Dagiti Kadawyan a Kinaulbod Maipapan Kadagiti Uleg
BABAEN TI KORESPONSAL TI AGRIINGKAYO! IDIAY INDIA
Naguyas ti nasileng a kobra iti balasitang, gapu ta nakayawan iti kinabanglo dagiti sabong ti hasmin iti buokna. Nagalloallon ti atiddog a pammagina a kas man la dalluyon ti baybay. Nakita ti balasitang a naggilap ti muging ti kobra a kas man la narimat a saniata bayat a naimayeng ti balasitang gapu ta minulagatan ti kobra. Kellaat a tinuklawna ti balasitang ken impalokna dagiti sangina iti takiagna.
PUDNO wenno ulbod? Ulbod ti intero a naisalaysay iti ngato, a naibasar iti kadawyan a di umiso a panangipapan. Usigem ti sumagmamano kadagitoy a kamali.
1. Maatrakar dagiti uleg iti hasmin, sandalwood, ken dadduma pay a banglo. ULBOD. Ti banglo ti pakaatrakaran dagiti insekto, dagiti insekto ti pakaatrakaran dagiti tukak, ket dagiti tukak, a maysa kadagiti kankanen ti uleg, ti pakaatrakaran dagiti uleg.
2. Vertical ti panaguyas dagiti uleg. ULBOD. Daytoy nga impresion ket gapu iti panaguyas dagiti uleg kadagiti dadakkel a gangal. Ti normal a panaguyas dagiti kobra ken dadduma pay nga uleg iti takdang ket horizontal, iti diretso a linia. Mabalin nga iyunnatda a paabante ti makinsango a paset ti bagida ken guyodenda ti makinlikud a paset ti bagida wenno, babaen iti tulong ti aniaman a nakatud-aw a banag iti daga, agsikko ken agabanteda, a kas man la iti letra nga S.
3. Adda saniata iti ulo ti dadduma nga uleg. ULBOD. Sarsarita dayta agraman ti panamati a dagiti natan-ok a lallaki iti kadaanan nga India ket salsalakniban dagiti kobra.
4. Imayeng dagiti kobra ti biktimada. ULBOD. Kadawyan nga agmulagat ti uleg no nabutngan, isu a ti impresion a naited kadagiti tattao no nakasalaponda iti uleg ket nakamulengleng, naimayeng a panangmatmat. Nupay kasta, saan a kastoy ti pamay-an a panangtiliwna iti biktima.
5. Rugmaan dagiti kobra ti biktimada. ULBOD. Ti makinsango a paset ti bagina ti irugma ti kobra, ngem agtalinaed iti daga ti kaaduan a paset ti bagina tapno kas man la ikebbengna ti bagina. Masansan a ti kakatlo ti bagina ti tumakder ken tumukkaw.
6. Nasileng ken kanayon a nalamiis ti lalat dagiti uleg, agraman dagiti kobra. ULBOD. Namaga ken nalukneng ti lalat agraman siksik dagiti uleg. Dagiti uleg ket nalamiis ti panagdardarada a parsua; agpannuray ti temperatura ti bagida iti panagbalbaliw ti makinruar a temperatura.
7. Tuleng dagiti kobra. ULBOD. Daytat’ di umiso a pammati dagiti adu. Patien dagitoy a ti laeng pamay-an ti panagdengngeg ti uleg ket manipud iti panagdayyeg ti daga a marikna ti bagina. Ti Biblia, idiay Salmo 58:4, 5, siuumiso a kunaenna a saan a tuleng dagiti kobra. Impakita ti nabiit pay a panagsirarak a makangngeg dagiti kobra kadagiti uni nga iyallatiw ti angin ken agtignayda iti musika ti manangkayaw iti uleg.—Kitaem met ti Agriingkayo! a Hulio 22, 1993, panid 31.
[Picture Credit Line iti panid 15]
Makinngato nga uleg: Animals/Jim Harter/Dover Publications, Inc.