Aids​—Ania ti Namnama iti Masanguanan?

MALAKSID iti kinaawan dagiti agas a mangpaimbag wenno manglapped iti pannakaakar iti HIV, dadduma pay a bambanag ti manglapped iti panangparmek iti sakit. Maysa kadagitoy ket adu a tattao, tangay saanda a situtulok a mangbalbaliw iti estilo ti panagbiagda, ti sitatallugod a mangirisgo iti pannakaakarda. Idiay Estados Unidos, kas pagarigan, nagtalinaed ti bilang ti naakaran, nupay naksayan ti bilang dagiti tattao a nakapataud iti naan-anayen nga AIDS. Ti makagapu a kinuna ti Associated Press ket “adu a tattao ti di mangipangpangag kadagiti pakdaar maipapan iti pananglapped.”

Kadagiti napanglaw a pagilian iti lubong, a naipadamag a pagnanaedan ti agarup 93 a porsiento kadagidiay naakaran iti HIV, adda pay dagiti mainayon a parikut iti panangparmek iti sakit. Adu kadagitoy a pagilian ti nakapangpanglaw ta saanda a maipaay uray dagiti kangrunaan laeng a serbisio ti panangaywan iti salun-at. Uray no magun-odan dagiti baro nga agas kadagidiay a daga​—ket kaaduanna saan ida a magun-odan​—ti gatad ti makatawen a panagpaagas ket nasursurok ngem ti masapulan ti adu a tattao iti intero a panagbiagda!

Ngem, ipapantayon nga adda kabbaro, nalaka nga agas a napataud a talaga a makapaimbag iti sakit. Makagtengto kadi ti kasta nga agas kadagidiay amin a makasapul iti dayta? Nalabit saan. Tinawen, sigun iti United Nations Children’s Fund, agarup uppat a milion nga ubbing ti matay kadagiti lima a sakit a malapdan koma babaen iti nalaka ken addan a bakuna.

Dagiti ngay naakaran a tattao nga agnanaed kadagiti pagilian a dida makagun-od iti pagagasda? Ni Ruth Mota, iti International Health Programs iti Santa Cruz, California, timmulong a nangorganisar iti programa iti pananglapped ken panangaywan iti HIV kadagiti pinulpullo a napanglaw a pagilian. Kunana: “Manipud iti kapadasak, napateg ti positibo a kababalin a kas met ti pananggun-od iti pannakaagas. Adda am-ammok a tattao a nangibtur iti HIV iti unos ti 10 agingga iti 15 a tawen a saan a pulos a nagtomar iti agas. Makagunggona dagiti agas, ngem ti pannakapaimbag ad-adu ti saklawenna ngem ti basta panagtomar iti agas. Iramanna ti kababalin, suporta ti kagimongan, espiritualidad, ken ti nasustansia a taraon.”

Addanto Solusion

Adda kadi aniaman a rason a pamatian nga addanto aldaw nga awanton ti AIDS? Wen, adda. Ti kasayaatan a namnama ket linaon dagiti sasao iti awagan ti adu a ti Kararag ti Apo wenno ti Amami (Paternoster). Iti dayta a kararag, a nailanad iti libro ti Biblia a Mateo, idawdawattayo a maaramid koma ti pagayatan ti Dios ditoy daga a kas met idiay langit. (Mateo 6:9, 10) Saan a pagayatan ti Dios nga agnanayon a masaplit dagiti tattao iti sakit. Sungbatanto ti Dios dayta a kararag. Iti panangaramidna ti kasta, ipatinggananto saan laeng a ti AIDS no di ket dagiti amin a dadduma pay a sakit a mangsapsaplit iti sangatauan. Iti kasta, “ti agtaeng dinanto kunaen, Masakitak.”​—Isaias 33:24.

Kabayatanna, ti kasayaatan a pamuspusan ket pananglapped. Kadagiti adu a sakit, adda dua a pagpilian: Mabalinmo a lapdan ida wenno agasan. Iti HIV, awan ti kasta a pagpilian. Mabalin a lapdan, ngem iti agdama saan a maagasan. Apay nga isagmakmo ti biagmo? Sigurado a nasaysayaat a lapdan ngem ti saan a maagasan.

[Blurb iti panid 9]

“Ti pannakapaimbag ad-adu ti saklawenna ngem ti basta panagtomar iti agas. Iramanna ti kababalin, suporta ti kagimongan, espiritualidad, ken ti nasustansia a taraon.”​—Ruth Mota

[Kahon/Ladawan iti panid 9]

“Nagsayaat ti Kongregasion”

Indagadag ni apostol Pablo kadagiti padana a Kristiano: “Aramidentayo koma ti naimbag kadagiti isuamin, ngem nangnangruna kadagidiay nainaig kadatayo iti pammati.” (Galacia 6:10) Ti ina ni Karen, a nadakamat iti immuna nga artikulo, isalaysayna no kasano a nagtignay ti lokal a kongregasion dagiti Saksi ni Jehova idi naammuanda nga agsakit da Karen ken ni Bill iti HIV. Kunana: “Nagsayaat ti kongregasion. Idi nagpulmonia ni Bill, nagsakit met ni Karen ket ikagkagumaanna nga aywanan ni lakayna ken kadagiti annakda. Dinalusan dagiti kakabsat ti balayda, tinarimaanda ti kotse, ken inlabaanda ida. Tinulonganda ida a mangasikaso kadagiti legal a kasapulanda ken iti iyaakarda iti sabali a pagtaengan. Inggatangan ken inlutuanda ida iti taraonda. Adda pudpudno a pannakaiburay ti emosional, espiritual, ken material a suporta.”

[Ladawan iti panid 8]

Ti kinamatalek iti asawa malapdanna ti pannakaakar iti HIV