No Apay nga Adu ti Agkedked iti Dara
ITI naawagan a naisangsangayan a desision, pinanungsungbat ti maysa a korte idiay Ontario ti Canadian Red Cross gapu ta nakaptan iti HIV ti dua a nayalisonan iti dara—nga agpadpada a nayalisonan iti namulitan a dara a naggapu iti maymaysa a nagdonar. “No adda makadidigra a kas iti mangmulit a dara a mamagpeggad iti biag dagiti nayalisonan,” kinuna ni Justice Stephen Borins, “kasapulan ti naganat a panangtaming.”
Kabayatan ti dekada ti 1980, 1,200 a taga Canada ti nakaptan iti HIV, ken 12,000 pay ti nakaptan iti hepatitis C—amin ket gapu iti namulitan a dara ken dagiti produkto ti dara. Tapno mapabassit ti bilang dagiti impeksion, naan-annad nga amangen ti pannakausig dagiti agdonar. Ngem saan a napudno amin nga agdonar maipapan iti seksual a kapadasanda. Kas pagarigan, ipalgak ti maysa a surbey idiay Estados Unidos, a 1 iti 50 nga agdonar ti saan a nangipadamag kadagiti napeggad a banag, a kas iti homoseksual nga aramidda wenno ti pannakidennada iti balangkantis.
Ti mangdegdeg pay iti parikut ket ti kinapudno nga agmintis ti panangeksamen iti dara. Sigun iti magasin a New Scientist, “no ti maysa a tao ket mangted iti dara iti kurang a tallo a lawas kalpasan a nakaptan iti HIV, agmintis dagiti agdama a panangeksamen iti kaadda dagiti virus. Para iti hepatitis C, agpaut iti nasurok a dua a bulan daytoy a ‘baet ti tiempo a tumaud ti gundaway.’”
Kadagiti kallabes a tawen, dakkel ti bimmassitan ti bilang dagiti taga Canada a situtulok a mangted—wenno agpayalison—iti dara. Kuna ti kolumnista a ni Paul Schratz: “Tangay bumasbassit ti bilang dagiti aginteres nga agdonar, ken umad-adu dagiti saan a makaidonar, pagyamanan iti Dios ken kadagiti Saksi ni Jehova a mangidadaulo iti panagsirarak kadagiti kasandi ti dara.”
Makapainteres ta ipadamag ti The Toronto Star a kabayatan ti maysa a napalabas a tawen, 40 a tattao ti “nayospital idiay Canada a naginkukuna a Saksi ni Jehova-da agsipud ta dida kayat ti mayalisonan iti dara.” Ipakita dagiti surbey a kaykayat ti agarup 90 a porsiento kadagiti taga Canada ti kasandi ti maidonar a dara. Saan ngaruden a basta narelihiosuan nga isyu ti panagusar iti dara.