap dagiti tattao kadagiti ganggannaet ken tattao iti nadumaduma a kultura.
J. M., Estados Unidos
RSD—Naut-ot a Sakit Mariknak a rumbeng nga agsuratak kadakayo kalpasan a nabasak ti artikulo nga “RSD—Makariro, Naut-ot a Sakit.” (Setiembre 8, 1997) Idi Enero, naammuak nga addaanak iti RSD. Inkagumaak ti mangsapul iti impormasion maipapan iti dayta. Nakasangitak ngarud idi nakitak daytoy nga artikulo. Praktikal, ken sinungbatanna ti adu a saludsodko.
W. B., Inglatera
Uppat a tawenen nga agsagsagabaak iti RSD. Pagyamanan iti panagreggetyo nga agsirarak a naimbag maipapan iti daytoy a tema. Talaga nga impakitana ti nainggayyeman a panagayatyo.
G. S., Alemania
Agsagsagaba ni lakayko iti RSD, ket marigatankami idi a mangilawlawag iti daytoy a sakit iti dadduma a tao. Ita ta nailawlawag a naimbag iti artikulo, saankamin a marigatan. Inranudmi met daytoy a material kadagiti doktor ken rehabilitation offices. Ti panagbasa iti pakasaritaan ti pannakidangadang ni Karen Orf iti RSD ket kayarigan iti panangbasak iti pakasaritaan ti biag ni lakayko! Kas ken ni Karen, segseggaanmi ti baro a lubong, inton awanen a pulos ti ut-ot.
K. P., Australia
Agyamanak ken ni Karen gapu iti pakasaritaanna. Isut’ malaglagip ken ikarkararagko, ket sapay koma ta agtultuloy ti panagimbagna. Ti RSD apektaranna ti bukot ken gurgurongko agingga kadagiti dapanko. Ti panagtugaw kadagiti gimong ken pannagna iti tay-ak ti ministerio ti mangpaalusiis ken mangpaut-ot unay kaniak. Nupay kasta, babaen iti pannarabay ni Jehova, saan a daytoy ti nanglapped kaniak.
C. K., Inglatera