Manipud Kadagiti Agbasbasa
Balbaliwantayo Kadi ti Paniempotayo? Agtawenak iti 17 ket agsagsaganaakon iti panagturposko. Ti eksamenasion inramanna ti geograpia, ket dakkel ti naitulong dagiti serye ti “Balbaliwantayo Kadi ti Paniempotayo?” (Mayo 22, 1998) iti panagsaganak. Kalpasan ti eksamenasion, dinamag dagiti kaklasek no nangalaak daytoy impormasion maipapan iti paniempo, ket kagudua kadakuada ti nagkiddaw iti bukodda a kopia.
A. G., Switzerland
Naragsakanak nupay diak impagarup a mausig ti panagbara ti globo iti daytoy a ruar ti Agriingkayo! Napeklanak nga ekologo ken Kristiano. Talaga a masansan a mababalaw dagiti Saksi ni Jehova iti warnakan. Ngem maikari a pagpampanunotan dagiti linaon ti magasinyo. Kumapkapuy unayen ti ekolohia ken pammati. Ngem adda met laengen dagiti relihioso a tattao nga interesado kadagiti pinarsua ti Dios!
M. C., Francia
Agtawenak iti 14 ket kayatko ti agyaman kadakayo gapu kadagiti artikulo. Diak unay pinampanunot idi ti paniempo, ngem iti damo unay a gundaway, ut-utobekon a naimbag ti mabalin nga ar-aramidentayo iti planetatayo. Sapay koma ta dagitoy nga artikulo ti mangriing kadagiti adu a tattao, agsipud ta siasino ti mayat a mangdadael iti aglawlawtayo? Saan a mabalin a basta dadaelentayo ti maysa a sagut ti Dios.
S. Q., Alemania
Makapabang-ar a basaen ti maipapan iti klima, iti ibilang dagiti tattao a narelihiosuan a magasin. Ipakpakitana laeng no kasano a maseknan unay ti Agriingkayo! kadagiti tattao—saan laeng nga iti relihion no di ket uray iti pisikal. Nupay tagtagilag-anentayo dayta, agpayso nga ap-apektaran ti paniempo ti panagbiagtayo.
M. F. M., Alemania
Panangtaripato iti Kuko Dandani gayam 52 a tawenen, malaksid iti dua nga apagbiit a tiempo, a kagkagatek dagiti kukok. Tangay nabasak iti Agriingkayo! a Mayo 22, 1998 ti artikulo a “Dagiti Kukom—Tartaripatuem Kadi Ida?,” insardengkon. Apay? Agsipud ta ni Jehova a Dios ti Nangdisenio kadakuada ket kayatna a taripatuentayo ida a kas iti dadduma pay. Pagyamanan kadagiti naayat a palagipyo.
D. H., Inglatera
Mabalin a maawatanyo a bassit laeng ti panawenko a mangtaripato kadagiti imak tangay adda balay ken hardin ken lugpi a katugangak a babai nga ay-aywanak. Sumagmamanon a tiempo a pakaseknak dagiti kukok, ta narasida. Isu a dimteng ti artikulo iti umiso a tiempo.
W. B., Alemania
Sipud pay idi ubingak, kagkagatek dagiti kukok ket mabainak iti naalas nga itsurada. Bayat a binasak ti artikulo, immuneg ti apresasionko a dagiti kuko ket nakaskasdaaw a paset ti bagitayo kas tao. Pinaregtanak a mangatur iti ugalik.
K. Y., Japan
Pagsarmingan Idi binasak ti artikulo iti Mayo 22, 1998 nga Agriingkayo! a napauluan “Agimtuod Dagiti Agtutubo . . . Siasino ti Rumbeng a Pagsarmingak?,” inut-utobko no kasano a nagunggonaan ti biagko kadagiti artikulo a kas iti daytoy. Kalpasan ti panagsisina ti pamiliak, natural nga immikayak idi damo kadagiti gagayyem a kataebko. Ngem rinugiak ti nagpanunot a naimbag maipapan kadagiti tattao nga addaan iti kasayaatan nga impluensia iti biagko—dagiti natataengan a Kristiano a kakabsat a babbai. Agbirbirokak kadagiti magayyemko a kas kada Pablo ken Timoteo wenno Ruth ken Noemi. Ti kadekketan a gayyemko ket maysa a sister nga agarup 50 ti tawenna a sinuruannak maipapan iti rag-o, ayat, pannakipagrikna, kinaasi, ken kinamanagparabur. Agtartrabahokam a sangsangkatunos—agkabbalaykami ken nangrugikamin iti amin-tiempo a ministerio. Pagyamanan iti nagsayaat a balakad ken panangiwanwanyo.
C. F., Estados Unidos