Manipud Kadagiti Agbasbasa
Dagiti Napuskol a Kabakiran Pagyamanan iti nalawag ken makaliwliwa nga impormasion nga impablaakyo maipapan kadagiti napuskol a kabakiran. (Mayo 8, 1998) Nakalkaldaang a makita no kasano a ti kinamaag ken kinaagum ti tao ti mangdaddadael iti planetatayo ken ti nagpapateg nga an-animal ken mulmulana. Maragsakanak a mangpanunot nga asidegen a bumallaet ti Naindaklan a Namarsua kadatayo a ni Jehova, ken alawenna daytoy nagpateg a saniata ken dagiti sibibiag nga organismona.
F. A., Brazil
Maragsakanak a mangibaga a nagsayaat unay ti panangilawlawag ti artikuloyo maipapan kadagiti adu a parikut ken isyu iti pannakadadael dagiti napuskol a kabakirantayo kadagitoy nga aldaw. Kayatko ti agyaman a nangnangruna iti panangipaayyo iti impormasion iti maudi a parapo—ti kinapudno nga adda namnama dagiti nabatbati a kabakiran ket sigurado a rumukbosto ti masanguanan a kaputotan dagiti napuskol a kabakiran.
J. T., Australia
Kabasbasak ti ekselente a ruar ti magasin nga Agriingkayo! nga inted kaniak ti mannakigayyem a ganggannaet a maysa kadagiti Saksi ni Jehova. Miembroak ti Edinburgh University Ecological Society, ket nagturposak iti forestry idiay Edinburgh University idi 1939. Adu ti naisuro kadakami maipapan kadagiti napupuskol a kabakiran iti tropiko. Kablaawankayo ken dagiti katulonganyo iti kinasayaat dagiti serye a “Maispalto Kadi Dagiti Napuskol a Kabakirantayo?” Inungpotko a binasa dayta. Sapay koma ta rumang-ay ti sagrado a movimientoyo! Rumang-ayto dayta.
L. M., Inglatera
Ti Tawen 2000 Nagsayaat a palagip ti artikulo a “Ti Panangmatmat ti Biblia: Kasano Kapateg ti Tawen 2000?” iti Mayo 8, 1998 nga Agriingkayo! Apresiarek ti kinaprangkayo a mangupay iti aniaman a pagannayasan nga agpattapatta ken ti kinamapagpiaranyo a mangilawlawag kadagiti napalabas a salaysay maipapan iti tiempo ti aldaw ni Jehova.
S. W., Estados Unidos
Naballigi iti Sidong ti Ipapatay Maragsakanak nga agsurat ken agyaman kadakayo iti panangipablaakyo kadagiti kapadasan dagiti kakabsattayo kabayatan ken kalpasan ti maikadua a gubat sangalubongan, kas kadagiti serye ti “Naballigi iti Sidong ti Ipapatay.” (Mayo 8, 1993) Dayta a serye dagiti artikulo ti nakaparegtaak nga agtultuloy nga agserbi ken Jehova, a surotek ti addang dagiti naballigi a Saksina. Dida simmardeng nga agayat ken Jehova nupay napangtaanda iti ipapatay.
A. A., Albania
Biag ken Ipapatay Idiay Cambodia Pagyamanan iti artikulo a “Ti Napaut a Panagdaliasatko Manipud Biag ken Ipapatay Idiay Cambodia.” (Mayo 8, 1998) Nagsayaat ti agserbi ken Jehova a simamatalek ken maammuan a kas ken Wathana Meas, nga idi soldado ket nakapapatay kadagiti sabsabali tapno agbiag, adu ti agserserbin ken Jehova iti laksid dagiti nasaem a kapadasan. Nagalinggagetak a nakabasa a tallo a bulanna iti uneg ti nalmeng nga abut. Saanna nga ammo nga asideg idin a malak-amanna ti katan-okan a pribilehio iti biagna—ti pannakaam-ammona ken Jehova!
C. M. S. L., Brazil
Mangukomka Kadi Babaen iti Itsura? Makaallilaw ti itsura, a kas iti nagsayaat a panangyilustrar ti sariugma maipapan ken Nasreddin Hoja. (Mayo 8, 1998) Pagyamanan iti panangipalagipyo kadakami a rumbeng a saanmi nga ukomen dagiti sabsabali iti naimbag wenno dakes gapu laeng iti itsurada—ta ukomennatayo ni Jehova gapu iti kasasaad ti puso, saan a gapu iti itsuratayo.
A. O. F. A., Brazil
Ti Ayat Saan a Pulos Aggibus Naimpusuan nga agyamanak iti ababa, ekselente nga artikulo a “‘Ti Ayat Saan a Pulos Aggibus’—Aggibus Aya ti Ayatyo?” (Mayo 8, 1998) Natignay ken naparegtaak unay kadagiti ideya a naputar mainaig iti nadumaduma a parupa ti pudno nga ayat, nangnangruna ta dimteng ti artikulo idi kasapulak unay ti tulong. Kombinsidoakon nga aniaman dagiti kasasaad, saan a pulos nga aggibus ti pudno nga ayat.
S. G., Francia