Ti Panangmatmat ti Biblia

Ania ti Nasantuan nga Espiritu ti Dios?

“Ita idi nabautisaranen dagiti amin a tattao, ni Jesus nabautisaran met ket, bayat nga agkarkararag, naluktan ti langit ket ti nasantuan nga espiritu iti sukog ti bagi a kasla maysa a kalapati bimmaba kenkuana, ket immay ti maysa a timek manipud langit: ‘Sika ti Anakko, ti dungdunguen; Inanamonganka.’”​—Lucas 3:21, 22.

IDI nagbitla ni apostol Pablo iti grupo dagiti pilosopo iti kadaanan a Grecia, inawaganna ti Dios a ti “Apo ti langit ken daga.” Kinuna ni Pablo a daytoy ti Dios a “nangaramid ti lubong ken dagiti isuamin a bambanag nga adda iti dayta” ken “mangted iti biag ken anges ken isuamin a bambanag kadagiti amin a tattao.” (Aramid 17:24-28) Kasano a maaramidan ti Dios amin daytoy? Daytat’ babaen ti nasantuan nga espiritu, wenno aktibo a puersana.

Ilawlawag met ti Biblia a ti Dios ‘dakkel unay ti kinamaingelna, ken napigsa iti pannakabalin.’ (Isaias 40:26) Wen, pinarsua ti Dios ti intero nga uniberso, a pakakitaan iti dakkel unay a kinamaingel ken pannakabalinna.

Agtigtignay a Pannakabalin

Talaga a saan nga umiso nga ibaga a ti nasantuan nga espiritu ti pannakabalin ti Dios. Ngamin, ti pannakabalin ket mabalin a nakalemmeng, wenno saan nga aktibo nga adda iti maysa a tao wenno banag, a kas iti bileg nga adda iti kargada ngem saan a maus-usar a bateria. Nupay kasta, sigun kadagiti Kasuratan, agtigtignay ti espiritu ti Dios a kas iti koriente nga agtartaray manipud iti maus-usar a bateria. (Genesis 1:2) Gapuna, ti nasantuan nga espiritu ti Dios ket ti us-usarenna a pannakabalinna, ti aktibo a puersana.

No dadduma, dakdakamaten ti Biblia ti nasantuan nga espiritu kas mangar-aramid iti maysa a banag wenno adda iti naiduma a lugar manipud iti Dios. (Mateo 28:19, 20; Lucas 3:21, 22; Aramid 8:39; 13:4; 15:28, 29) Ipapan ti dadduma a nakabasa kadagita a teksto nga adda bukod a pakabigbigan ti nasantuan nga espiritu a naiduma iti Dios. Apay a kastoy nga estilo ti nausar kadagiti Kasuratan? Ti aya nasantuan nga espiritu ket banag a naisina iti Dios?

Naiduma unay ti kasasaad ti Mannakabalin Amin a Dios ngem iti material a pinarsuana. Isut’ maysa nga espiritu, a di makita dagiti limitado a sentidotayo. (Juan 4:24) Kunaen ti Biblia nga agnanaed ni Jehova a Dios idiay langit ken manipud sadiay, kitkitaenna ti sangatauan. (Salmo 33:13, 14) Nalaka a maawatan daytoy. Dakdakkel la ketdi ti Namarsua ngem kadagiti elemento nga us-usarenna nga agtrabaho. Iturturayanna ida, us-usarenna ida, bukbuklenna ida, ken konkontrolenna ida.​—Genesis 1:1.

Manipud iti di makita a pagnanaedanna, kabaelan ti Dios a pagtignayen dagiti banag iti aniaman nga oras ken iti sadinoman a lugar. Gapuna, saan a kasapulan nga isut’ adda iti lugar a pagtigtignayan ti aktibo a puersana. Maibaonna ti espirituna a mangaramid iti dayta a trabaho. (Salmo 104:30) Mabalin a nalaka a maawatan daytoy dagiti tattao kadagiti moderno a panawen nga agus-usar kadagiti appliance iti pagtaengan babaen ti wireless remote control. Kadagitoy a panawen, bigbigbigentayo ti bileg dagiti di makita a puersa a kas ti koriente wenno infrared wave. Umasping iti dayta, babaen ti di makita a nasantuan a puersa, wenno espirituna, maibanag ti Dios ti aniaman a panggepna, a din kasapulan a mapan iti nadumaduma a lugar.​—Isaias 55:11.

Idi panawen ti Biblia, mabalin a narigat a maawatan daytoy a kapanunotan. Ti panangdeskribir iti nasantuan nga espiritu kas naiduma a puersa sigurado a tinulonganna dagiti agbasbasa a mangtarus no kasano nga us-usaren ti Dios ti pannakabalinna uray no saan a mapan a mismo iti lugar a pagtigtignayan ti pannakabalinna. No tuktukoyen ti Biblia ti nasantuan nga espiritu kas mangar-aramid iti daytoy wenno dayta, kaipapananna laeng nga inusar ti Dios a mismo ti pannakabalinna kadagiti tattao wenno bambanag tapno maibanag ti panggepna.

Ti Nadumaduma a Panagtignay ti Nasantuan nga Espiritu

Inusar ni Jehova ti nasantuan nga espiritu idi pinarsuana amin a makita ken di makita a banag. (Salmo 33:6) Inusar met ti Dios dayta a nangdadael iti naranggas ken di agbabbabawi a kaputotan dagiti tattao babaen ti delubio. (Genesis 6:1-22) Dayta met laeng ti aktibo a puersa nga inusar ti Dios a nangyakar iti napateg a biag ti Anakna iti aanakan ti Judio a birhen a ni Maria.​—Lucas 1:35.

No dadduma, pinabileg ti espiritu dagiti lallaki tapno situtured ken sibibileg a sawenda ti kinapudno kadagiti kabusor, nupay masansan a nagpeggad ti biagda. (Mikias 3:8) Ket adda adu a gundaway iti Biblia, nangnangruna no maipapan iti panagipadto, idi a naikkan dagiti lallaki ken babbai iti naisangsangayan a pannakaawat wenno pannakatarus babaen daytoy a puersa. Tangay awan tao a makaipadto a siuumiso iti mapasamak iti masakbayan, daytoy ket naisangsangayan a panagtignay ti espiritu.​—2 Pedro 1:20, 21.

Dagiti indibidual ket maipaayan met ti espiritu iti pannakabalin nga agaramid kadagiti milagro. Kas pagarigan, babaen daytoy a puersa, nakontrol ni Jesus dagiti puersa ti nakaparsuaan, nangpaimbag kadagiti sakit, ken nangpagungar pay kadagiti natay. (Lucas 4:18-21; 8:22-26, 49-56; 9:11) Ti espiritu ti nakatulong iti pannakaorganisar ken panagtignay dagiti nagkauna a Kristiano nga agserbi kas sasaksi ti Dios iti intero a daga.​—Aramid 1:8; 2:1-47; Roma 15:18, 19; 1 Corinto 12:4-11.

Agtigtignay ti Pannakabalin ti Dios iti Biangtayo

Posible kadi nga agkiddaw dagiti natauan nga adipen ti Dios kadagitoy nga aldaw iti daytoy aglaplapusanan a gubuayan iti bileg? Wen! Mangipapaay ti Dios iti nasantuan nga espiritu kadagiti tattaona a tumulong kadakuada a mangtarus ken mangitungpal iti pagayatanna. Ipapaayna ti espirituna kadagidiay sipapasnek, sikakararag nga agkiddaw, nga umiso ti kasasaad ti pusoda, ken ar-aramidenda dagiti ipakalikagumna. (1 Corinto 2:10-16) Matulongan dayta nga espiritu dagiti imperpekto a tattao babaen ti “pannakabalin a nalablabes ngem ti gagangay,” a tumulong kadakuada nga agserbi iti Dios a simamatalek iti laksid dagiti tubeng. Sigurado ngarud a tarigagayan amin a managbuteng-Dios a tattao nga awaten ken pagtalinaeden ti espiritu ti Dios.​—2 Corinto 4:7; Lucas 11:13; Aramid 15:8; Efeso 4:30.

Asidegen nga usaren ti Dios daytoy dakkel unay a kinamaingelna a mamagpatingga iti panangilupitlupit ken panagsagaba iti daytoy nadangkes a lubong, tapno masantipikar ti naindaklan ken nasantuan a naganna. Nasayaatton ti kasasaad ti intero a lubong gapu iti nasantuan nga espiritu, ket nabatadton dagiti bungana kadagiti amin, a pakaipadayagan ti Nagtaudanna.​—Galacia 5:22, 23; Apocalipsis 21:3, 4.