Salun-at ken Talged Dagiti Taga Europa
Babaen ti koresponsal ti Agriingkayo! idiay Britania
NASUROK a 16,000 a lallaki ken babbai ti agtartrabaho idiay hedkuarter ti Watch Tower Bible and Tract Society ken kadagiti 109 a sanga nga opisinana. Dadduma kadagitoy a boluntario ti agtrabaho kadagiti pagimprentaan, iti nadumaduma a pagtrabahuan, ken mangmantener kadagiti makinaria. Ngem aniaman ti annongenda, sipapanunotda kadagiti naimbag nga aramid idiay pagtrabahuan a mangsalaknib iti biag ken salun-at.
Binigbig ti publiko idi 1998 ti nangato a pagalagadan nga impaannurot ti sanga nga opisina ti Britania iti paktoriana idiay Mill Hill iti London kalpasan ti 1997 European Week for Safety and Health. Nayawat iti Sosiedad ti maysa a kristal a malukong a nakailanadan ti sasao nga “European Week for Safety and Health—Award Winner 1997.” Ania ti nakaiturong ti panangawatda iti kastoy a natan-ok a pammadayaw?
Idi 1994, nangisubmitir ti Watch Tower Society iti detalyado a panangusig iti Health and Safety Executive (HSE) maipapan iti pamay-an a pangkissay iti bilang dagiti pannakadangran ti bukot idiay pagtrabahuan. Iti pagnguduan daytoy a kampania, inawat ti Sosiedad ti sertipiko ti HSE gapu iti tulongna. Idi 1996, nakiddaw iti Sosiedad a manggupgop iti ababa a report maipapan kadagiti impaalagadna a panangaywan iti salun-at ken kinatalged. Kalpasanna, nayawat ti maysa a sertipiko iti “Watchtower Bible & Tract Society kas panangbigbig iti napateg a kontribusionna” iti salun-at ken kinatalged.
Iti simmaganad a tawen, 1997, inawis ti HSE ti Watch Tower a makiraman iti kampaniana maipapan iti salun-at ken kinatalged dagiti taga Europa. Idi agangay, nangisubmitir ti Sosiedad iti detalyado a panangilawlawag a napakuyogan kadagiti retrato, a mangipakita no kasano a mabalin a maksayan ti tapok manipud iti karpinteria iti 90 a porsiento ken maksayan dagiti nagtikapan iti 100 a porsiento, babaen ti panangikonekta iti tunggal de koriente a remienta iti kangrunaan a sistema a mangsultop iti tapok, a kurang pay a £250 ($400) ti magasto.
Kas resultana, maysa ti Sosiedad kadagiti 30 a napadayawan a naawis a makipagkita kadagiti pannakabagi ti European Commission ken iti gobierno ti Britania agraman iti tserman ti Health and Safety Commission. Idi intedna ti nasuratan a malukong, kinunana: “Nagsayaat ti naaramidan ti Watch Tower!”
[Dagiti ladawan iti panid 31]
Dagiti pammadayaw a naited iti Watch Tower gapu kadagiti nangato a pagalagadanna iti salun-at ken kinatalged