Manipud Kadagiti Agbasbasa
Bukod a Panangagas Naragsakanak a nakakita iti serye dagiti artikulo a “Bukod a Panangagas—Matulongannaka Wenno Madangrannaka?” (Hulio 8, 1998) Nagsayaat ti pannakaisuratna ken natimbeng ti panangmatmatna iti tema, a praktikal iti kaaduan a pagilian iti intero a lubong. Nagsayaat ti panangipaganetgetna iti kinapateg ti personal a panangasikaso iti salun-attayo babaen kadagiti makapasalun-at nga estilo ti panagbiag imbes a kanayontayo nga ‘agtomar iti agas kadagiti amin nga an-annayen.’
J. M. J., Inglatera
Panagalembong Pagyamanan iti artikuloyo a “Ti Panangmatmat ti Biblia: Ania ti Dakes iti Panagalembong?” (Hulio 8, 1998) Nakalung-awen ti pamiliak kadagiti epekto ti kinaalembongko. Diak pinanunot ti sagabaen ti pamiliak, nangnangruna ni nadungngo a baketko. No adda man maibagak kadagiti Kristiano a kakabsatko, isu daytoy: “Pangngaasiyo ta imdenganyo ti Amatayo a ni Jehova. Dikay agal-alembong, agpatulongkayo, agkararagkayo ken Jehova, ken idianyo, idianyo, idianyo ti kinadakes.”
D. B., Estados Unidos
Para kaniak, pinatalgedan daytoy nga artikulo ti kinapudno a nadagsen a banag ti panagalembong. Naapektaran unay ti pamiliami gapu iti diborsio, ket ti kangrunaan a nakaigapuan ti problema isut’ kas man la inosente a panagaangaw. Sapay koma ta makatulong daytoy a balakad kadagidiay di makaamiris no kasano a makaimpluensia ti kababalin, panagsasao, wenno panagtigtignayda iti kasupadida a sekso.
O. M., Czech Republic
Kas man la makabang-ar a sapsapo dayta kadagiti agpaspasanaang a puso ti adu a kakabsat a babbai. Babaen iti daytoy nga artikulo, naawatanmi a makita ken maseknan ni Jehova iti kaunggan a rikriknatayo.
A. M. P., España
Linawlawagannak ti parapo iti sidong ti subtitulo nga “Emosional a Panagkinnaawatan.” Pinatanor idi ni lakayko ti intelektual a kinasinged iti maysa pay a sister iti kongregasion gapu ta agpada ti nalikudanda. Iti 17 a tawen a panagasawami, pulos a dinak inikkan iti aniaman a pamkuatak a di agtalek kenkuana, ngem nagduaduaak. Nagrigat nga ibaga ken lakayko dagiti rikriknak. Naklaat idi damo ngem inkagumaanna a tarusan ti kapanunotak. Imbagana a dinak kayat a sairen wenno ti tallo nga annakmi, isu a dagus nga insardengnan amin a pannakilangenna [iti sister]. Nabang-aranak unay iti inaramidna.
D. T., Canada
Peggad Kadagiti Nazi Nagustuak a binasa ti artikulo a “Dagiti Saksi ni Jehova—Natured Uray Naipasango iti Peggad Kadagiti Nazi.” (Hulio 8, 1998) Iti Nakristianuan a ministerio, masansan a makasaritak dagiti tattao, a dagiti daddumat’ sipapasnek a mamati nga isudat’ umiso ken di umiso dagiti sabsabali, a mangak-akusar kadagiti Saksi ni Jehova a nakikompromisoda iti rehimen dagiti Nazi. Makatulongto kaniak ti impormasion iti daytoy nga artikulo tapno matulongak dagiti napasnek a tattao a mangtarus iti historikal a kinapudno nga adda iti likudan dagiti mairakrakurak a palso nga akusasion maipapan kadatayo.
A. F., Slovenia
Pagyamanan unay iti artikulo. Nupay diak kapammatian ni lakayko, adda nakitana a sumagmamano a negatibo a material nga impablaak dagiti apostata sumagmamano a bulanen ti napalabas. Agyamanak unay iti dayta nga artikulo a mangsungbat kadagita a pammardaya.
C. G., Alemania
Panagbuya iti Tumatayab Maysaak nga ubing nga agtawen iti pito. Nagustuak ti artikulo a “Panagbuya iti Tumatayab—Makaparagsak a Pagesman Agpaay iti Isuamin?” (Hulio 8, 1998) Dagiti retrato ken eksplanasion talaga a tinulongandak a mangamiris a nakaskasdaaw ti panangaramid ni Jehova iti lubong. Pagay-ayatko unay ti tumatayab a black-crowned crane a naggaput’ Africa—agsipud ta nakaay-ayat ti itsurana. Pagyamanan iti panagsirarakyo.
F. C., Italia