Atap a Saniata
KADAGITI NATIKAG A desierto ti Africa, a manmano nga agtudo, adda agtubo a maysa a saniata—ti desert rose. Tangay nagpintas ti sukogna, nga addaan iti natiritir a sangsanga, nabannayat a dumakkel daytoy a mula ken naikuna nga agbiag iti ginasut a tawen. Ti kasla bimsog a bunged ken dagiti ramutna ti agserbi kas pagurnongan iti danum, isu a makapagbiag iti namaga ken langalang a disso.
Adda makapapatay a sabidong ti puraw a tutot, ramramut, ken bukbukel daytoy natubbog a mula. Dagiti tutot ti bukbukel ket mausar a sabidong iti murdong dagiti pana, ket mangipalladaw dagiti mangngalap iti dayta a lugar kadagiti sangana iti danum tapno maulaw dagiti lames. Iti kasta, nalakada a makakalap. Kanayonanna, us-usaren dagiti agtartaraken iti animal ti dadduma a paset ti mula tapno makaaramidda iti sabidong a pagpatay kadagiti ampas ken kuto dagiti kamelio ken bakada. Nakaskasdaaw ta uray makapapatay ti kayo, kankanen dagiti atap nga animal dagiti bulongna a dida maan-ano.
Ngem kasano a maawagan a saniata ti makasabidong a desert rose? Tangay addaan iti rinaay a nagpipintas a sabong, naisangsangayan ti desert rose, nga addaan iti natayengteng a kolor a dumerosas agingga iti nalabaga. No natikag ken saan a namaris ti daga, agukrad ti nagadu a sabong daytoy nagpintas nga atap a saniata nga aggilap no mainitan.
Ti kasta a nakaskasdaaw a kinapintas iti desierto ti mangipalagip laeng iti panawen inton “ti let-ang ken ti namaga a daga naragsakdanto; ket ti tay-ak a langalang agragrag-onto, ken agsabongto.” (Isaias 35:1) Pumaysonto daytoy a makaparagsak a kari babaen ti asidegen a panagturay ti Pagarian ti Dios. Iti dayta a tiempo, ‘naragsakto’ ti intero a daga, saan laeng a kas napintas a paraiso no di ket kas natalna a lugar para iti amin a sangatauan.—Salmo 37:11, 29; Isaias 35:6, 7.
[Picture Credit Line iti panid 31]
© Mary Ann McDonald